ޑްރަގް ގެންނަ ބިދޭސީން ފުރުވާލެވޭ ޤަވާއިދު - ކުއްލި މައްސަލައާ ދެކޮޅަށް އެމްޑީޕީގެ ވިޕެއް
13 ފެބުރުއަރީ 2023 | ހޯމަ 05:41އެ ޤަވާއިދުގެ ސަބަބުން މަސްތުވާތަކެތި ޓްރެފިކްކުރާ ބިދޭސީންނަށް ފަސޭހަކަމާ އެކު ރާއްޖެ އާދެވޭ ކަމަށް ކުއްލި މައްސަލައިގައި ވަނީ ބުނެފައި
ރައްޔިތުންގެ މަޖިލީހުގެ ޖަލްސާގެ ތެރެއިން
ޑްރަގް އެތެރެކުރާ ބިދޭސީން ރާއްޖެ އެތެރެ ނުކޮށް އަނބުރާ ފޮނުވާލެވޭ ގޮތަށް ގަވާއިދު އިސްލާހުކުރުމާއި ގުޅިގެން ރައްޔިތުންގެ މަޖިލީހަށް ހުށަހަޅާފައިވާ ކުއްލި މައްސަލަ އާއި ދެކޮޅަށް އެމްޑީޕީ އިން ތްރީލައިން ވިޕެއް ނެރެފިއެވެ.
ޑްރަގް އެތެރެކުރާ ބިދޭސީން ރާއްޖެ އެތެރެނުކޮށް އަނބުރާ ފޮނުވާލެވޭ ގޮތަށް އުސޫލު ހަމަޖެހުނީ "ވައިގެ މަގުން ދިވެހިރާއްޖެ އަންނަ ބިދޭސީއަކު ދިވެހިރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވޭ ހާލަތްތަކުގައި އެ ފަރާތަކާމެދު ޢަމަލުކުރާނެގޮތުގެ ގަވާއިދު" އިސްލާހު ކުރުމާއި ގުޅިގެންނެވެ. އެކަމާއި ގުޅޭގޮތުން މަޖިލީހަސް ކުއްލި މައްސަލަ އެއް ހުށަހެޅުއްވީ ހެންވޭރު ހުޅަނގު ދާއިރާގެ މެންބަރު ޙަސަން ލަތީފެވެ. އެމްޑީޕީގެ ޕީޖީ ގްރޫޕް އިން އެ ޕާޓީ އަށް ނިސްބަތްވާ މަޖިލީހުގެ މެންބަރުންނަށް ފޮނުވާފައިވާ މެސެޖެއްގައި ބުނެފައި ވަނީ އެ މައްސަލައާ ދެކޮޅަށް ވިޕްލައިނެއް ނެރެފައި ވަނީ، އެ މައްސަލަ ހުށަހަޅާފައި ވަނީ އެމްޑީޕީގެ ޕީޖީ ގްރޫޕްގެ މެންބަރަކު މަޖިލީހަށް އެއްވެސް މައްސަލަ އެއް ހުށަހަޅާނަމަ އަމަލުކުރުމަށް އޮންނަ އާއްމު އުސޫލާއި ޚިލާފަށް ކަމަށް ވާތީ ކަމަށެވެ.
މަޖިލީހަށް މައްސަލަ އެއް ހުށަހަޅާފައި މި ވަނީ ދާދި ފަހުން ވެސް މި ޤަވާއިދުގެ ދަށުން ބިދޭސީއަކު ފުރުވާލި މައްސަލައެއް ފެންމަތިވެފައިވާ ދަނޑިވަޅެއްގައެވެ. އެގޮތުން ވައިގެ މަގުން ރާއްޖެއަށް އެތެރެކުރި 2.6 ކިލޯގެ މަސްތުވާތަކެތި ކަސްޓަމްސްއިން އަތުލައިގަނެ، އެތަކެތި ގެނަައި މީހާ ރާއްޖެ އެތެރެވިޔަ ނުދީ އަނބުރާ ވަނީ ފޮނުވާލާފައެވެ. އެކަމާއި ގުޅޭގޮތުން އާއްމުން ދަނީ ނުރުހުން ފާޅުކުރަމުންނެވެ.
ޑްރަގް އެތެރެކުރާ ބިދޭސީން ފޮނުވާލަނީ މައްސަލަ ސާބިތުކުރަން ހެކި ހުރި މިންވަރާއި، އެ މީހަކު ބެހެއްޓުމަށް ދާނެ ޚަރަދަށްވެސް ބަލާފައިކަން "ވައިގެ މަގުން ދިވެހިރާއްޖެ އަންނަ ބިދޭސީއަކު ދިވެހިރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވޭ ހާލަތްތަކުގައި އެ ފަރާތަކާމެދު ޢަމަލުކުރާނެގޮތުގެ ގަވާއިދު" ގައި ބަޔާންކޮށްފައިވެއެވެ. މި އަހަރުގެ ޖެނުއަރީ މަހުގެ ތެރޭގައި އަމަލުކުރަން ފެށި އެ ގަވާއިދަކީ ވައިގެ މަގުން ދިވެހިރާއްޖެއަށް އަންނަ ބިދޭސީއަކު ރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކު ކުރެވޭނަމަ، އެ ފަރާތެއް ރާއްޖެއަށް އެތެރެވުމަށް ހުއްދަ ދިނުމާއި ގުޅޭގޮތުން ގޮތެއް ކަނޑައެޅުމުގައި ކަމާބެހޭ ފަރާތްތަކާ ގުޅިގެން އަމަލުކުރާނެ ގޮތުގެ އުސޫލުތައް ބަޔާންކުރާ ޤަވާއިދެވެ.
މެންބަރު ހަސަން ލަތީފުގެ ކުއްލި މައްސަލައިގައި އެ ޤަވާއިދުގެ ސަބަބުން މަސްތުވާތަކެތި ޓްރެފިކްކުރާ ބިދޭސީންނަށް ފަސޭހަކަމާ އެކު އެއްވެސް ބިރެއް ނެތި ރާއްޖެ އާދެވޭ ކަމަށް ވިދާޅުވެފައިވެއެވެ. އަދި އެ ބަދަލުގެ ސަބަބުން އެ ވިޔަފާރިއަށް ހިތްވަރު ލިބޭ ކަމަށާއި އެ ގަވާއިދު ގައިވާ މަސްތުވާތަކެއްޗާ ބެހޭ ގާނޫނާ ތައާރުޒުވާ ބައިތައް އުނިކުރަން ޖެހޭކަމަށްވެސް ޙަސަން ލަތީފް ވިދާޅުވެފައިވެއެވެ.
