އިންސާނީ ދަރިފަސްކޮޅު އެތަނެއްގައި ފެތުރިފައިވާ ކޮންމެ ތަނަކީ އާދަޔާ ޚިލާފު އެތައް ވާހަކައެއް އެތަނަކުން އަޑުއިވޭ، ނުވަތަ ފެނިގެންދާ ތަނެކެވެ. ކޮންމެ ތަނަކީވެސް ދެން ހުރި ތަންތަނާ، އެތައް ގޮތަކުން ތަފާތު ތަނެކެވެ. މިއީވެސް އެކަހަލަ އަވަށެއްގެ ވާހަކައެވެ. އަވަށަށް ބަލައިލުމުން ފެނިގެން ދަނީ، ހިއްކި ގެރިގުއި ބޭނުންކޮށްގެން އަޅާފައިވާ ޖިފުޓި ޒާތުގެ ގެތަކާއި ކަށި ގަސްތަކެކެވެ. މިއީ ކެންޔާގެ އިރުއިތުރު ސަމްބޫރޫ ސަރަހައްދަށް ބަލާނަމަ، މާ އާދަޔާ ޚިލާފު މަންޒަރެއް ނޫނެވެ. ނަމަވެސް، މި އަވަށް، އެހެން އަވަށްތަކާ ތަފާތުވާ ވަރަށް ބޮޑު ސަބަބެއް އެބައޮތެވެ. އެއީ މި އަވަށުގައި އެއްވެސް ފިރިހެނަކު ނުއުޅޭކަމެވެ.
މީގެ 30 އަހަރު ކުރިން މީހުން ދިރިއުޅެން ފެށި އުމޯޖާ އަވަށަކީ، ސަމްބޫރޫގައި ދިރިއުޅޭ އަންހެނުންނަށް އޮތް އަމާން ހިޔާވައްސެކެވެ. ކެންޔާގައި އަންހެނުންނަށް ދޭ އެކި ކަހަލަ އަނިޔާތަކުން ސަލާމަތްވުމަށް، އެމީހުންގެ ދިރިއުޅުން އެތަނަކަށް ބަދަލުކޮށްގެން އުޅޭ އަވަށަކީ މިއީއެވެ. އަންހެން ކުދިން ޚިތާނުކުރުމާއި، ގެވެށި އަނިޔާގެ އިތުރުން ޅައުމުރުގައި ކައިވެނި ކުރުންފަދަ އެތައް ވޭނަކުން ސަލާމަތް ވުމަށް ސަމްބޫރޫގެ އަންހެނުން ދިރިއުޅުން ބަދަލު ކުރަނީ އުމޯޖާ އަވަށެވެ.
ދިރިއުޅެމުން ދިޔައީ ވަރަށް އަނިޔާވެރި މާހައުލެއްގަ. އެއްބަޔަކު، އަނެއްބައެއްގެ އަތުން ފޭރުމާ ވައްކަންކުރުން ކަހަލަ ކަންކަންވެސް އޮތް. އެކަމަކު، އަހަރުމެން އަންހެނުންނަކީ އެހެން އުޅޭ ބައެއް ނޫން. އަހަރުމެން ބޭނުންވަނީ އެއްބައެއްވަންތަ ބައެއްގެ ގޮތުގަ ދިރިއުޅެން.ކްރިސްޓީން ސިޓިޔާން؛ އުމޯޖާ އަވަށުގެ ރަށްވެއްސެއް
ފިރިމީހާގެ ފަރާތުން ޖިސްމާނީ ބޮޑެތި އަނިޔާތަކެއް ލިބެމުން ދިޔަ، އުމުރުން 26 އަހަރުގެ ކްރިސްޓީން ސިޓިޔާނަކީވެސް މިއަދު އުމޯޖާގެ ރަށްވެއްސެކެވެ. 4 ދަރިންގެ މަންމަ، މި އަވަށަށް ބަދަލުވީ އޭނާ ތަހައްމަލުކުރަމުން ދިޔަ އަނިޔާވެރި ދިރިއުޅުން ދޫކޮށްފައެވެ. މިއަދު އޭނާއަށް ކުރެވެމުން ދަނީ މިނިވަންކަމުގެ އިހުސާސްއެވެ.
އަލުން މީހަކާ އިނުމުގެ ވިސްނުމެއް ނެތް. ކުރީގެ ކައިވެނި ދިޔައީ ވަރަށް ހިތިކޮށް. ދަތިކޮށް. އަހަންނަށް ވަރަށް އިހާނެތިކޮށް ހިތީ. އެއްވެސް ހައްގެއް ނުލިބޭ. ދަރިންނަށްވެސް ސްކޫލަކަށް ނުދެވޭ. މިއަދު މަށަކީ، ފަޚުރުވެރި މައެއް.ކްރިސްޓީން ސިޓިޔާން؛ އުމޯޖާ އަވަށުގެ ރަށްވެއްސެއް
ކައިވެންޏާއެކު ދެން އިތުރަށް ކުރިއަށް ދެވިދާނެކަމުގެ އުއްމީދު މުޅިން ގެއްލި ދިއުމާއެކު ކްރިސްޓީން އެންމެ ފުރަތަމަ މަސައްކަތްކުރީ އޭނާގެ އުފަން އަވަށަށް އެނބުރި ދިއުމަށެވެ. ނަމަވެސް އޭނާގެ ކައިވެނީގެ އަގުދެއްގެގޮތުގައި ދީފައި އޮތް ނައަމްސޫފީގެ ޖަނަވާރެއް ވަނީ ވަގަށް ގެންގޮސްފައެވެ.
