ދުވާލުގެ ވަގުތުގައި މާލޭގައި ފާޅުކަންބޮޑު ގޮތެއްގައި ޒުވާނަކު މަސްތުވާތަކެތި ވިއްކާ މަންޒަރު އާއްމުވެފައި ވަނިކޮށް، އެ ވީޑިއޯއިން ފެންނަ ޒުވާނާ ހައްޔަރުކޮށްފިއެވެ.
ސޯޝަލް މީޑީއާގައި އާއްމުވެފައިވާ ވީޑިއޯއެއްގައި ފެނިގެންދަނީ މަސްތުވާތަކެތި ކަމަށް ބެލެވޭ އެއްޗެއް ވިއްކާ މަންޒަރެވެ. އެ ވީޑިއޯއިން ފެންނަ މީހާ ހުކުރު ދުވަހުގެ ރޭ ހައްޔަރުކޮށްފައިވާކަމަށް ފުލުހުން ބުނެއެވެ. ހައްޔަރުކޮށްފައިވާ މީހާ އަކީ 25 އަހަރުގެ ދިވެހި ފިރިހެނެއް ކަމަށްވެސް ފުލުހުން ބުނެއެވެ. ފުލުހުން ބުނީ އޭނާ ހައްޔަރުކޮށް، ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން 15 ދުވަހުގެ ބަންދުގެ މުއްދަތެއް ކްރިމިނަލް ކޯޓުން ޖަހައިދީފައިވާކަމަށެވެ.
މީގެ އިތުރުން އޭނާ މަސްތުވާތަކެތި ވިއްކި މައްސަލަ ފުލުހުން މިހާރު ތަހުގީގުކުރާ ކަމަށް ފުލުހުން ވަނީ ބުނެފައެވެ. ސޯޝަލް މީޑިއާގައި ދައުރުވަމުންދާ ވީޑިއޯގައި، 3 މީހަކު މަސްތުވާތަކެތީގެ ވިޔަފާރި ކުރާމަންޒަރު ފެނެއެވެ. އެ ވީޑިއޯއިން ފެންނަނީ ސައިކަލެއްގައި އިން މީހަކު ސަތޭކަ ރުފިޔާ ދިއްކޮށްލުމުން، އެހެން ސައިކަލެއް މަތީގައި އިން މީހަަކަށް ޕެކެޓެއްގައި ހުރި އެއްޗެއް ދޭ ތަނެވެ. އެ ވީޑިއޯއިން އިތުރު މީހަކުވެސް އެތަނަށް ގޮސް މަސްތުވާތަކެތި ގަންނަ މަންޒަރު ފެނެއެވެ.
