ސޫރިޔާއާއި ތުރުކީވިލާތް ހިއްސާކުރާ ބޯޑަރު ސަރަޙައްދަށް ފެބުރުއަރީ 6 ވަނަ ދުވަހު އައި ބާރުގަދަ ބިންހެލުމަކީ، ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަމަށްފަހު އެންމެ ގިނަ ބައެއްގެ ހިތަށް އެންމެ ދަތިކުރުވި ޤުދުރަތީ އެއް ކާރިޘާ ކަމުގައި ދެންނެވިދާނެއެވެ. ބިންހެލުމުގައި މަރުވި މީހުންގެ ޢަދަދު، ބަލަބަލާ ހުއްޓާ، ހާސްހާހުން އިތުރު ވަމުން ދާއިރު، ބިންހެލުމުގެ އަސަރު އެންމެ ބޮޑަށް ފޯރި އެއް ޤައުމު ކަމަށް ވާ ސޫރިޔާގެ ރައްޔިތުންނަކީ، ދާޚިލީ ހަނގުރާމައިގެ ވޭނުން އަދިވެސް އަރައިނުގަނެވި ތިބި ބައެކެވެ. ބޮމާއި ބަޑީގެ އަޑުފަށްގަނޑަށް ހޭނިފައި ވީ ނަމަވެސް، މިފަދަ ކާރިޘާއަކަށް ސޫރިޔާގެ ރައްޔިތުންވެސް ތައްޔާރެއް ނޫނެވެ. އެ މަންޒަރުތައް ފެނުނު ކޮންމެ މީހެއްގެ ލޮލުން ކަރުނަ ފާޢްދާލާހާ ހިތްދައްޗެވެ.
ފެބުރިއަރީ 6 ވަނަ ދުވަހުގެ ބިންހެލުމުގައި އެންމެ ބޮޑު އަސަރެއް ފޯރި އެއް ސަރަހައްދު ކަމަށް ވާ ސޫރިޔާގެ 2 ވަނަ އަށް އެންމެ ބޮޑު ސިޓީ ނުވަތަ ޙަލަބަށް ޒިޔާރަތް ކުރެއްވި، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ޑައިރެކްޓަރ ޖެނެރަލް، ޑރ ޓެޑްރޯޒް އެޑަނޮމް ގެބްރިޔޭސޫސްގެ ވާހަކަތަކުންވެސް އެކަން ސާބިތުވެއެވެ. ފެބުރުއަރީ 11 ވަނަ ދުވަހު ޙަލަބަށް ޒިޔާރަތް ކުރެއްވުމަށްފަހު ޑރ ޓެޑްރޯޒް ވިދާޅުވީ، އެ ސަރަޙައްދުގެ މަސްރަހު އޮތް ގޮތުން "ހިތް ހަލާކު"ވެއްޖެ ކަމަށެވެ.
ލިބިފަ ހުރި ގެއްލުންތަކާއި މީހުންނަށް ކޮށްފައިވާ އަސަރު ފެނިފަ ހިތް ހަލާކުވެއްޖެ. އަހަރަމެން، އެހީ ހިފައިގެން މިތަނަށް މި އައީ މިއަދު. ކުރިއަށް ހުރި ދުވަސްތަކުގަވެސް އެހީ ލިބެމުން ދާނެ ކަމަށް ޢުއްމީދު މި ކުރަނީ.ޑރ ޓެޑްރޯޒް އެޑަނޮމް ގެބްރިޔޭސޫސް؛ ޑަބްލިއުއެޗްއޯގެ ޑައިރެކްޓަރ ޖެނެރަލް
ބިންހެލުމުގައި ޒަޚަމްވި ގިނަ ޢަދަދެއްގެ ބަޔަކަށް ފަރުވާ ދެމުންދާ އަލް-ރާޒީ ހޮސްޕިޓަލުގެ ބޭރުގައި، ސޫރިޔާގެ ސިއްހަތާ ބެހޭ ވަޒީރު ހަސަން ޣައްބާޝްއެކީ ހުންނަވައިގެން ޑރ ޓެޑްރޯޒް ވަނީ ބައިނަލްއަޤުވާމީ މީޑިއާއާ ވާހަކަދައްކަވާފައެވެ. އެގޮތުން ޑރ ޓެޑްރޯޒް ވަނީ، ސޫރިޔާގެ ސަރުކާރާ ދެކޮޅަށް އެމެރިކާއިން ތަންފީޒު ކުރަމުންދާ ދަތިކުރުމުގެ ފިޔަވަޅުތައް، 180 ދުވަހުގެ މުއްދަތަކަށް މެދުކަނޑާލުމަށް އެމެރިކާ ސަރުކާރުން ނިންމި ނިންމުމަށް މަރުހަބާ ވިދާޅުވެފައެވެ. އެމެރިކާގެ އެ ނިންމުމަކީ ބިންހެލުމާ ގުޅިގެން އެހީ ފޯރުކޮށްދިނުމަށް ލިބޭ ބޮޑު ލުޔަކަށް ވާނެ ކަމަށް ޑރ ޓެޑްރޯޒް ވަނީ ފާހަގަ ކުރައްވާފައެވެ.
180 ދުވަހުގެ ފުރުޞަތެއް އޮތްހެން ހީވަނީ. މަރުޙަބާ ކިއަން އެކަމަށް. ކުއްލި ހާލަތުގެ އެހީއަށް، އެކަމުން އެހީ ލިބޭނެ ކަމަށް ޢުއްމީދު ކުރެވެނީ.ޑރ ޓެޑްރޯޒް އެޑަނޮމް ގެބްރިޔޭސޫސް؛ ޑަބްލިއުއެޗްއޯގެ ޑައިރެކްޓަރ ޖެނެރަލް
ޑރ ޓެޑްރޯޒް ވިދާލުވީ ޙަލަބަށް ބޭނުންވާ އެހީގެ ސަޕްލައިގެ ޝިޕްމަންޓެއް، ހޮނިހިރު ދުވަހުގެ ވަޤުތެއްގައި އެ ސިޓީއަށް އެތެރެ ކޮށްފައި ވާ ކަމަށާ، ކުރިއަށް ހުރި ދުވަސްތަކުގައި އިތުރު ޝިޕްމަންޓްތައް ލިބެމުން ދާނެ ކަމަށެވެ.
ފެބުރުއަރީ 6 ވަނަ ދުވަހުގެ ބިންހެލުމުގައި ހާލުގައި ޖެހިފައިވާ ފަރާތްތަކަށް އެހީ ހިފައިގެން ދަތުރު ކުރާ ގިނަ ޢަދަދެއްގެ މަތިންދާބޯޓުތައް، ސޫރިޔާގެ ސަރުކާރުގެ ކޮންޓްރޯލް އޮތް ސަރަޙައްދުތަކަށް ތިރި ކުރި ކަމުގައި ވީ ނަމަވެސް، އިދިކޮޅު ފަރާތްތަކުގެ ކޮންޓްރޯލްގެ ދަށުގައިވާ ހިސާބުތަކަށް ލިބެމުން ދަނީ، ނިސްބަތުން މަދު މިންވަރެއްގެ އެހީ ކަމަށް ޚަބަރު ލިބެއެވެ.
