މުޒާހަރާ ކަވަރުކުރާ ނޫސްވެރިން ތަމްރީނުކުރަން މަޝްވަރާކޮށްފި
13 ފެބުރުއަރީ 2023 | ހޯމަ 02:48ނޫސްވެރިންނަށް އެއްވުންތައް ރޫޅާލަން އުޅޭއިރު އަނިޔާވާ ކަމަށް ތުހުމަތުކުރޭ
ބްރޯޑްކޮމް އާއި ފުލުހުންގެ ބައްދަލުވުމުގެ ތެރެއިން --
މުޒާހަރާތައް ކަވަރުކުރާ ނޫސްވެރިންނަށް ތަމްރީނު ޕްރޮގްރާމްތަކެއް ހިންގުމަށް މަޝްވަރާކުރުމަށް ޓަކައި މޯލްޑިވްސް ބްރޯޑްކާސްޓިން ކޮމިޝަން (ބްރޯޑްކޮމް)އިން އިއްޔެ ފުލުހުންނާ ބައްދަލުކޮށްފިއެވެ.
ބްރޯޑްކޮމްއިން ފުލުހުންނާ ބައްދަލުކުރުމަށްފަހު ކުރި ޓްވީޓުގައި ބުނީ ފުލުހުންނާއެކު އެފަދަ މަޝްވަރާއެއް ކުރީ މި ފަހުން ބޭއްވި އެއްވުމެއްގައި ބައެއް ނޫސްވެރިންނަށް އަނިޔާވެފައިވާތީ ކަމަށެވެ. އަދި ބައްދަލުވުމުގެ ބޭނުމަކީ އެކަން ހިނގައިދިޔަ ގޮތް ބެލުމާއި އެފަދަ ހާލަތްތަކުގައި ކަމާ ގުޅުންހުރި ފަރާތްތަކުން އަމަލުކުރަން ޖެހޭ ގޮތް ދެނެގަތުން ކަމަށެވެ.
"ވޭތުވެދިޔަ ހަފްތާގައި ބޭއްވި އެއްވުމެއް ފުލުހުން ރޫޅާލުމުގެ ތެރޭގައި ބައެއް ނޫސްވެރިންނަށް އަނިޔާވެފައިވާތީ، އެ ކަން ހިނގައިދިޔަ ގޮތް ބަލައި މިފަދަ ހާލަތްތަކުގައި ގުޅުންހުރި ފަރާތްތަކުން އަމަލުކުރަން ޖެހޭ ގޮތް ދެނެގަތުމާ ބެހޭގޮތުން ފުލުހުންގެ އިދާރާއާ ކޮމިޝަނުން މަޝްވަރާކޮށްފި،" ބްރޯޑްކޮމްގެ ޓްވީޓުގައި ވެއެވެ.
ބްރޯޑްކޮމް އިން ބުނީ އެއްވުންތަކާއި މުޒާހަރާތައް ކަވަރުކުރާ ނޫސްވެރިންނަށް އަމާޒުކޮށްގެން އެ އިދާރާއިން ގުޅިގެން ވަރަށް ހާއްސަ ތަމްރީނު ޕްރޮގްރާމެއް ހިންގުމާ ގުޅިގެން ވެސް މަޝްވަރާކޮށްފައިވާ ކަމަށެވެ.
