ރެއާލް މެޑްރިޑުން ކްލަބް ވަރލްޑްކަޕް ކާމިޔާބުކޮށްފި

ރެއާލް މެޑްރިޑުން ފީފާ ކްލަބް ވަރލްޑްކަޕް ކާމިޔާބުކޮށްފިއެވެ.

ފީފާ ކްލަބް ވަރލްޑްކަޕް ފަސްވަނަ ފަހަރަށް ރެއާލްއިން ކާމިޔާބުކުރީ ފައިނަލްގައި 5-3 ން އޭޝިޔާގެ ޗެމްޕިއަން އަލް ހިލާލް ބަލިކޮށްގެންނެވެ. ފައިނަލް މެޗުގައި ރެއާލްގެ ބްރެޒިލް ފޯވާޑް ވިނީޝިއުސް ޖޫނިއަރއާއި ވަލްވާޑޭ ކުރެ ކޮންމެ ކުޅުންތެރިއަކު ދެ ލަނޑު ޖެހިއެވެ. އަދި ދެން ލަނޑުޖެހީ ކެޕްޓަން ބެންޒެމާއެވެ. ރެއާލްގެ ފުރަތަމަ ލަނޑު ޖަހަން ވިނީޝިއުސް ޖޫނިއަރއަށް ފުރުޞަތު ތަނަވަސްކޮށްދިނީ ބެންޒެމާއެވެ. އަދި ބެންޒެމާ ލަނޑުޖަހަން ފުރުޞަތު ތަނަވަސްކޮށްދިނީ ވިނީޝިއުސް ޖޫނިއާއެވެ. ސައުދީ އަރަބިޔާގެ އަލް ހިލާލްގެ ތިން ގޯލް ޖެހީ މަރޭގާއާއި, ވިއޭޓޯއެވެ. ވިއޭޓޯ ދެ ގޯލް ޖެހިއެވެ. ވިއެޓޯއަކީ ކުރިން ޕްރިމިއަރ ލީގުގެ ފުލަމްއަށް ކުޅުނު ކުޅުންތެރިއެކެވެ.

މިދިޔަ އަހަރު މިމުބާރާތް ކާމިޔާބުކުރީ ޗެލްސީއެވެ. 2025 ވަނަ އަހަރުން ފެށިގެން މުބާރާތުގައި 32 ޓީމް ވާދަކުރާ ގޮތަށް ބަދަލުކޮށް, ކޮންމެ ހަތަރު އަހަރަކުން ބޭއްވުމުގެ ވިސްނުން ފީފާއިން ގެންގުޅެއެވެ.