ނަތީޖާއާމެދު ހިތްހަމަނުޖެހުން އޮތަސް ފަހަތަށް ޖެހުމެއް ނެތް - ފައްޔާޒު
16 ފެބުރުއަރީ 2023 | ބުރާސްފަތި 09:53ހުވަފެންތަކުގައި ކުލަޖެހި ކަންކަން ކުރެވޭނީ އެމްޑީޕީގެ ވެރިކަމެއް ދިވެހިރާއްޖޭގައި ކުރިއަށް އޮތްތާގައިވެސް އޮވެގެން
އެމްޑީޕީގެ ޗެއަރޕާސަން ފައްޔާޒް އިސްމާއިލް
ނިމިގެންދިޔަ އެމްޑީޕީގެ ރިޔާސީ ޕްރައިމަރީގެ ނަތީޖާއާ މެދު ބަޔަކު ހިތްހަމަނުޖެހުނަސް ފަހަތަށް ޖެހުމެއް ނެތް ކަމަށާއި، ރިޔާސީ ކެންޑިޑޭޓަށް އިންތިހާބު ކާމިޔާބުކޮށްދޭން ކޮށްދެވެން ހުރި ހުރިހާ މަސައްކަތެއް ކުރައްވާނެކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒު މި ގޮތަށް ވިދާޅުވީ، ބުދަ ދުވަހުގެ ރޭ އިއްޒުއްދީން ސްކޫލް ހޯލުގައި ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމުގައި ވާހަކަދައްކަވަމުންނެވެ. ފައްޔާޒް ވިދާޅުވީ އެމްޑީޕީގެ ތެރޭގައި ކޮންމެވެސް ވަރަކަށް ހިޔާލުތަފާތުވުންތައް އެބަހުރި ކަމަށެވެ. ޑިމޮކްރަޓިކް ޕްރޮސެސްއެއްގެ ތެރޭގައި ކަންކަން ނިމެމުންދާއިރު އާއި އެންމެން ވަކާލާތުކުރި ކަންކަން ތަންފީޒުކުރެވިގެންދާއިރުގައި ނަތީޖާއަށް އަންނަ ބަދަލާއި ގުޅިގެން ހިތްހަމަނުޖެހުމަކީ އިންސާނީ ތަބިއްޔަތުގައި ހުންނަކަމެއް ކަމަށެވެ. އަދި މިކަމާއި މެދު ހިތާމަކުރައްވާ ކަމަށެވެ.
އެހެންނަމަވެސް ޕާޓީގައި އޮތް ސިސްޓަމް ކުރިއަށްދާނެ ކަމަށާއި ޕާޓީގެ ގަވާއިދުތަކާ އެއްކޮށް ކަންކަން ކުރައްވަމުން ގެންދަވާނެ ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ މިހާރު އޮތް ސަރުކާރަކީ ޕާޓީ މިހާ ދުވަސްތަކެއް ވަންދެން ކުރި މަސައްކަތުގެ، އަދި ރާއްޖެ ރިފޯމްކޮށް، ބަދަލުތަކެއް ގެނެސް ދިވެހިންގެ ކުރިމަގު އުޖާލާކުރުމަށް ވޭތުވެދިޔަ 20 ވަރަކަށް އަހަރުތެރޭގައި ކުރެވުނު މަސައްކަތްތަކުގެ ތެރެއިން އުފެދިފައިވާ ސަރުކާރެއް ކަމަށެވެ.
ފައްޔާޒު ވިދާޅުވީ އޭގެ ފޮނިމީރުކަން ދިވެހިރާއްޖޭގެ ރައްޔިތުންނަށް ފެންނަމުން އެބަދާ ކަމަށާއި، އަނިޔާވެރިކަމެއް މިއަދު ނެތް ކަމަށެވެ. އަދުލު އިންސާފުގެ ކަންތައް ދުވަހެއް ދުވަހަކަށް ދަނީ ރަނގަޅުވަމުން ކަމަށާއި، ރައްޔިތުންނަށް ބޭނުންވާ ކަންތައްތަކާއި މުސްތަގުބަލު ބިނާކުރުމަށް ބޭނުންވާ ސިޔާސަތުތަކާއި، އިންފްރާސްޓްރަކްޗަރ ފަދަ ކަންތައްތައް ވޭތުވެދިޔަ 4 އަހަރު ދުވަހުގެ ތެރޭގައި މިދަނީ ދުވަހަކުވެސް ރާއްޖޭގެ ތާރީހުގައި ނުދެކޭ މިންވަރަށް ކުރިއަށް ކަމަށް ވެސް އޭނާ ވިދާޅުވިއެވެ.
ފައްޔާޒް ވިދާޅުވީ ރައްޔިތުންގެ ހުވަފެންތަކުގައި ކުލަޖެހި ކަންކަން ކުރެވޭނީ އެމްޑީޕީގެ ވެރިކަމެއް ދިވެހިރާއްޖޭގައި ކުރިއަށް އޮތްތާގައިވެސް އޮވެގެން ކަމަށެވެ.
