ސޮނީ ސްޕޯރޓްސް ގޯލްޑަން ފުޓްސަލް ޗެލެންޖްގައި ހދ.ނޭކުރެންދޫން 11 ލަނޑުގެ މޮޅެއް ހޯދައިފިއެވެ. ހދ.އަތޮޅު ބުރުގައި ނޭކުރެންދޫން 11 ލަނޑުގެ މޮޅެއް ހޯދީ އެއަތޮޅު ހިރިމަރަދޫ އަތުންނެވެ.
މެޗު ނޭކުރެންދޫން ކާމިޔާބުކުރީ 11-1 ނެވެ. މެޗުގައި މުޙައްމަދު ވިލްފް ތިން ލަނޑު ޖަހާ ހެޓްރިކް ހެދިއެވެ. އަދި ޝިފާޒް އާދިލްއާއި, މުހައްމަދު އަބުދުލްކަރީމްއާއި, މުހައްމަދު އަބާން އިމްރާން ކުރެ ކޮންމެ ކުޅުންތެރިއަކު ދެ ލަނޑު ޖެހިއެވެ. އެޓީމަށް ދެން ލަނޑުތައް ޖަހައިދިނީ އަލީ ނިޝާންއާއި, މުހައްމަދު ރާއިފް ފަޒީލްއެވެ. ހިރިމަރަދޫގެ ހަމައެކަނި ލަނޑު ޖެހީ ހަސަން ރިސްފާހުއެވެ. ހދ.މަކުނުދޫން ވަނީ 2-1 ން ވައިކަރަދޫ ބަލިކޮށްފައެވެ. މަކުނުދޫގެ ދެގޯލް ޖެހީ ނިހާން އަހުމަދާއި, ޒިދާން އަހުމަދެވެ. ވައިކަރަދޫގެ ލަނޑު ޖެހީ އިބްރާހީމް އަގީލްއެވެ.
ގދ.ތިނަދޫގެ މައްޗަށް ހޯޑެއްދޫން ވަނީ 2-1 ން ކުރި ހޯދާފައެވެ. ހޯޑެއްދޫގެ ދެ ލަނޑުޖެހީ އަހުމަދު ނަވާލް ޖަމީލްއާއި, އަހުމަދު ޝާނިއު އަބުދުލްޣަނީއެވެ. ތިނަދޫގެ ހަމައެކަނި ލަނޑުޖެހީ އިބްރާހީމް ހުސެއިންއެވެ. ގދ.ވާދޫން ވަނީ 3-1 ން ގައްދޫ ބަލިކޮށްފައެވެ. ވާދޫގެ ތިން ލަނޑު ޖެހީ ނަޝާން އަހުމަދާއި, މުހައްމަދު ލިޔާހު އަލީއާއި, މުހައްމަދު ނާއިލްއެވެ. ގައްދޫގެ ލަނޑު ޖެހީ އާލިމް އަބުދުލްއަޒީޒުއެވެ.
ލ.އަތޮޅު ބުރުގައި ލ.ގަމުން ވަނީ 2-1 ން މާމެންދޫ ބަލިކޮށްފައެވެ. ގަމުގެ ދެ ލަނޑު ޖެހީ އަބުދުالله ޖުނެއިދުއާއި, ހުސެއިން ނާޝިދުއެވެ. މާމެންދޫގެ ހަމައެކަނި ލަނޑު ޖެހީ ހުސެއިން އަޒުމަތުއެވެ. މާބައިދޫން ކަލައިދޫ ބަލިކުރީވެސް 2-1 ނެވެ. މާބައިދޫގެ ދެ ލަނޑު ޖެހީ އަހުމަދު ތޯހާއާއި, މުހައްމަދު ފައިޒަމްއެވެ. ކަލައިދޫގެ ލަނޑު ޖެހީ މުހައްމަދު އަކްރަމްއެވެ.
ހުކުރު ދުވަހު ހަވީރު ކުޅޭ މެޗުތައް:
ކ.ގާފަރު - ކ.ގުރައިދޫ
ކ.ދިއްފުށި - ކ.ތުލުސްދޫ
މ.ނާލާފުށި - މ.މުލަކު
މ.މަޑުއްވަރި - މ.ކޮޅުފުށި
