ސޫރިޔާ-ތުރުކީ ބިންހެލުން: 18 މަހުގެ ރަޣަދު ސަލާމަތްވީ ބޮޑު ޒަޚަމަކާ ނުލައި، މަންމައާއި އާއިލާ މެންބަރުން ވަނީ މަރުވެފައި!

ފެބުރުއަރީ 6 ވަނަ ދުވަހު، ތުރުކީވިލާތާއި ސޫރިޔާގެ ބޯޑަރު ސަރަހައްދަށް އައި ބާރުގަދަ ބިންހެލުމުގައި ބޮޑު ސަރަހައްދެއް މުޅިންހެން ބިމާ ހަމަވެފައި ވާއިރު، ސޫރިޔާއިން ވެއްޓުނު ގެތަކުގެ ދަށުން ފުރާނަ ސަލާމަތްވި އެކަކީ، އުމުރުން އެންމެ 18 މަހުގެ ރަޣަދު އިސްމާއީލެވެ.

ސޫރިޔާގައި އޭނާގެ އާއިލާއާއެކު ދިރިއުޅެމުން ދިޔަ ގެ ބިމާ ހަމަވެގެންދިޔަ ބިންހެލުމުގެ ހާދިސާގައި (ރަޣަދުގެ މަންމަވެސް ހިމެނޭހެން) އެ އާއިލާގެ ގިނަ އަދަދެއްގެ މެންބަރުން ވަނީ މި ދުނިޔެ ދޫކޮށްފައެވެ.

ފެބުރުއަރީ 6 ވަނަ ދުވަހަށް އަލިވިލެނިކޮށް، މީހުން ސަލާމަތް ކުރުމުގެ މަސައްކަތުގައި އުޅުނު މީހެއްގެ އުރުގައި އޮވެގެން، ވެއްޓިފައި ވާ އިމާރާތުގެ ބައިތަކުގެ ތެރެއިން ރަޣަދު ނުކުމެގެން އައިއިރު، އެ ތުއްތު ތުއްތު ކުއްޖާގެ ހަށިގަނޑުގައި ބޮޑު ޒަޚަމެއް ނެތެވެ. އޭނާއާ ހަވާލުވީ އޭނާގެ ބޮޑުބޭބެއެކެވެ.

ބޮޑުބޭބެ ބުނިގޮތުގައި ރަޣަދްގެ އެއްބަނޑު އެއްބަފާ 2 ކުދިންނާއި މަންމަވެސް ވަނީ މަރުވެފައެވެ. މަންމަ މަރުވިއިރު ބަނޑުވެސް ބޮޑެވެ.

ގަދަ ފިނިން ސަލާމަތްވުމަށް ހީޓަރު ޖައްސާފައިވާ ސަރަހައްދުގައި ބިންމަތީގައި އިށީނދެލައިގެން އިން ރަޣަދް ކޭހާވެސް އެއްޗަކީ ޕާންކޮޅެކެވެ. ބެލެވޭ ގޮތުގައި ރަޣަދުގެ ބައްޕަގެ މައިބަދަ ވަނީ ބިނދިފައެވެ.

ރަޣަދުގެ އާއިލާއަކީ ސޫރިޔާގެ 11 އަހަރުވީ ދާޚިލީ ހަނގުރާމައިގެ ތެރޭގައި އަމިއްލަ ގެދޮރު ގެއްލުނު މީހުންގެ ތެރެއިން، ތުރުކީ ބޯޑަރު ސަރަހައްދަށް ބަދަލުވި އާއިލާއެކެވެ.