ބިންހެލުމުގައި މަރުވި މީހުންގެ އަދަދު 7،900ށް
ތުރުކީގައި މަދުވެގެން 5،894 މީހުން މަރުވެ 34،810 މީހުން ޒަޚަމްވެފައިވޭ
ތުރުކީ-ސީރިއާ އަށް އައި ބިންހެލުމުގައި ތުރުކީގައި މަރުވި މީހުންތަކެއް
ބިންހެލުމުގައި މަރުވި މީހުންގެ އަދަދު 7،900 އަށް އަރާފައިވާ އިރު، ސީރިއާގައި އަދަދުތައް އަދިވެސް އިތުރުވާނެކަމަށް ލަފާކުރެވޭ ކަމަށް އޮފިޝަލުން ބުނެފިއެވެ.
ހޯމަ ދުވަހު ތުރުކީ އާއި ސީރިއާއަށް ރެކްޓަރ މިންގަނޑު 7.8 މެގްނިޓިއުޑްގެ ބާރުމިނުގައި އައި ބިންހެލުމުގައި މަރުވި މީހުންގެ އަދަދު މަދުވެގެން 7،926 އަށް އަރާފައިވާ ކަމަށް އޮފިޝަލުން ބުނެއެވެ.
"ވައިޓް ހެލްމެޓްސް" ގެ ނަމުން މަޝްހޫރު ސީރިއާގެ ސިވިލް ޑިފެންސް އިން އަންގާރަ ދުވަހު ބުނީ ސީރިއާގެ ހުޅަނގު އުތުރުގައި ސަރަހައްދުތަކުގައި މަރުވި މީހުންގެ އަދަދު 1،220ށް އަރާފައިވާއިރު، ޒަހަމްވި މީހުންގެ އަދަދު 2،600ށް އަރާފައިވާ ކަމަށެވެ.
އެ އަދަދުތައް ބޮޑުތަނުން އިތުރުވާނެ ކަމަށް ލަފާކުރެވެނީ ވެއްޓިފައިވާ އިމާރާތްތަކުގެ ދަށުގައި އެތައް ސަތޭކަ އާއިލާއެއް ތިބުމުން ކަމަށް އެ ގްރޫޕުން އިތުރަށް ބުނެފައިވެއެވެ.
ވައިޓް ހެލްމެޓްސް ޓީމުތަކުން ސާޗް އެންޑް ރެސްކިއު އޮޕަރޭޝަންތައް ކުރިއަށް ގެންދަނީ، ވަރަށް އުނދަގޫ ހާލަތެއްގައި ކަމަށް އެ ގްރޫޕުން ބުނެއެވެ. އަދި ހެނދުނުގެ ވަގުތެއްގައި އައި ބިންހެލުމުގައި ގެއްލުން ލިބުނު 400ށް ވުރެ ގިނަ އިމާރާތާއި ވެއްޓުނު 1،300ށް ވުރެ ގިނަ އިމާރާތް އަދި އެތައް ހާސް އިތުރު ތަންތަން ހިމެނެއެވެ.
ސީރިއާގެ ސަރުކާރު ކޮންޓްރޯލްކުރާ ސަރަހައްދުތަކުން މަދުވެގެން 812 މީހަކު މަރުވެފައިވާ ކަމަށް ދައުލަތުގެ މީޑިއާ ސާނާ އިން ބުނެފިއެވެ.
ތުރުކީގައި މަދުވެގެން 5،894 މީހުން މަރުވެ 34،810 މީހުން ޒަޚަމްވެފައިވާ ކަމަށް ތުރުކީގެ ނައިބު ރައީސް ފުއަތު އޮކްޓައި އަންގާރަ ދުވަހު ވިދާޅުވެފައިވެއެވެ.
