އެލްޗޭ ބަލިކޮށް ރެއާލް އިން ފަރަގު ކުޑަކޮށްފި

ސްޕެނިޝް ލީގުގައި އެލްޗޭއާ ދެކޮޅަށް ކުޅުނު މެޗުން މޮޅުވެ އެންމެ ފަހުގެ ޗެމްޕިއަން ރެއާލް މެޑްރިޑުން ބާސެލޯނާއާ ދެމެދު އޮތް ފަރަގު ކުޑަކޮށްފި އެވެ.

ބުދަ ދުވަހުގެ ރޭ ރެއާލްގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ރެއާލުން ވަނީ ތިން ލަނޑު ޖަހައިފަ އެވެ. އެ ޓީމުގެ އަނެއް ލަނޑު ފެނުނީ ދެ ވަނަ ހާފުގަ އެވެ. މެޗުގައި ރެއާލަށް ލީޑު ނަގައިދިނީ މާކޯ އަސެންސިއޯ އެވެ. އެއީ އަށް ވަނަ މިނެޓުގައި އޭނާ ޖެހި ލަނޑުންނެވެ. އޭގެ ފަހުން މެޗުގެ 31 ވަނަ މިނެޓުގައި ރެއާލަށް ލީޑު ފުޅާކޮށްދިނީ ލިބުނު ޕެނަލްޓީއެއްގައި ކެޕްޓަން ކަރީމް ބެންޒެމާ އެވެ. ފުރަތަމަ ހާފުގެ އިތުރު ވަގުތުގައި ބެންޒެމާ ވަނީ އިތުރު ޕެނަލްޓީއެއް ކާމިޔާބުކޮށް، ރެއާލްގެ ތިން ވަނަ ލަނޑު ޖަހައިދީފަ އެވެ. ރެއާލްގެ ފަހު ލަނޑު މެޗުގެ 80 ވަނަ މިނެޓުގައި ޖެހީ ލޫކާ މޮޑްރިޗް އެވެ.

މި މޮޅާއެކު ރެއާލުން ދެ ވަނައިގައި އޮތީ ކުޅުނު 21 މެޗުން 48 ޕޮއިންޓާއެކު އެވެ. އެއް ވަނައިގައިޮ އޮތް ބާސެލޯނާ އާއި ރެއާލާ ދެމެދު މިހާރު އޮތީ އަށް ޕޮއިންޓުގެ ފަރަގެކެވެ. ކުޅުނު 21 މެޗުން ބާސެލޯނާ އަށް ލިބެނީ 56 ޕޮއިންޓެވެ.