އަމީނީ މަގާއެކު 100 ގަޑިއިރު - އެމްޓީސީސީގެ މަސައްކަތް މެކުހަށް، ޗެލެންޖަށް ތައްޔާރު!

ދާދި އިހަކަށް ދުވަހާއި ޖެހެންދެން، މާލޭގެ އެންމެ ކާރުބާރު ބޮޑު އެއް މަގު ކަމަށްވާ އަމީނީ މަގު އޮތީ އެ މަގަކާއި ގުޅުން ހުރި ތަކުލީފުތައް ގިނަ ތަނެއްގެ ގޮތުގައެވެ. އެ މަގުގައި ފެން ބޮޑުވުމާއި ވަޅުގަނޑު ހެދުން ފަދަ އެތައް ތުރާލަކާއި ދިވެހިންނަށް ކުރިމަތިލާންޖެހުނެވެ. ކަން އެހެން އޮއްވާ އަމީނީ މަގު ހެދުމުގެ މަސައްކަތް މި ސަރުކާރުން ފަށާފައި ވަނީ މާލޭގެ ސްޓްރީޓް ސްކޭޕިންގް ޕްރޮޖެކްޓުގެ ދަށުންނެވެ. އެ ޕްރޮޖެކްޓުގެ ދަށުން އަމީނީ މަގުގައި ތާރުއަޅާ ޒަމާނީ ފެންވަރަށް ތަރައްޤީކުރުމުގެ މަޝްރޫޢު ޕްލޭނިންގ މިނިސްޓްރީން ރޯޑް ޑިވަލޮޕްމަންޓް ކޯޕަރޭޝަން، އާރު.ޑީ.ސީއާ ޙަވާލުކޮށްފައިވަނީ 3 ޖުލައި 2022ގައެވެ.

84.4 މިލިޔަން ރުފިޔާ ޚަރަދުވާ މި ޕްރޮޖެކްޓުގެ މަސައްކަތަކީ އާއްމުންގެ އުންމީދާއި ގުޅިފައިވާ މުހިންމު މަސައްކަތެކެވެ. އެހެންކަމަށް ވާއިރު، އާރްޑީސީ އަށް އަމީނީ މަގު ހެދުމަށް ބޮޑެތި ގޮންޖެހުންތަކާއި ކުރިމަތިލާން ޖެހުނެވެ. އެގޮތުން އަމީނީ މަގުގައި ހުރި ބޮޑެތި ގަސްތަކުގެ މޫތައް ނެގުމާއި، މަގު އަޑީގައި އަޅާފައި އޮތް ހޮޅިތައް އަލުން އެއްވަރުކުރަން މަސައްކަތް ކުރަން ޖެހުމުން އެ މަސައްކަތް ދިގުލައިގެން ދާން މެދުވެރިވިއެވެ.

ނިމިދިޔަ ބުރާސްފަތި ދުވަހުގެ ރޭ އާރްޑީސީ އިން އަމީނީ މަގުގެ މަސައްކަތުގެ ސްކޯޕް އިން ބައެއް އެމްޓީސީސީއާ ވަނީ ހަވާލުކޮށްފައެވެ. އަދި އެ މަސައްކަތް ހަވާލުކުރުމާއެކު އެމްޓީސީސީ އިން ވަނީ އަމީނީ މަގުގެ މަސައްކަތްތައް ވިލަރެސްކުރާނެ ގޮތުގެ އިންތިޒާމްތައް ހަމަޖައްސަން ފަށާފައެވެ. އެގޮތުން ޖެހިގެން އައި ހުކުރު ދުވަހު އެމްޓީސީސީ އިން އަމީނީ މަގުގެ އަމަލީ މަސައްކަތް ފެށީ މިއީ ރައްޔިތުންނާއި ގުޅުން ހުރި މުހިންމު ޚިދުމަތަކަށް ވުމުން އެއީ ޗެލެންޗެއްގެ ގޮތުގައި ދެކިގެން ކަަމަށް އެ ކުންފުނިން ބުނެއެވެ. އެކި ފަންތީގެ މުވައްޒަފުން ހިމެނޭހެން އެކުލަވާލި 60 މީހުންގެ ޓީމާކާއެކު އަމީނީ މަގުގެ މަސައްކަތްތައް ނިންމަން އެމްޓީސީސީ އިން މަސައްކަތްކުރަމުން ދަނީ މެދުނުކެނޑި 24 ގަޑިއިރު އެ މަސައްކަތް ކުރިއަށް ގެންދާގޮތަށެވެ. ދެ ދަންފަޅި އަކަށް ބަހާލައިގެން އެ މަސައްކަތްތައް ކުރިއަށް ރާވާފައި ވަނީ ހަލުވި އެހެނަސް އިތުބާރު ހުރި ކޮލިޓީ ޚިދުމަތެއް ޤާއިމްކޮށްދިނުމުގެ އުންމީދާއި އެކުގައެވެ.

