އެއީ މީގެ 12 އަހަރު ކުރިއެވެ. ޢަބްދުލްކަރީ އަބޫ ޖަލްހޫމް، އޭނާގެ ޢާއިލާއާއެކު ތުރުކީވިލާތަށް ދިރިއުޅުން ބަދަލު ކުރީ ފަލަސްޠީނުގައި ފެތުރިފައި ވާ އިންތިހާ ފަޤީރު ކަމާއި ކުރަމުންދާ ސިލްސިލާ ހަނގުރާމައިން ސަލާމަތްވުމަށެވެ.
އެއީ މި ފެށުނު މީލާދީ އައު އަހަރުގެ 2 ވަނަ މަހުން 6 ވަނަ ދުވަހެވެ. ތުރުކީވިލާތާއި ސޫރިޔާ ހިއްސާ ކުރާ ބޯޑަރު ސަރަޙައްދަށް އައި ބާރުގަދަ ބިންހެލުމުގައި އަބޫ ޖަލްހޫމްއާއި އޭނާގެ މުޅި ޢާއިލާ ވަނީ މި ދުނިޔެއަށް ފަހު ނޭވާ ދޫކޮށްލާފައެވެ.
ބިން ހެލުމުގައި މަރުވި މީހުންގެ ތެރެއިން މިހާތަނަށް ފެނުނު ހަށިތަކަށް ބަލާއިރު ފަލަސްޠީނުގެ 70 މީހެއްގެ ހަށިގަނޑު އޭގެ ތެރޭގައި ހިމެނެއެވެ. އޭގެ ތެރޭގައި އަބޫ ޖަލްހޫމްއާއި އޭނާގެ އަންހެނުން، ފާޠިމާއާއި އެ ދެމަފިރިންގެ 4 ދަރިންވެސް ހިމެނޭ ކަމަށް ފަލަސްޠީނުގެ ފޮރިން މިނިސްޓްރީއިން ވަނީ ބުނެފައެވެ.
ފަލަސްޠީނުގެ ބައިތު ލަހިޔާގައި ހުންނަ އަބޫ ޖަލްހޫމްގެ އަމިއްލަ ގޭގައި އިން އޭނާގެ މަންމަ ވިދާދް މިހާރު ކުރަމުންދާ ހަމަ އެކަނި ޢުއްމީދަކީ އޭނާގެ ދަރިންގެ ހަށިތައް ފަލަސްޠީނަށް ގެނެސް، އެ ބިމުގައި ވަޅުލުމެވެ. ގިސްލަގިސްލާއިން އެ މަންމައަށް އެ ދަރިން ނުފެންނަތާ 12 އަހަރުވެއްޖެއެވެ.
އަހަރެންގެ ދަރިފުޅާ އެ ދަރިފުޅުގެ ދަރިން ލޮލަށް ނުފެންނަތާ 12 އަހަރު. އެ ދަރިންކޮޅު ދެކިލަން ވަރަށް ބޭނުން. ފަހުގެ ވަދާޢީ ސަލާމް ކުރަން ބޭނުން. ބިން ހެލުން އައިތާ 4 ދުވަސްވީ އިރުވެސް އެއްވެސް މީހަކު ފޯނަށް ޖަވާބު ނުދޭ. ދެން އެހެން މީހުން ބުނެފި އަހަރަމެން ގާތު، މުޅި ޢާއިލާ އެއްކޮށް މަރުވެއްޖެއޭ.ވިދާދް؛ އަބޫ ޖަލްހޫމްގެ މަންމަ
ޣައްޒާގައި ދިރިއުޅުނު އިރު އަބޫ ޖަލްހޫމް މަސައްކަތް ކުރަމުން ދިޔައީ ޓެކްސީ ޑްރައިވަރެއްގެ ގޮތުގައެވެ. ނަމަވެސް ޢާއިލާއަށް މެންބަރުން އިތުރުވެ، ޚަރަދުތައް ދެކޮޅު ޖައްސަން ދަތިވާން ފެށުމާއެކު ތުރުކީވިލާތަށް ބަދަލުވީ 2010 ވަނަ އަހަރުގެ ތެރޭގައެވެ. ތުރުކީވިލާތުގައި އޭނާ މަސައްކަތް ކުރީ ލަކުޑި ކާރުޚާނާއެއްގައެވެ. ތުރުކީވިލާތުގައި ދިރިއުޅުން ހަމައަކަށް އެޅުމުން، ފާޠިމާއާއި ދަރިންވެސް އެކޮޅަށް ބަދަލުވީއެވެ.
