މިހާރު އޮތް މެންޗެސްޓަރ ޔުނައިޓެޑާ ދެކޮޅަށް ކުޅުމަކީ ވަރަށް އުނދަގޫ ކަމެއް ކަމަށް ބާސެލޯނާގެ ކޯޗު ޒަވީ ހެނާންޑޭޒް ބުނެފި އެވެ.

ޒަވީ މިހެން ބުނީ ޔުއެފާ ޔޫރޮޕާ ލީގުގައި ބުރާސްފަތި ދުވަހުގެ ރޭ ޔުނައިޓެޑާ ދެކޮޅަށް ނުކުންނަ މެޗުގެ ކުރިން ވާހަކަ ދައްކަމުންނެވެ. ޒަވީ ބުނީ، އޭނާގެ ނަޒަރުގައި ޔުނައިޓެޑަކީ ޔޫރަޕުގައި ބޮޑު ކުލަބެއް ކަމަށެވެ. އަދި ޔުނައިޓެޑު މިހާރު އޮތީ އެމީހުންގެ ތާރީޚަށް ބަލާ ނަމަ، އެންމެ ރަނގަޅު ހިސާބުގައި ނޫން ކަމަށް ވެދާނެ ކަމަށެވެ. ނަމަވެސް އެމީހުންނަކީ ޔުނައިޓެޑު ކަމަށާއި، މިހާރު އެމީހުން އޮތީ ރަނގަޅު ފޯމެއްގައި ކަމަށް ޒަވީ ބުންޏެވެ. އެގޮތުން ޔުނައިޓެޑަށް ވަރަށް ބޮޑަށް އިހުތިރާމް ކުރާ ކަމަށާއި، ޚާއްސަކޮށް އެ ޓީމުގެ ކޯޗު އެރިކް ޓެން ހާގަށް އިހުތިރާމް ކުރާ ކަމަށެވެ. އަދި ފާއިތުވި ހަފްތާތަކުގައި ޔުނައިޓެޑުން ވަނީ ރަނގަޅު ނަތީޖާތަކެއް ނެރެފައި ކަމަށާއި، މިހާރު އެ ޓީމު އޮތީ ވެސް ވަރަށް ޕޮޒިޓިވްކޮށް ކަމަށެވެ. ޔޫރަޕާ ލީގުގައި ކުޅެން ޖެހުނު ނަމަވެސް ޔުނައިޓެޑަށް އިހުތިރާމް ކުރާކަން ފާހަގަކޮށް ޒަވީ ބުނީ، އެ ޓީމާ ދެކޮޅަށް ކުޅޭ މެޗަކީ ވަރަށް "ޓަފް" މެޗަކަށް ވާނެ ކަމަށެވެ.

ޒަވީ ބުނީ ބުރާސްފަތި ދުވަހުގެ ރޭ ބާސެލޯނާގެ ދަނޑުގައި ކުޅޭ މެޗުން އެއްވެސް ކަމެއް ކަނޑައެޅިގެން ނުދާނެ ކަމަށާއި ޔުނައިޓެޑުގެ ދަނޑުގައި ކޮންމެ ގޮތަކަށް ވެސް ބަދަލުވެދާނެ ކަމަށެވެ. އަދި ފުރަތަމަ މެޗުން ކަނޑައެޅިގެން ދާނީ ވަރަށް މަދު މިންވަރެއް ކަމަށާއި، އެ މެޗަށްފަހު ކުރި މައްޗަށް އޮންނާނީ ދެ ވަނަ ލެގު ކަމަށެވެ. އިތުރަށް ވާހަކަ ދައްކަމުން ޒަވީ ބުނީ އެއްވެސް ހާލެއްގައި ބާސެލޯނާ އަކީ ފޭވަރިޓުންގެ ގޮތުގައި އޭނާ ނުދެކޭ ކަމަށެވެ. އެގޮތުން އެ މުބާރާތުގައި ވާދަކުރާ ވަރަށް ރަނގަޅު ޓީމުތަކެއް އޮތް ކަމަށާއި، އެ މުބާރާތަކީ ކާމިޔާބު ކުރުމަށް ވެސް ވަރަށް އުނދަގޫ މުބާރާތެއް ކަމަށެވެ.

ޔޫރޮޕާ ލީގުގައި ބާސެލޯނާގެ ދަނޑުގައި އެ ޓީމުން ޔުނައިޓެޑާ ދެކޮޅަށް ނުކުންނާނީ ބުރާސްފަތި ދުވަހުގެ ރޭ ރާއްޖެ ގަޑިން 10:45 ގައެވެ.