އަހަރުމެން މި ގަހަނާތައް ހަދަނީ ވިއްކަންވެގެން. އެއީ ދަރިންގެ ކިއެވުމުގެ ކަންކަމާ ކާބޯތަކެތި ގަންނަން ފައިސާ ހޯދަން.ރޯޒް ލިކާންޓާ؛ އުމޯޖާ އަވަށުގެ ރަށްވެއްސެއް
އަނިޔާ ލިބެމުންދާ އަންހެނުންގެ ދިރިއުޅުމަށް އުޖާލާކަން ގެނެސްދިނުމުގެ މަގުސަދުގައި އާބާދުކުރަންފެށި އުމޯޖާ އަވަށުގެ ކޯ-ފައުންޑަރެއް ކަމަށްވާ ޖޭން ނޮމުކެން ބުނިގޮތުގައި އެ ހަރަކާތުގެ އެންމެ ބޮޑު އެއް އަމާޒަކީ، ޅަ އަންހެން ކުދިން، ދޮށީ އުމުރުގެ ފިރިހެނުންނާ ކައިވެނި ކުރުވުން ހުއްޓުވުން ކަމަށެވެ. އަދި އަންހެން ކުދިންނަކީ، އެކުދިން ލޯބިވާ މީހަކާއެކު ޒަވާޖީ ހަޔާތެއް ފަށާ ބައެއް ކަމުގައި ކަށަވަރު ކުރުމެވެ.
ޢާއިލާ ނުރާވާ، ދަރިންތަކެއް ހޯދުމުގެ ބޭނުމެއް ނެތް. އަންހެންކުދިންވެސް އެބަޖެހޭ ތައުލީމު ހާސިލުކުރަން. އެމީހުން ބޭނުން ބައިވެރިއަކު އިޚްތިޔާރުކުރަން. އިހުގެ ގޮތަށް، ބަފައިން، އެމީހުންގެ އަންހެން ދަރީން، ދޮށީ އުމުރުގެ ފިރިހެނުން ނުވަތަ ފައިސާވެރިންނާ ދެވުމުގެ ބަދަލުގަ. އަންހެން ކުއްޖާ ލޯބިވާ މީހަކު ހޯދެން ޖެހޭ.ޖޭން ނޮމުކެން ؛ އުމޯޖާ އަވަށުގެ ކޯ-ފައުންޑަރެއް
އުމޯޖާ އަވަށުގެ ވަޒަންވެރިން އެތަނުގައި ދިރިއުޅެމުން ދަނީ އުފަލާއެކުގައެވެ. އެތައް އުއްމީދެއް ހާސިލުވެ އެތައް ހުވަފެނެއް ހަގީގަތަކަށް ވެފައިވާ ވެއްޓެއްގައެވެ.
މި އަވަށުގަ ދިރިއުޅެން އަހަރެން ވަރަށް ފަޚުރުވެރިވޭ. އެހެންނު ވާނީ، މިހާރު އަހަރެން ހާސްވާނެ އެއްވެސް ކަމެއް ނޯވޭ. ފިރިމީހާއަށްވެސް ދެން މަށަކަށް އަނިޔާއެއް ނުކުރެވޭނެ، މިތާ އިންދަކާ. މިތަނުގަ އަހަރެން މިއުޅެނީ މައެއްގެ ގޮތަށް. ދަރިންނާއެކީ. އަހަރެން ވަކާލާތު ކުރަމުން މިދަނީ ޅައުމުރުގަ މަޖުބޫރުން ކުރުވާ ކައިވެނި ކުރުވުމާ ދެކޮޅަށް ތެދުވުމުގެ ހައްގަށާ، އަންހެން ކުދިން ޚިތާނުކުރުމާ ދެކޮޅަށް ތެދުވުމުގެ ހައްގަށް.ރޯޒް ލިކާންޓާ؛ އުމޯޖާ އަވަށުގެ ރަށްވެއްސެއް
ސަމްބޫރޫގެ އަންހެނުންނަކީ އިންތިހާ އަނިޔާ ތަހައްމަލުކުރުމުގެ ތާރީޚެއް އޮތް ބައެކެވެ. މާޒީއަށް ބަލާއިރު، ސަމްބޫރޫގައި އަންހެނުންނާމެދު ދެކެނީ ދެވަނަ ދަރަޖައިގެ ބައެއްގެ ގޮތުގައެވެ. އަނބިންނަކީ ފިރިހެންގެ މުދަލެއްގެ ގޮތުގައި ދެކެއެވެ. ލިބެމުން ދިޔަ ސިލްސިލާ އަނިޔާތަކުން މިންޖުވުމަށް 15 ވަރަކަށް އަންހެނުން އިސްވެ، އުމޯޖާ އަވަށް އުފައްދައި، އެތަނުގެ ހަމައެކަނި ވަޒަންވެރިންނަކީ އަނިޔާ ލިބިފައިވާ އަންހެނުން ކަމުގައި ހެދިއެވެ. ރައްދުގައި، އެ އަވަށާ ދާދި ކައިރީގައި ހަމައެކަނި ފިރިހެނުންގެ އަވަށެއްވެސް ތަރައްގީކުރަން މަސައްކަތްކުރިއެވެ. ނަމަވެސް އެކަން ކާމިޔާބުވާގޮތެއް ނުވިއެވެ.
