7 ފެބްރުއަރީއާމެދު ރައީސް ނަޝީދު: "ތެދު، ދޮގު އޮޅޭގޮތަށް އެމްޑީޕީގެ ތެރެއިން ވާހަކަދެއްކުމަކީ ހިތާމައެއް"

2012 ފެބްރުއަރީ ހަތެއްގައި ކުރީގެ ރައީސް މުހައްމަދު ނަޝީދުގެ ވެރިކަން ބަދަލުވި ގޮތާމެދު ތެދާއި ދޮގު އޮޅޭ ގޮތަށް އެމްޑީޕީގެ ތެރެއިން ވާހަކަދައްކާފައިވާ ކަމަށާއި އެއި ހިތާމަކުރައްވާ ކަމެއް ކަމަށް އެމަނިކުފާނު ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސްގެ މަޤާމުގައި މިހާރު ހުންނެވި ރައީސް ނަޝީދު އެފަދައިން ވިދާޅުވީ މަޖިލީހުގެ ރިޔާސަތުގައި އިންނަވާ ވާހަކަފުޅުދައްކަވަމުންނެވެ. އެމްޑީޕީ އިން ގަބޫލުކުރާ ގޮތުގައި ރައީސް ނަޝީދުގެ ވެރިކަން ބަދަލުވީ ބަޣާވާތެއްގެ ތެރެއިންނެވެ. ބުދަ ދުވަހުގެ މަޖިލީހުގެ ޖަލްސާގައި ރައީސް ނަޝީދު ވަނީ އެމްޑީޕީގެ ތެރެއިން ފެބްރުއަރީ 7ގެ ހަގީގަތް އޮޅޭގޮތަށް ވާހަކަދައްކަމުންދާ ކަމަށް ވިދާޅުވެ އެކަމާމެދު ކަންބޮޑުވުން ފާޅުކުރައްވާފައެވެ. 7 ފެބްރުއަރީއާ ގުޅޭ ގޮތުން މެންބަރުން ދައްކަވާ ބައެއް ވާހަކަފުޅުތަކުން އެމަނިކުފާނު ބަދުނާމުވާ ކަމަށް ރައީސް ނަޝީދު ވިދާޅުވި އެވެ.

ބުދަ ދުވަހު މަޖިލީހުގައި ވާހަކަދައްކަވަމުން މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވީ ފެބްރުއަރީ ހަތެއްގެ ހާދިސާއަށް ފަހު އެއީ ބަޣާވާތެއް ނޫން ކަމަށް އަބަދުވެސް ޕީޕީއެމް އިން އައި ބުނަމުން ކަމަށެވެ. އެހެންނަމަވެސް އޭރު އެމްޑީޕީން އެއީ ބަޣާވާތެއް ކަމަށް ބުނެފައިވާ ކަމަށް އޭނާ ވިދާޅުވިއެވެ. އަދި މިހާރު އެމްޑީޕީގެ ތެރެއިން އެއީ ބަޣާވާތެއް ނޫންކަމަށް ބުނާކަމަށާއި އެކަމާމެދު އޭނާ ވަނީ ސުވާލު އުފެދޭކަމަށް މެންބަރު ޝަރީފު ވިދާޅުވިއެވެ. އަދި ފެބްރުއަރީ 7ގައި ވެރިކަން ބަދަލުވުމާއި ގުޅިގެން ހިނގި ހަމަނުޖެހުންތަކުގެ ޒިންމާ އެމްޑީޕީ އިން ނަގަން ޖެހޭ ކަމަށް ވެސް އޭނާ ވިދާޅުވިއެވެ.

އާދަމް ޝަރީފްގެ ވާހަކައާއި ގުޅިގެން ހެންވޭރު ދެކުނު ދާއިރާގެ އެމްޑީޕީގެ މެންބަރު ހުސައިން ޝަހީމް (އަނދުން ހުސެން) ވަނީ އޭނާ އަށް ރައްދު ދެއްވާފައެވެ. އޭނާ ވިދާޅުވީ އެއްވެސް އިރެއްގައި އެމްޑީޕީން ރަސްމީކޮށް ފެބްރުއަރީ ހަތެއްގައި ހިނގާ ދިޔަ ކަންކަމަކީ ބަޣާވާތެއް ނޫން ކަމަށް ބުނެފައި ނުވާނެ ކަމަށެވެ. އެހެންކަމުން އެމްޑީޕީ އިން 7 ފެބްރުއަރީގެ ހާދިސާއާމެދު ދެކޭ ގޮތް ވަރަށް ސާފުކަމަށް އޭނާ ވިދާޅުވިއެވެ.