އެމްޓީސީސީގެ ސީއީއޯ އާދަމް އާޒިމް ވިދާޅުވީ ރައްޔިތުންނާއި ގުޅުން ހުރި ކަންކަމުގައި 24 ގަޑިއިރު މަސައްކަތްކޮށް، މަސައްކަތުގެ ސްޕީޑް އަވަސްކުރުމަކީ އެމްޓީސީސީ އިން އިސްކަން ދޭން ކަމެއް ކަމަށެވެ. މިހާތަނަށް އައި އިރު ކުރި މަސައްކަތްތަކުގެ ތެރޭގައި އެމްޓީސީސީއާ ހަވާލުކޮށްފައިވާ ހިސާބުގެ މަގު އެއްވަރުކޮށް ނިންމާ، މަގު ހަރުކޮށް، އޭބީސީގެ މަސައްކަތް ވަނީ ފަށާފައެވެ. އެ މަސައްކަތް ކުރިއަށް އޮތް ދެ ދުވަސް ތެރޭގައި ނިމޭނެ ކަަމަށާއި، ބުދަ ދުވަހުގެ ނިޔަލަށް އެމްޓީސީސީއާ ހަވާލުކުރި މަސައްކަތް ނިންމަން އަމާޒު ހިފާފައިވާ ކަަމަށް ވެސް އޭނާ ވިދާޅުވިއެވެ.

އެމްޓީސީސީއާ އެ މަސައްކަތް ހަވާލުކުރި އިރު ފެންހިންދާ ނިޒާމާއި، ކޭބަލް އެޅުން ފަދަ މަސައްކަތްތައް އާރްޑީސީގެ ފަރާތުން ވަނީ ނިންމާފައެވެ. މަގުގެ ޚިދުމަތަށް ބޭނުންވާ އަންޑަގްރައުންޑް މަސައްކަތް ނިންމާ އެމްޓީސީސީއާ ހަވާލުކޮށްފައި ވަނީ އުޅަނދުތައް ދުއްވާ ހިސާބުގައި ހުރި މަސައްކަތްތަކެވެ. ހަތް ދުވަހުގެ ތެރޭގައި ނިންމާ ގޮތަށް އެމްޓީސީސީ އިން ކުރަން ޖެހޭ މަސައްކަތަކީ މުޅި އަމީނީ މަގު ތަރައްޤީކުރުމުގެ އިންތިހާ މުހިންމު މަސައްކަތެކެވެ. އެ މަސައްކަތް ކުރުމުގައި މިހާތަނަށް އެމްޓީސީސީ އިން އަމަލުކުރި ގޮތާއި، މަސައްކަތްތައް ކުރިއަށް ރާވާފައިވާ ގޮތުގެ ތަފްސީލް "ރާއްޖެ އެމްވީ" އާއި ހިއްސާކޮށްދެއްވީ އެ ކުންފުނީގެ ޖެނެރަލް މެނޭޖަރ ރަމްޒީ އަބޫބަކުރެވެ. އޭނާ ވަނީ އަމާޒަކީ 100 ގަޑިއިރަށް ވުރެ ކުރު މުއްދަތެއްގެ ތެރޭގައި އެމްޓީސީސީއާ ހަވާލުކޮށްފައިވާ ހުރިހާ މަސައްކަތެއް ނިންމުން ކަމަށް ވިދާޅުވެފައެވެ. އަދި އެ މަސައްކަތް ކުރާ އިރު އާރްޑިސީ އިން ކަނޑައަޅާފައިވާ ސްޓޭންޑަޑަށް މަސައްކަތް ކުރާކަން ޔަގީންކުރަމުންދާނެ ކަމަށް ވެސް އޭނާ ވިދާޅުވިއެވެ.

އަމީނީ މަގުގެ މަސައްކަތް ކުރަމުންދަނީ ޖުމްލަ 13 ސެގްމަންޓަކަށް ބަހާލައިގެންނެވެ. އެގޮތުން މިހާރު ކުރިއަށްދަނީ ސެގްމެންޓް 4ގައި ފެނާއި ނަރުދަމާ އެޅުމުގެ މަސައްކަތްތައްކަމަށް އާރުޑީސީން ވަނީ ބުނެފައެވެ. އަދި އަމާޒަކީ ސެޕްޓެމްބަރުމަހަށް އަމީނީ މަގުގައި ތާރުއަޅާ އެއްކޮށް ނިންމުން ކަމަށް އެ ކުންފުނިން ބުނެއެވެ.