ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިދިޔަ އަހަރު ކުރިއަށްގެންދިޔަ އެޕްރެންޓިސްޝިޕް ޕްރިގްރާމުގެ ދަށުން 72 ޒުވާނުން ތަމްރީނުކޮށްފިއެވެ.

ތަފާތު ގިނަ ދާއިރާތަކުން ފަންނީ، ހުނަރުވެރި، ގާބިލް ޒުވާނުން ބިނާކޮށް ކުރިއެރުވުމަށް ކޮންމެ އަހަރަކު އެޗްޑީސީގެ ފަރާތުން ކުރިއަށްގެންދާ އެޕްރެންޓިސްޝިޕް ޕްރޮގްރާމުގައި މަސައްކަތުގެ ތަޖުރިބާ ލިބި ގައުމީ ފެންވަރުގެ ސަނަދެއް ހާސިލުކުރުމުގެ ފުރުސަތު ފޯރުކޮށްދެއެވެ. އެގޮތުން މިދިޔަ އަހަރުގެ އެޕްރެންޓިސްޝިޕް ޕްރޮގްރާމު ފުރިހަމަ ކުރުމަށްފަހު 72 ޒުވާނުން ވަނީ އެ ސަނަދު ހާސިލުކޮށްފައެވެ.

އެޗްޑީސީން ބުނި ގޮތުގައި އެޕްރެންޓިސްޝިޕް ޕްރޮގްރާމްގެ މަގުސަދަކީ ކުރިއަށްދާނެ ވަކި ދާއިރާއެއް އިހްތިޔާރު ނުކުރެވި ނުވަތަ ކުރިއަށް ދާންބޭނުންވާ ދާއިރާއިން ފުރުސަތު ނުލިބި ތިބި ޒުވާނުންނަށް ފުރުސަތުތަކެއް ހުޅުވައި ދިނުމެވެ. އަދި ވަޒީފާގެ ބާޒާރުގައި ޒުވާނުންނަކީ ފަސްނުޖެހި، އެ ވަޒީފާއެއްގެ އަމަލީ މަސައްކަތްތައް ދަންނަ ގާބިލް ބަޔަކަށް ހެދުން ކަމަށް ވެސް އެޗްޑީސީން ބުނެފައިވެއެވެ.

މިދިޔަ އަހަރުގެ އެޕްރެންޓިސްޝިޕް ޕްރޮގްރާމް ހަތަރު މަސް ދުވަހުގެ މުއްދަތަށް ކުރިއަށް ގެންގޮސްފައިވާއިރު، 10 ދާއިރާއަކުން ބައިވެރިން ވަނީ ތަމްރީން ކޮށްފައެވެ. މީގެ ތެރޭގައި ރެފްރިޖަރޭޝަން އެންޑް އެއާ ކޮންޑިޝަނިންގ، މެކޭނިކް، ހެވީ ވެހިކަލް، ވެލްޑިންގ، މޭސަނަރީ، ގާރޑަނިންގ، އިލެކްޓްރިކަލް، ބިލްޑިންގ މެއިންޓެނަންސް، ކާޕެންޓްރީ، ޕްލަމްބިންގ، ކޮންސްޓްރަކްޝަން އަދި ސައިޓް ސުޕަވިޝަންގެ ދާއިރާތައް ހިމެނެއެވެ.

އެޗްޑީސީއާއި އިކޮނޮމިކް މިނިސްޓްރީ އަދި ޔޫތު މިނިސްޓްރީއާއެކު ވެފައިވާ އެއްބަސްވުމެއްގެ ދަށުން މި ޕްރޮގްރާމް ހިންގި މިއީ ފަސް ވަނަ އަހަރެވެ. މިއީ 3000 ޒުވާނުން ތަމްރީނުކުރުމަށް އަމާޒު ކޮށް ސަރުކާރުން ފަށާފައިވާ ޕްރޮގްރާމްއަށް އެއްބާރުލުން ދިނުމުގެ ގޮތުން އެޗްޑީސީން ހިންގާ ޕްރޮގްރާމްތަކެކެވެ.