އެސްޓަން ވިލާ ބަލިކޮށް ޗެމްޕިއަން މެންޗެސްޓަރ ސިޓީން ފަރަގު ކުޑަކުރި ނަމަވެސް, އެއްވަނައިގައި އޮތް އާސެނަލްއާ ދެކޮޅަށް ކުޅޭ މެޗުގައި ހާލާންޑަށް ކުޅެވިދާނެކަމާމެދު ސުވާލު އުފެދިއްޖެއެވެ.

ހާލާންޑަށް ބުދަ ދުވަހު އާސެނަލްއާ ދެކޮޅަށް ކުޅެވިދާނެކަމާމެދު ސުވާލު އުފެދުނީ 3-1 ން އެސްޓަން ވިލާ އަތުން މޮޅުވި މެޗުގައި ލިބުނު އަނިޔާގެ ސަބަބުންނެވެ. އަނިޔާގެ ސަބަބުން ދެވަނަ ހާފްގެ ފުރަތަމަ މިނެޓުގައި ހާލާންޑް ވަނީ ބަދަލުކޮށްފައެވެ. އެކަމަކު އަނިޔާ ސީރިއަސް ނޫންކަމަށް ރިޕޯޓުތައް ބުނެއެވެ. ކޯޗު ޕެޕް ގާޑިއޯލާ ވެސް ބުނެފައިވަނީ އަނިޔާވިއިރު މެޗުގެ ނަތީޖާ ވެސް އޮތް ގޮތުން ޑޮކްޓަރާ ވާހަކަދެއްކުމަށްފަހު ރިސްކެއް ނަގަން ބޭނުންނުވީ ކަމަށެވެ. ހާލާންޑް ބަދަލުކުރީ ރިސްކު ނަގަން ބޭނުން ނުވާތީކަމަށާއި, ބޮޑު އަނިޔާއެއްވިކަމަށް ނުބެލެވޭކަމަށެވެ. ބުދަ ދުވަހު އާސެނަލްއާ ދެކޮޅަށް ހާލާންޑަށް ކުޅެވޭނެކަމަށް އުއްމީދުކުރާ ކަމަށާއި, އެކަމަކު ރަނގަޅު ނޫންނަމަ ރިސްކެއް ނަގައިގެން އެ މެޗުގައި ހާލާންޑް ލައްވާ ނުކުޅުވާނެކަމަށް ގާޑިއޯލާ ބުންޏެވެ.

އެސްޓަން ވިލާ އަތުން މޮޅުވި މެޗުގެ ފުރަތަމަ ހާފް ނިމުނުއިރު ސިޓީން ވަނީ ތިން ގޯލް ޖަހާފައެވެ. ގޯލްތައް ޖެހީ ރޮޑްރީއާއި ގުންޑޮގާންއާއި ރިޔާދު މާރޭޒްއެވެ. މާރޭޒް ލަނޑު ޖެހީ ފުރަތަމަ ހާފްގެ އިތުރު ވަގުތުގައި ލިބުނު ޕެނަލްޓީއަކުންނެެވެ. ދެވަނަ ހާފްގައި އެސްޓަން ވިލާގެ ހަމައެކަނި ލަނޑުޖެހީ ވަޓްކިންސްއެވެ.

މިމޮޅާއެކު ސިޓީން ވަނީ 22 މެޗުން 48 ޕޮއިންޓް ހޯދާފައެވެ. އެއްވަނައިގައި އާސެނަލް އޮތީ 21 މެޗުން 51 ޕޮއިންޓާއެކުއެވެ.