އެސްޓީއޯއިން ޖެނުއަރީ މަހު 89،000 އަށްވުރެ ގިނަ ބަސްތާގެ ކާޑު ފޯރުކޮށްދިން

އެސްޓީއޯއިން ފާއިތުވި ޖެނުއަރީ މަހު 89000 އަށްވުރެ ގިނަ ބަސްތާގެ ކާޑު އެކި ސަރަހައްދުތަކަށް ފޮނުވާފައިވާ ކަމަށް އެ ކުންފުނިން ބުނެފިއެވެ.

އެ ކުންފުނިން ބުނީ ރާއްޖޭގެ ރަށްތަކަށް ކާޑުގެ ބާވަތްތައް ހުސްނުވެ ލިބޭނެ އިންތިޒާމް ހަމަޖެއްސާދިނުމަށް އެ ކުންފުނިން ޚާއްސަ އިސްކަމެއް ދޭ ކަމަށެވެ. އެގޮތުން ކުރަމުންދާ މަސައްކަތުގެ ދަށުން މިދިޔަމަހު މާލެ ހިމެނޭހެން ރާއްޖޭގެ އެކި ސަރަހައްދުތަކަށް 89909 ބަސްތާ ކާޑު ފޮނުވާފައިވާކަމަށް އެސްޓީއޯ އިން ވަނީ ބުނެފައެވެ. އެސްޓީއޯ އިން ހާމަކޮށްފައިވާ ތަފްސީލްތަކުން އެނގޭ ގޮތުގައި އެ ކުންފުނިން ވަނީ މިދިޔަ މަހު 33298 ބަސްތާގެ ގޮނދަން ފުށް، 14928 ހަކުރު ބަސްތާ، 41683 ބަސްތާ ހަނޑޫ ވިއްކާފައެވެ.

އެ ކުންފުނިން ބުނިގޮތުގައި މިދިޔަ މަހު މާލެ ސަރަހައްދުން ލިބުނީ 1601 އޯޑަރެވެ. އެސްޓީއޯ އިން ބުނީ މިދިޔަ މަހު އެކުންފުނީގެ 9 ރީޖަނަލް ފިހާރައަކަށް ކާޑުގެ ބާވަތްތައް ފޯރުކޮށްދީފައިވާ ކަމަށެވެ. އެގޮތުން މިދިޔަ މަހުގެތެރޭ 24152 ބަސްތާ ހަނޑުލާއި، 7893 ބަސްތާ ހަކުރާއި 19595 ބަސްތާ ފުށް އެ ތަންތަަނަށް ފޯރުކޮށްދީފައިވާ ކަމަށް ކުންފުނީގެ ތަފާސްހިސާބުތަކުން އެނގެއެވެ. އެސްޓީއޯއިން ދަނީ އަތޮޅުތެރޭގައި ތިބި އެކުންފުނީގެ އެޖެންޓުން މެދުކޮށްވެސް ރަށްރަށަށް ބޭނުންވާ ކާޑުގެ ބާވަތްތައް ފޯރުކޮށްދެމުންކަމަށް އެ ކުންފުނިން ވަނީ ބުނެފައެވެ. އެގޮތުން މިހާރު އެ ކުންފުނީގެ 578 ކާޑު އެޖެންޓުން އެބަތިބި ކަމަށް ވެސް އެސްޓީއޯ އިން ބުނެއެވެ.