ޑްރަގް ގެންނަ ބިދޭސީން ފުރުވާލެވޭ ޤަވާއިދު - ތްރީލައިން ވިޕް ނެރެފައި ވަނިކޮށް ގަރާރުގެ މަސައްކަތް ކުރިއަށް

ޑްރަގް އެތެރެކުރާ ބިދޭސީން ރާއްޖެ އެތެރެނުކޮށް އަނބުރާ ފޮނުވާލެވޭ ގޮތަށް ގަވާއިދު އިސްލާހުކުރުމާއި ގުޅިގެން ރައްޔިތުންގެ މަޖިލީހަށް ހުށަހަޅާފައިވާ ކުއްލި މައްސަލައާ ދެކޮޅަށް އެމްޑީޕީ އިން ތްރީލައިން ވިޕެއް ނެރެފައި ވަނިކޮށް އެ ގަރާރުގެ މަސައްކަތް މަޖިލީހުގައި ކުރިއަށް ގެންދަން ނިންމައިފިއެވެ.

ޑްރަގް އެތެރެކުރާ ބިދޭސީން ރާއްޖެ އެތެރެނުކޮށް އަނބުރާ ފޮނުވާލެވޭ ގޮތަށް އުސޫލު ހަމަޖެހުނީ "ވައިގެ މަގުން ދިވެހިރާއްޖެ އަންނަ ބިދޭސީއަކު ދިވެހިރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވޭ ހާލަތްތަކުގައި އެ ފަރާތަކާމެދު ޢަމަލުކުރާނެގޮތުގެ ގަވާއިދު" އިސްލާހު ކުރުމާއި ގުޅިގެން މަޖިލީހަށް ގަރާރެއް ހުށަހެޅުއްވީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފެވެ. ހޯމަ ދުވަހު ބޭއްވި މަޖިލީހުގެ ޖަލްސާގައި އެ މައްސަލައަށް ބަހުސް ކުރަން ފެންނަ ކަމަށް ވޯޓު ދެއްވި 24 މެންބަރަކު ތިއްބެެވެ. އަދި އެ ގަރާރަށް ބަހުސް ކުރަން ނުފެންނަ ކަމަށް ވޯޓު ދެއްވާފައި ވަނީ 16 މެންބަރެކެވެ. މި ގަރާރަށް ބަހުސްކުރުމާމެދު ވަކި ގޮތަކަށް ވޯޓު ދެއްވަން ނުފެންނަ ކަމަށް އެއް މެންބަރަކު ވޯޓު ދެއްވި އެވެ. ގަރާރަށް ބަހުސްކުރަން ވޯޓުދެއްވި މެންބަރުންގެ ތެރޭގައި އެމްޑީޕީގެ މެންބަރުން ހިމެނެއެވެ.

Advertisement

މީގެ އިތުރުން އެ ކުއްލި މައްސަލަ އަށް ބަހުސްކުރުމަށް އެދިވަޑައިގަތް ހުރިހާ މެންބަރުން ވާހަކަދެއްކުމާމެދު ގޮތެއް ނިންމުމަށް ނެގި ވޯޓުގައި ބަހުސް ނިމެންދެން ގަރާރުގެ މަސައްކަތް ކުރިއަށް ގެންދަނަވަން ނިންމެވީ 19 މެންބަރުންގެ ވޯޓާ އެކުގައެވެ. ގަރާރުގެ ބަހުސް ނިމެންދެން ކުރިއަށް ގެންދަން ނުފެންނަ ކަމަށް އެއްވެސް މެންބަރަކު ވޯޓުދެއްވާފައެއް ނުވެއެވެ. މި މައްސަލަ އަށް ބަހުސްކުރަމުން ބައެއް މެންބަރުން ވަނީ މިހާރު ގަވާއިދު އޮތް ގޮތާ މެދު ވަރަށް ބޮޑަށް ކަންބޮޑުވުން ފާޅުކޮށްފައެވެ. އަދި ގަރާރު ހުށަހެޅުއްވި މެންބަރު ހަސަން ލަތީފް ވަނީ އެ ގަރާރުގެ ބަހުސާ އެމްޑީޕީ އިން ދެކޮޅު ހަދަނީ އޭނާގެ ފިކުރު ހުރި ގޮތުން ކަމަށް ވެސް ވިދާޅުވެފައެވެ.

ގަރާރަށް ބަހުސްކުރި ބައެއް މެންބަރުން ވަނީ މިހާރު ގަވާއިދު އޮތް ގޮތުން ރާއްޖެ އަށް މަސްތުވާތަކެތި އެތެރެކުރުން ފަސޭހަވާ ކަމަށް ފާހަގަކުރައްވާ އެކަމާމެދު ކަންބޮޑުވުން ފާޅުކުރައްވާފައެެވެ.

އެމްޑީޕީގެ ޕީޖީ ގްރޫޕް އިން އެ ޕާޓީ އަށް ނިސްބަތްވާ މަޖިލީހުގެ މެންބަރުންނަށް ފޮނުވާފައިވާ މެސެޖެއްގައި ބުނެފައި ވަނީ އެ މައްސަލައާ ދެކޮޅަށް ވިޕްލައިނެއް ނެރެފައި ވަނީ، އެ މައްސަލަ ހުށަހަޅާފައި ވަނީ އެމްޑީޕީގެ ޕީޖީ ގްރޫޕްގެ މެންބަރަކު މަޖިލީހަށް އެއްވެސް މައްސަލަ އެއް ހުށަހަޅާނަމަ އަމަލުކުރުމަށް އޮންނަ އާއްމު އުސޫލާއި ޚިލާފަށް ކަމަށް ވާތީ ކަމަށެވެ.

މަޖިލީހަށް މައްސަލަ އެއް ހުށަހަޅާފައި މި ވަނީ ދާދި ފަހުން ވެސް މި ޤަވާއިދުގެ ދަށުން ބިދޭސީއަކު ފުރުވާލި މައްސަލައެއް ފެންމަތިވެފައިވާ ދަނޑިވަޅެއްގައެވެ. އެގޮތުން ވައިގެ މަގުން ރާއްޖެއަށް އެތެރެކުރި 2.6 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެ، އެތަކެތި ގެނަައި މީހާ ރާއްޖެ އެތެރެވިޔަ ނުދީ އަނބުރާ ވަނީ ފޮނުވާލާފައެވެ. އެކަމާއި ގުޅޭގޮތުން އާއްމުން ދަނީ ނުރުހުން ފާޅުކުރަމުންނެވެ.

މި އަހަރުގެ ޖެނުއަރީ މަހުގެ ތެރޭގައި އަމަލުކުރަން ފެށި އެ ގަވާއިދަކީ ވައިގެ މަގުން ދިވެހިރާއްޖެއަށް އަންނަ ބިދޭސީއަކު ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކު ކުރެވޭނަމަ، އެ ފަރާތެއް ރާއްޖެއަށް އެތެރެވުމަށް ހުއްދަ ދިނުމާއި ގުޅޭގޮތުން ގޮތެއް ކަނޑައެޅުމުގައި ކަމާބެހޭ ފަރާތްތަކާ ގުޅިގެން އަމަލުކުރާނެ ގޮތުގެ އުސޫލުތައް ބަޔާންކުރާ ޤަވާއިދެވެ.