އަބޫބަކާރު އަލް ނަޞްރު ދޫކޮށްލުމާއި ރޮނާލްޑޯއާ އެއްވެސް ގުޅުމެއް ނެތް

އަލް ނަޞްރު ދޫކޮށްލުމާއި، ދާދި ފަހުން އެ ޓީމަށް ބަދަލުވި ޕޯޗުގަލްގެ ކްރިސްޓިއާނޯ ރޮނާލްޑޯއާ އެއްވެސް ގުޅުމެއް ނޯންނާނެ ކަމަށް ވިންސެންޓް އަބޫބަކާރު ބުނެފި އެވެ.

އަލް ނަޞްރު ދޫކޮށްލުމަށްފަހު އަބޫބަކާރު ބަދަލުވީ އޭނާގެ ކުރީގެ ކުލަބް ބެސިކްޓާސް އަށެވެ. އަލް ނަޞްރުން އަބޫބަކާރު ދޫކޮށްލީ ރޮނާލްޑޯ ރަޖިސްޓްރީ ކުރުމަށެވެ. އަބޫބަކާރު ވަނީ އޭނާ އަލް ނަޞްރަށް ކުޅެދިން 39 މެޗުގައި 13 ލަނޑު ޖަހައިފަ އެވެ. މިދިޔަ އަހަރު ނިމުނު ފީފާ ވޯލްޑް ކަޕް މުބާރާތުގައި ވެސް އޭނާ ވަނީ ކެމަރޫނާއެކު މޮޅު ކުޅުމެއް ދައްކާފައެވެ. އަބޫބަކާރު ދާދި ފަހުން ދިން އިންޓަވިޔުއެއްގައި ބުނީ އެއީ ރޮނާލްޑޯ ކުލަބަށް އައުމާ އެއްވެސް ވަރަކަށް ގުޅުން އޮތް ކަމެއް ނޫން ކަމަށެވެ. އަދި އެއީ އޭނާގެ އަމިއްލަ ނިންމުމެއް ކަމަށެވެ. އޭނާ ބުނީ ރޮނާލްޑޯ އަލް ނަޞްރަށް އައުމުގެ ކުރިން އޭނާ ވާނީ ކުލަބް ދޫކޮށްލަން ބޭނުންވާކަން އިސްވެރިންނަށް އަންގާފައި ކަމަށެވެ. ރޮނާލްޑޯ އަލް ނަޞްރަށް ބަދަލުވުމަށް ފަހު އޭނާ ގާތު ކުލަބުގައި މަޑުކުރަން ވެސް އެދުނު ކަމަށެވެ. ރޮނާލްޑޯގެ އިތުރުން ކުލަބުން އޭނާ ގާތު އެދުނު ކަމަށާއި، އެންމެ ކުޑަމިނުން މި ސީޒަން ނިމެންދެން މަޑުކޮށްދިނުމަށް އެދުނު ކަމަށެވެ. ނަމަވެސް އޭނާ ބޭނުންވީ ކުލަބް ދޫކޮށްލަން ކަމަށާއި، ކުލަބުން އޮތީ އޭނާ އަށް ސީޒަން ނިމެންދެން މުސާރަ ދިނުމަށް ތައްޔާރަށް ކަމަށެވެ.

އަބޫބަކާރު ތުރުކީގެ ބެސިކްޓާސް އަށް ބަދަލުވީ ދެ އަހަރާ ބައިގެ މުއްދަތަކަށެވެ. އޭނާ ވަނީ މީގެ ކުރިން ވެސް ބެސިކްޓާސް އަށް ކުޅެފަ އެވެ. އެ ކުލަބަށް އޭނާ އެންމެ ފުރަތަމަ ކުޅުނީ ލޯނު އެއްބަސްވުމެއްގެ ދަށުންނެވެ. އެއަށްފަހު އެ ކުލަބާއެކު ދާއިމީ އެއްބަސްވުމެއް ހަދައި، އަބޫބަކާރު ވަނީ 2021 ވަނަ އަހަރާ ހަމައަށް އެ ކުލަބަށް ކުޅެފަ އެވެ. އެއަށްފަހު އޭނާ ބަދަލުވީ ސައުދީ އަރަބިއްޔާގެ އަލް ނަޞްރަށެވެ. ބެސިކްޓާސް އަށް ކުޅެދިން 68 މެޗުގައި އަބޫބަކާރު ވަނީ އެ ޓީމަށް 35 ލަނޑު ޖަހައިދީފަ އެވެ.

ކެމަރޫންގެ ޤައުމީ ޓީމަށް ވެސް ކުޅެމުން އަންނަ އުމުރުން 30 އަހަރުގެ އަބޫބަކާރު ވަނީ ޤައުމީ ޓީމަށް ކުޅެދިން 94 މެޗުގައި 35 ލަނޑު ޖަހައިދީފަ އެވެ. ޤައުމީ ޓީމާއެކު އަބޫބަކާރު ވަނީ 2017 ވަނަ އަހަރުގެ އެފްރިކާ ކަޕް އޮފް ނޭޝަންސް ކާމިޔާބުކޮށްފަ އެވެ. އޭގެ ފަހުން 2021 ވަނަ އަހަރު އޮތް މުބާރާތުގެ ތިން ވަނަ ވަނީ ހޯދައިފަ އެވެ.