"ބަޚޫރް"ގެ ހިތްގައިމު ވަހުން، 6 ދަރިންގެ ހުވަފަތް މަންމަ، ދިރިއުޅުން ކޮޅަށް ޖަހައިފި

ޔަމަންއަށް ނިސްބަތްވާ ވަފާ އަލް-ސުރާބީ ދިރިއުޅެމުންދާ ގޭތެރެއިން ދުންދަނޑީގެ ވަސް ކެނޑިގެންދާ ހަމަ އެންމެ ވަޤުތެއްވެސް ނާދެއެވެ. ޢަރަބިން ކިއާ އުޅޭ ގޮތުން ނަމަ "ބަޚޫރް"އަކީ، ހުވަފަތް ވެފައިވާ ވަފާ، އޭނާގެ 6 ދަރިންގެ ޢާއިލާ ބެލެހެއްޓުމަށް އާމްދަނީ ހޯދާ މަސްދަރެވެ. ވަފާ އާމްދަނީ ހޯދަނީ، ގޭގެ ބަދިގެ ތެރޭގައި ދުންދަނޑި ހަދާ، އެ ވިއްކައިގެންނެވެ.

ވަފާއަކީ ހަނގުރާމައިގެ ސަބަބުން ސުންނާފަތި ވެފައިވާ ޔަމަނުގައި ޢާއިލާ ބެލެހެއްޓުމަށް ބުރަ ތަކުލީފުތަކެއް އުފުލަމުން ދާ އެތައް ހާސް އަންހެނުންނެއްގެ ތެރެއިން އެކަކެވެ.

އިމްޕޯޓް މުދަލަށް އިންތިހާއަށް ބަރޯސާވެފައިވާ ޔަމަނުގެ ބާޒާރުތަކުގައި ތަކެތީގެ އަގުތައް އުފުލުމާއި ބޭރު ފައިސާ ލިބުން ދަތިވުމުގެ ނަތީޖާއެއްގެ ގޮތުން، ކާބޯތަކެއްޗާއި، ބޯފެނުގެ އިތުރުން ހަކަތަ ހޯދުމުގެ ކެރިފޯރުންތެރިކަމެއް، ގިނަ ޢާއިލާތަކުގައި ނެތެވެ.

ދިރިއުޅުމުގެ ފެންވަރު ރަނގަޅު ކުރުމަށްޓަކާ ޢަރަބި ޓީޗަރެއްގެ ގޮތުގައިވެސް ވަފާ މަސައްކަތް ފެށިއެވެ. ނަމަވެސް ހޫތީން ކޮންޓްރޯލް ކުރަމުންދާ ސަރަޙައްދުތަކުގެ ސިވިލް ސަރވަންޓުންގެ މުސާރައަށް ބުރޫ އެރުމާއެކު، ދިރިއުޅުމަށް އާމްދަނީ ހޯދާނެ އިތުރު މަސްދަރުތަކަށް ބަރޯސާވުމަށް ވަފާއަށް މަޖުބޫރުވިއެވެ. ދުންދަނޑީގެ ވިޔަފާރިއަށް މިޞްރާބު ބަދަލުވީ އެހާ ހިސާބުންނެވެ.

ވަފާ ދަނީ، ދުންދަނޑި އުފެއްދުމުގެ މަސައްކަތް، އެހެން އަންހެނުންނަށް ދަސްކޮށްދީ، އެހެން މީހުންނަށްވެސް އެ ވިޔަފާރީގެ ތެރެއަށް ވަނުމުގެ މަގު ތަނަވަސްކޮށްދެމުންނެވެ.

ސެންޓު ނުވަތަ އަތަރު އުފައްދަން ބޭނުން ކުރާ ސާމާނު ވިއްކާ ފިހާރައެއް ހިންގާ ޞަލާޙް އަލް-ޒުރައިޤީ ބުނި ގޮތުގައި، އޭނާގެ ގިނަ ކަސްޓަމަރުންނަކީ އަންހެނުންނެވެ.

ޔަމަނުގައި ދީނީ ޤަބޫލު ކުރުންތައް އޮންނަ ގޮތުން، ގޭގައި ތިބިގެން އަންހެނުން ވިޔަފާރި ކުރުމަކީ އެންމެ އެދެވޭ ގޮތެވެ.