ތަޙުޤީޤީ މަރުޙަލާތަކުގައި ހިމެނޭ މުއައްސަސާތަކުގެ މެދުގައި މިހާރަށްވުރެ ބަދަހި ގުޅުމެއް އުފެއްދުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިލްތިމާސްކުރައްވައިފިއެވެ.

ޤަޟާއީ އަހަރު 2023 ފެށުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ޞާލިހު ވިދާޅުވީ ޢަދުލު އިންޞާފު ޤާއިމުކުރުމަކީ ހަމައެކަނި ކޯޓު މަރުޙަލާތަކުން ޙާޞިލުވާ ކަމެއް ނޫން ކަމަށެވެ. ޢަދުލު އިންޞާފުގެ ދާއިރާ އެއަށްވުރެ މާ ފުޅާ ކަމަށާއި، އެއީ މުޅި ދައުލަތުގެ ޒިންމާއެއް ކަމަށެވެ. އެއީ ދައުލަތުގެ ތިން ބާރުން ކުރެވޭ މަސައްކަތުން ޤާއިމުކުރެވޭ އެއްޗެއް ކަމަށް ރައީސް ވިދާޅުވިއެވެ.

ތަޙުޤީޤީ މަރުޙަލާއިން ފެށިގެން، ދަޢުވާ ކުރުމާއި ނިޔާ ކަނޑައެޅުމާ ދެމެދު ކަޑައްތުކުރާ ހުރިހާ މަރުޙަލާތަކަކީވެސް ޢަދުލު އިންޞާފު ޤާއިމުކުރުމުގެ ވަރަށް މުހިންމު މަރުޙަލާތަކެއް ކަމަށް ރައީސް ވިދާޅުވިއެވެ. އަދި ރައްޔިތުންގެ ހިތްތަކުގައި އިތުބާރާއި ޔަޤީންކަން އުފެއްދުމަށްޓަކައި، ތަޙުޤީޤީ މަރުޙަލާތަކުގައި ހިމެނޭ މުއައްސަސާތަކުގެ މެދުގައި މިހާރަށްވުރެ ބަދަހި ގުޅުމެއް އުފެއްދުމަށް ރައީސް އިލްތިމާސްކުރެއްވިއެވެ.

ޢަދުލު އިންޞާފު ލިބުމަކީ، ދައުލަތުގެ ދުސްތޫރުން ޙިމާޔަތާއި ރައްކާތެރިކަން ލިބިގެން، އެ ޤައުމެއްގެ ދިދައިގެ ހިޔަލުގައި ވެގެންއުޅޭ ކޮންމެ މީހަކަށްމެ، އެ މީހެއްގެ ޙައްޤުތައް ފުރިހަމައަށް ލިބިދިނުން ކަމަށް ރައީސް ވިދާޅުވިއެވެ. އަދި ޢަދުލު އިންޞާފު ލިބުމަކީ، ބޯހިޔާވަހިކަމުން ވެސް، ޞިއްޙަތު ސަލާމަތް ކުރުމުގައިވެސް، އަދި ތަޢުލީމު ހޯދުމުގައިވެސް އެ މީހަކަށް ޙައްޤު މިންވަރު ލިބުން ކަމަށް ރައީސް ވިދާޅުވިއެވެ. އަދި މާތް ﷲގެ ވާގިފުޅާއެކު، މިދިޔަ ހަތަރު އަހަރުގެ ތެރޭގައި ކުރަމުން އައީ އެ މަސައްކަތް ކަމަށް ރައީސް ވިދާޅުވިއެވެ.

ރައީސް ވިދާޅުވީ އެމަނިކުފާނުގެ އުއްމީދަކީ، ޝަރުޢީ ދާއިރާ އިޞްލާޙްކޮށް ހަރުދަނާ ކުރުމަށް ސަރުކާރާއި ޝަރުޢީ ދާއިރާއިން ކުރަމުން މި އަންނަ މަސައްކަތުގެ ސަބަބުން ރައްޔިތުންގެ ހިތްތަކުގައި ރާއްޖޭގެ ފަނޑިޔާރުގެއާ މެދު އިތުބާރާއި ޔަޤީންކަން އުފެދިގެން ދިއުން ކަމަށެވެ. އަދި ޢަދުލު އިންޞާފާ ގުޅޭ އެންމެހައި މައްސަލަތައް، ހުރިހާ މަރުޙަލާތަކަކުން ވީހާވެސް އަވަހަކަށް ނިމި، ރައްޔިތުންގެ މެދުގައި ޢަދުލު އިންޞާފު ޤާއިމުވެގެން ދިއުން ކަމަށް ރައީސް ވިދާޅުވިއެވެ.