އައްޑޫ މަގުހެދުމާއި ބިންހިއްކުމުގައި ހުރަހެއް ނެތް، ކުދިކުދި މައްސަލަތައް ދަނީ ހައްލުކުރަމުން - މިއުވާން
9 ފެބުރުއަރީ 2023 | ބުރާސްފަތި 09:32މަޝްރޫއުތައް މޮނިޓަރ ކުރުމަށް އެކި ލެވެލްގެ ބޭފުޅުން ވަޑައިގަންނަވާނެ
ރައީސް އޮފީހުގެ ތަރުޖަމާނު މިއުވާން މުހައްމަދު
ސަރުކާރުން އައްޑޫސިޓީގައި ކުރިއަށްގެންދާ މަޝްރޫއުތަކުގެ ތެރެއިން އެ ސިޓީގެ ބިން ހިއްކުމާއި މަގު ހެދުމުގެ މަޝްރޫއުގެ މަސައްކަތްކުރުމުގައި ހުރަހެއް ނެތްކަމަށާއި، އެހެންނަމަވެސް ކުދިކުދި ކަންކަން ހައްލުކުރަމުންދާ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީ އިން ދެންނެވި ސުވާލަކަށް ޖަވާބުދެއްވަމުން މިއުވާން ވިދާޅުވި އައްޑޫ ބިންހިއްކުމުގެ މަސައްކަތުގެ ލިންކް ރޯޑުގެ 4 ލައިން އަދި ފުރަތަމަ ރިސޯޓުގެ މަސައްކަތް ކުރިއަށްދާ ކަމަށެވެ. އަދި ހައުސިން މިނިސްޓަރު މުހައްމަދު އަސްލަމް އައްޑޫއަށް ވަޑައިގަންނަވަން ހަމަޖެހިފައިވާ ކަމަށާއި، އައްޑޫގައި ތަރައްގީގެ ބޮޑެތި މަޝްރޫއުތައް ކުރިއަށްދާއިރު އެ މަޝްރޫއުކުރިއަށްދަނީ ކިހިނެއްތޯ އަދި އެކިއެކި މައްސަލަތައް ހައްލުކުރުމަށް ސަރުކާރުގެ އެކި ލެވެލްގެ ބޭފުޅުން އެކިފަހަރުމަތިން ވަޑައިގަންނަވާނެ ކަމަށެވެ.
މިއުވާން ވިދާޅުވީ ބޮޑެތި މަޝްރޫއުތައް ކުރިއަށްގެންދާއިރު ފާއިތުވި 3 އަހަރު ތެރޭގައި ދިމާވި އެކިކަހަލަ ގޮންޖެހުންތާއެކީގައި، މީގެ ތެރޭގައި ހަނގުރާމަ އަދި ތަކެތީގެ އަގުތަކަށް އައި ބަދަލާއި ގުޅިގެން ދިމާވާ ގޮންޖެހުންތަކާއި މިފަދަ އެކިއެކި މައްސަލަތަކެއް ކުރިމަތިވި ކަމަށެވެ. އެހެންނަމަވެސް މައްސަލަތައް ހައްލުކޮށް ކޮންޓްރެކްޓަރަކާއެކު ކުރެވޭ މަސައްކަތުގެ ތެރެއިން ސީދާ އެ ސައިޓުގައި ހުންނަވައިގެން އެކަމުގެ މަސައްކަތް ކުރައްވާ ބޭފުޅުންނާއެކު މައްސަލަތައް ހައްލުކޮށްގެން ކުރިއަށްގެންދާ ކަމަށެވެ.
މިއުވާން ވިދާޅުވީ މަގު ހެދުމާއި ބިން ހިއްކުމުގެ މަސައްކަތުގައި މާބޮޑު ހުރަހެއް އޮވެގެން މަސައްކަތް ކުރިއަށް ނުދަނީކީ ނޫން ކަމަށާއި، ދިމާވާ ކުދިކުދި ކަންކަމާއި ގުޅޭ މައްސަލަތައް ހައްލުކުރަމުން ދާ ކަމަށެވެ.
