ތުރުކީ-ސޫރިޔާ ބިންހެލުން: ބަލިމަޑުކަމުގެ ބިރު އިންތިހާއަށް ބޮޑުވެއްޖެ!

ދެކުނާއި އިރުމަތިން ސޫރިޔާއާއި ގުޅިފައިވާ، މެޑިޓެރޭނިއަން ކަނޑުގެ އައްސޭރިފަށުގެ ހަތޭ ޕްރޮވިންސަކީ ފެބުރުއަރީ 6 ވަނަ ދުވަހުގެ ބާރުގަދަ ބިންހެލުމުގައި އެންމެ ބޮޑު ގެއްލުމެއް ތަހައްމަލުކުރަން ޖެހުނު އެއް ސަރަހައްދެވެ. ވަރުގަދަ ބިންހެލުމުގައި ގިނަ އަދަދެއްގެ ބައެއްގެ ފުރާނަ ގެއްލި، އެތައް ބަޔަކު ޒަޚަމްވެ، ގެދޮރު ގެއްލިފައިވާއިރު، ބަލިމަޑުކަން ފެތުރިގެން ދިއުމުގެ ބިރަކީ މިއަދު ހަތޭއަށް ކުރިމަތިލާން ޖެހިފައިވާ އަނެއް ކާރިސާއެވެ.

ހަތޭ ޕްރޮވިންސްގެ ފެނާއި ނަރުދަމާ ނިޒާމަށް ބޮޑެތި ގެއްލުންތަކެއް ލިބިފައިވާއިރު، ސިއްހީ ދާއިރާވެސް އޮތީ އިނދަޖެހިފައެވެ. އާލާތާއި އިންސާނީ ވަސީލަތުގެ ގޮތުންވެސް ހީނަރުކަން ކުރިމަތިވެފައިވާއިރު، ހަތޭ ޕްރޮވިންސްގައި ހުރި ހޮސްޕިޓަލުތަކުގެ ތެރެއިން 2 ހޮސްޕިޓަލެއްވެސް ވަނީ ބިމާ ހަމަވެފައެވެ.

އެންމެ ފުރަތަމަ އައި ބާރުގަދަ ބިންހެލުމާއި އެ ބިންހެލުމާ ގުޅިގެން ދެންވެސް އަރަމުން ދިޔަ ސިލްސިލާ ލޮޅުންތަކުގެ ސަބަބުން، މިއަދު މުޅި ހަތޭގެ މަގުތައް ފުރިފައިވަނީ އެކި ކަހަލަ ކުނިބުންޏާއި ނަޖިހުންނެވެ. ސާފުކުރުމުގެ މަސައްކަތް ދުރާލައި ނުފެށިއްޖެނަމަ، ހަލުވިކަމާއެކު ގައިން ގަޔަށް އަރާ ބަލިމަޑުކަމެއް ފެށިދާނެކަމުގެ އިންޒާރު، ދާއިރާގެ ތަޖުރިބާކާރުން ވަނީ ދެއްވާފައެވެ.

އުމްރާނީގޮތުން ހަތޭ ޕްރޮވިންސަށް ލިބިފައިވާ ބޮޑެތި ގެއްލުންތަކާއެކު، އާންމު ރައްޔިތުންގެ ޒަރޫރީ ބޭނުންތައް ފުއްދުމަށްވެސް ބޮޑެތި ތަކުލީފުތަކެއް އުފުލަން ވަނީ މަޖުބޫރުވެފައެވެ. ބޯފެން ލިބުނު ކަމުގައި ވީނަމަވެސް، އެހެނިހެން އެތައް ކަމަކަށް ވަނީ ބުރޫ އަރާފައެވެ. އިސްކުރު ފެން ލިބުމުގައި ހުރި ދަތިތައް އަދިވެސް ހައްލު ކުރެވިފައި ނުވާއިރު، ބިންހެލުމުގައި ގެދޮރު ގެއްލުނު މީހުން ގައިން ތާހިރު ވެލާނެ ފަދައެއްވެސް ނެތެވެ.

ވަގުތީ ފާޚާނާ ނުވަތަ އެއްތަނުން އަނެއްތަނަށް ގެންދެވޭގޮތަށް ހުންނަ ފާޚާނާގެ އަދަދު މަދުވުމާއި، ފާޚާނާތައް ފްލަޝްކުރާނެ ފެން ހޯދުމުގައި ދަތިތަކެއް ހުރުމުން، ބޮޑު ބަލިމަޑުކަމެއްގެ ބިރުވެސް އޮތީ އޭގެ އިންތިހާއަށެވެ.

ސިއްހީ ދާއިރާގެ ތަޖުރިބާކާރުން ވަނީ، ވަކިން ޚާއްސަކޮށް ކުޑަކުދިންގެ ނޭވާލާ ނިޒާމާއި ގޮހޮރުގެ ބަލިތަކަށް އެންމެ މަތީ ދަރަޖައިގެ ސަމާލުކަން ދިނުމަށް ގޮވާލައްވާފައެވެ.