ހަތް މެޗަށްފަހު އޭސީ މިލާނަށް މޮޅެއް

ހަތް މެޗަށްފަހު އޭސީ މިލާން މެޗަކުން މޮޅުވެއްޖެއެވެ.

މޮޅެއް ނުލިބި ދިޔަ ހަތް މެޗަށްފަހު އޭސީ މިލާން މޮޅުވީ އިޓާލިއަން ސެރީ އޭގައި ޓޮރިނޯ އަތުންނެވެ. މެޗުން މިލާން މޮޅުވީ 1-0 ނެވެ. ހަމައެކަނި ލަނޑު ޖެހީ ފްރާންސް ފޯވާޑް ޖިރޫޑްއެވެ. ތިއޯ ހެނާންޑޭޒް ނަގައިދިން ހުރަސް ޖިރޫ ގޯލަސް ފޮނުވާލީ ބޮލުންނެވެ. މެޗުގައި ލީޑް ފުޅާކުރަން އެންމެ ރަނގަޅު ފުރުޞަތެއް ލިބުނީ ތިއޯ ހެނަންޑޭޒްއަށެވެ. މިމޮޅާއެކު މިލާން ވަނީ ލީގު ތާވަލްގައި ހަވަނައިން ތިންވަނައަށް ޖެހިލާފައެވެ. އެކަމަކު އެއްވަނާގައި އޮތް ނަޕޯލީއާ ދެމެދު 15 ޕޮއިންޓްގެ ފަރަގެއް އެބައޮތެވެ. މިމެޗުގެ ސްކޮޑްގައި 41 އަހަރުގެ ފޯވާޑް އިބްރަހޮމްވިޗް ހިމެނިއެވެ. އަނިޔާއަށްފަހު އެނބުރި އައިސް ޓީމާ ގުޅުނު ނަމަވެސް މެޗުން 41 އަހަރުގެ ފޯވާޑަށް ފުރުޞަތެއް ނުދެއެވެ.

މިމެޗުގެ ކުރިން މިލާން އެންމެ ފަހުން މޮޅުވީ ޖެނުއަރީ 4 ވަނަ ދުވަހުއެވެ. ރޭގެ މެޗުގެ ކުރިން އޭސީ މިލާން ވަނީ ކޮޕާ އިޓާލިއާގައި ޓޮރިނޯ އަތުން ބަލިވެފައެވެ. އިޓާލިއަން ސުޕަރ ކަޕްގައި އިންޓަރ މިލާން އަތުން 3-0 ން ބަލިވިއެވެ. ލާޒިއޯއާއި ސަސުއޯލޯ އަތުންވެސް ބޮޑު ތަފާތަކުން ބަލިވިއެވެ.

އޭސީ މިލާން މިހާރު ލީގު ތާވަލްގެ ތިންވަނާގައި އޮތީ 22 މެޗުން 41 ޕޮއިންޓާއެކުއެވެ. ދެވަނާގައި އިންޓަރ މިލާން އޮތީ 21 މެޗުން 43 ޕޮއިންޓާއެކުއެވެ.