އަހަރެންގެ ބޭބެ، ކަރީމް، ތުރުކީއަށް ބަދަލުވީ ޣައްޒާގައި މިއޮތް ފިއްތުންތަކުން ސަލާމަތްވެ، ދިރިއުޅުން އާރާސްތު ކުރަން. މާލީ ގޮތުން ތަނަވަސްކަން ހޯދާ، ތުރުކީވިލާތުގަ ދިރިއުޅުން ކޮޅަށް ޖަހަން ބޭބެ ބޭނުންވީ. އެކަމަކު، އެތަނަށް ގޮސް، ބޭބެއާއި ފަހަރި އަދި ދަރިންކޮޅު އެވީ މަރު. އެތަނަށް ދިޔައީ އުޖާލާ ދިރުއުޅުމެއްގެ ޢުއްމީދުގަ. އެކަމަކި، ބިންހެލުމާއެކީ އެ ދެމަފިރިންނާއި ދަރިންކޮޅު އެވީ މަރު.ރަމްޒީ: ޢަބޫ ޖަލްހޫމްގެ ކޮއްކޮ
ތުރުކީވިލާތުގައި އަބޫ ޖަލްހޫމް ދިރިއުޅެމުން ދިޔަ އަންތަކިޔާއިން، 50 އަހަރުގެ ބައްޕައަށް ޢުއްމީދު އާ ކޮށްދިނެވެ. 33 އަހަރުގެ ފަޠިމާއާއި 16 އަހަރުގެ ނޫރާ، 11 އަހަރުގެ ބާރާ އަދި 9 އަހަރުގެ ކެންޒީއާއި 3 އަހަރުގެ މުޙައްމަދުގެ ދިރިއުޅުން އުޖާލާ ވަމުން ދިޔައެވެ. އާ އެޕަރޓްމަންޓްއަކަށް ބަދަލުވީވެސް މީގެ އެންމެ 6 މަސްދުވަސް ކުރިންނެވެ.
ވަރުގަދަ ބިންހެލުމުގެ ޚަބަރު ފެތުރިގެން ދިއުމާއެކު އަބޫ ޖަލްހޫމުގެ ޢާއިލާއަށް ވީ ގޮތެއް ބެލުމަށް، އެ ޢާއިލާގެ އެހެން މެންބަރުން ގަދައަޅާ މަސައްކަތް ފެށިއެވެ. އަބޫ ޖަލްހޫމްގެ ޢާއިލާ މަރުވެއްޖެކަން ދެނެގަނެވުނީ ވެއްޓިފައިވާ ޢިމާރާތްތަކުގެ ދަށުގައި އަބޫ ޖަލްހޫމްގެ ޢާއިލާ މަރުވެފައިވާ މަންޒަރު ފެންނަ ފޮޓޯއަކުންނެވެ.
އަހަރަމެންނަށް އެންމެ ފަހުން ލިބުނު ފޮޓޯގަ މި ފެންނަނީ ބޭބެގެ ގައި މައްޗަށް އިމާރާތުގެ ބައެއް ވެއްޓިފަ އޮއްވާ. 3 ދަރިން ގައިގަ ބައްދާލައިގެން ބޭބެ އޮތީ. އަންހެނުން އެއޮތީ ފަހަތުގަ. މުޙައްމަދު ސަލާމަތް ކުރި ނަރުހެއް. އެކަމަކު ފަރުވާ ދެމުން، ހޮސްޕިޓަލަށް ދިޔަ މަގުމަތީ އެ ކުއްޖާވެސް ނިޔާވީ. އެހެން ކުދިން މަރުވީ ބޭބެއާއެކީ. އެ ކުދިންގެ ގައިގަ ބައްދާލައިގެން ބޭބެ މަރުވެފައި އޮތް މަންޒަރު ފެންނަ ފޮޓޯ އަހަރަމެންނަށް ލިބުނު.ޢަބޫ ޖަލްހޫމްގެ ކޮއްކޮ---
އެ ފޮޓޯއިން ފެންނަނީ އަބޫ ޖަލްހޫމް، އޭނާގެ ދަރިންގެ ގައިގައި ބައްދާލައިގެން އޮތް މަންޒަރެވެ. ބެލެވޭ ގޮތުގައި ގޭގެ ބައިތައް ވެއްޓެމުން ދިޔަ ދިއުމުން، އެ ދަރިން ސަލާމަތް ކުރުމުގެ އައްޑަނައަކަށް އޭނާގެ އަމިއްލަ ހަށިގަނޑު ހެދީއެވެ.
ފަލަސްޠީނުގެ ސަރުކާރުންވެސް ވަނީ ބިންހެލުން އައި ސަރަޙައްދަށް ރެސްކިއު ޓީމެއް ފޮނުވާފައެވެ.
