ހަ ވަނަ ފަހަރަށް ސަމްބާ ގޯލްޑް ނޭމާ އަށް

ސަމްބާ ގޯލްޑް އެވޯޑު ހަ ވަނަ ފަހަރަށް ބްރެޒިލްގެ ފޯވާޑް ނޭމާ ޖޫނިއާ ހޯދައިފި އެވެ.

ސަމްބާ އެވޯޑަކީ ޔޫރަޕުގައި ކުޅޭ ބްރެޒިލްގެ ކުޅުންތެރިންގެ ތެރެއިން އެންމެ މޮޅު ކުޅުންތެރިޔާ އަށް ދެމުން އަންނަ އެވޯޑެކެވެ. މި އެވޯޑު އެންމެ ފުރަތަމަ ދޭން ފަށާފައި ވަނީ 2008 ވަނަ އަހަރު އެވެ. އެ އަހަރު އެ އެވޯޑު ހޯދާފައި ވަނީ އޭސީ މިލާނަށް ކުޅެމުން އައި ބްރެޒިލްގެ ލެޖެންޑް ކަކާ އެވެ. ނޭމާ އަށް އެންމެ ފުރަތަމަ މި އެވޯޑު ލިބުނީ 2014 ވަނަ އަހަރު އެވެ. އެ އަހަރު އޭނާ އެ އެވޯޑު ހޯދީ ވޯޓު ދިން މީހުންގެ ރެކޯޑު އިންސައްތައަކާ އެކު އެވެ. އޭގެ ފަހުން 2015 ވަނަ އަހަރާއި، 2017 ވަނަ އަހަރާއި، 2020 ވަނަ އަހަރު އަދި 2021 ވަނަ އަހަރު ވެސް ނޭމާ ވަނީ އެ އެވޯޑު ހޯދައިފަ އެވެ. މިދިޔަ އަހަރުގެ އެވޯޑާއެކު ނޭމާ ވަނީ ހަ ފަހަރު ސަމްބާ އެވޯޑު ކާމިޔާބުކޮށްފަ އެވެ. މިދިޔަ އަހަރު ނޭމާ ވަނީ ޕެރިސް ސެއިންޓް ޖާމަން (ޕީއެސްޖީ) ގައި މޮޅު ކުޅުމެއް ދައްކައިފަ އެވެ. ބްރެޒިލާއެކު މިދިޔަ އަހަރު އޮތް ފީފާ ވޯލްޑް ކަޕްގައި ވެސް ނޭމާ ކުޅުނެވެ. ނަމަވެސް މުބާރާތުގެ ކުއާޓާ ފައިނަލުން ބްރެޒިލް ވަނީ ކަޓައިފަ އެވެ.

ނޭމާގެ އިތުރުން މި އެވޯޑު ހާސިލްކޮށްފައިވާ ކުޅުންތެރިންނަކީ ލުއިސް ފަބިއާނޯ، މައިކޮން، ތިއާގޯ ސިލްވާ، ފިލިޕޭ ކުޓީނިއޯ، ރޮބާޓޯ ފިރްމީނޯ އަދި އެލިސަން ބެކާ އެވެ. މީގެ ތެރެއިން ސިލްވާ ވަނީ ޖެހި ޖެހިގެން ތިން ފަހަރު އެ އެވޯޑު ކާމިޔާބުކޮށްފަ އެވެ.