ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އަކީ ލާމަސީލު މިސާލެއްކަން ކަޅާއި ހުދުން ފެންނަން އެބައޮތް ކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރު އަހުމަދު ސައީދު މުހައްމަދު ވިދާޅުވެއްޖެއެވެ.
ކުޑަގިރި ޕިކްނިކް އައިލެންޑް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ސައީދު ވިދާޅުވީ ރައްޔިތުންނަށް ރައީސް ވެވަޑައިގެންނެވި ވައުދު ފުއްދާ ނިމިއްޖެ ކަމަށެވެ. މި ރަށް ފަރުމާކޮށްފައިވަނީ ރައްޔިތުންނަށް ހިތްހަމަޖެހުމާއި އުފާ ފާގަތިކަން ގެނެސްދެވޭނެ ރަނގަޅު މާހައުލެއް ދެމެހެއްޓޭނެ ގޮތަށް ކަމަށް ވެސް ވިދާޅުވިއެވެ.
ކޮންމެ މަހަކު ކަހަލަގޮތަކަށް ރައީސް އެ ރަށަށް ވަޑައިގަތް ކަމަށާއި އަމަލީ ގޮތުން މަސައްކަތުގައި ބައިވެރިވެވަޑައިގެންނެވި ކަމަށް ވެސް ސައީދު ވިދާޅުވިއެވެ. އަދި ކުޑަގިރީގެ މަސައްކަތް ކުރިއަށްދިޔަ ގޮތް ރައީސް ގާތުން ބައްލަވަމުން ގެންދެވި ކަމަށް ވެސް ވިދާޅުވިއެވެ.
ޕްރޮޖެކްޓް ކާމިޔާބުކަމާއެކު ނިންމާލެވުނީ ނައިބުރައީސްގެ މުރާލި މަސައްކަތްޕުޅުން ކަމަށް ވެސް ސައީދު ވިދާޅުވިއެވެ.
ރައީސް އަކީ ހުޅަނގަށް ކަނޑަޖަހާ އިރުވަޔަށް ދިޔަދޮވި ނޫނީ ތޮށަލި އަޅާ ބޭފުޅެއް ނޫންކަން ފާހަގަކުރައްވާ ސައީދު ވިދާޅުވީ ރައީސް އަކީ ބިންގާ ނާޅުއްވާ ބޭފުޅެއް ކަމަށާއި ތަކުރާރުކޮށް އެދިވަޑައިގަތުމުން ވެސް އެކަން ނުކުރެއްވި ކަމަށެވެ. އަދި އެމަނިކުފާނަކީ އަބަދުވެސް ރިބަން ކަނޑުއްވާ ބޭފުޅެއް ކަމަށް ވިދާޅުވިއެވެ.
މިފަދަ ރައީސެއް ދެވަނަ ދައުރަށް ނުގެނެވޭނަމަ އެއީ ލިބޭނެ އެންމެ ބޮޑު ހިތާމަ ކަމަށް ވެސް ވިދާޅުވިއެވެ. ރައީސް އެކަހެރި ކުރަން މަސައްކަތް ކުރުމުގެ ބޭނުމެއް ނެތްކަން ފާހަގަކުރައްވާ ސައީދު ވިދާޅުވީ އެގޮތަށް މަސައްކަތް ކުރާ މީހުން އެކަން ކުރަނީ ހަމައެކަނި ޒާތީ ހަސަދަވެރިކަމުގެ ސަބަބުން ކަމަށެވެ.
