ބިންހެލުމުގައި މަރުވި މީހުންގެ އަދަދު 5000 އާއި ގާތްކޮށްފި
7 ފެބުރުއަރީ 2023 | އަންގާރަ 08:31ބިންހެލުމާއި ގުޅިގެން މިހާތަނަށް ދެގައުމުން ޖުމްލަ 4،940 މީހުން މަރުވެފައިވޭ
ސީރިއާގެ ވެއްޓިފައިވާ އިމާރާތުގެ ދަށުން މީހުން ސަލާމަތްކުރަނީ
ހޯމަ ދުވަހުގެ ވަގުތެއްގައި ތުރުކީ އާއި ސީރިއާ ބޯޑަރު ގުޅޭ ސަރަހައްދަށް އައި 7.8 މެގްނިޓިއުޑްގެ ބާރުގަދަ ބިންހެލުމުގައި މަރުވި މީހުންގެ އަދަދު 5000 އާއި ގާތްކޮށްފިއެވެ.
ސީއެންއެންގައި ބުނެފައިވަނީ ބިންހެލުމާއި ގުޅިގެން މިހާތަނަށް ދެގައުމުން ޖުމްލަ 4،940 މީހުން މަރުވެފައިވާ ކަމަށެވެ.
އަންގާރަ ދުވަހުގެ ހެނދުނު 9:45 ހާއިރު ތުރުކީގައި މަރުވި މީހުންގެ އަދަދު މަދުވެގެން 3،381 އަށް އަރާފައިވާ ކަމަށް އެގައުމުގެ ޑިޒާސްޓާ މެނޭޖްމަންޓް އެޖެންސީގެ އޮފިޝަލު އޮރްހާން ޓަތާރު ޓީވީން ދެއްކި ބްރީފިންގައި ވިދާޅުވެފައިވެއެވެ. އަދި މަދުވެގެން 20،426 މީހަކަށް އަނިޔާވެފައިވާ ކަމަށް ޓާޓަރ އިން ބުނެއެވެ.
މިހާތަނަށް ތުރުކީގައި 11،000 އިމާރާތަކަށް ގެއްލުން ލިބިފައިވާ ކަމަށް ރިޕޯޓްކޮށްފައިވާ ކަމަށް ވެސް އޭނާ ވިދާޅުވިއެވެ. އަދި ގާތްގަނޑަކަށް 25،000 އިމަޖެންސީ ރެސްޕޮންޑަރުން މަސައްކަތް ކުރަމުންދާ ކަމަށް ވެސް އޭނާ ވިދާޅުވިއެވެ.
ޒަޚަމްވި މީހުން ގެންދިއުމާއި ސާޗް އޮޕަރޭޝަންތަކުގައި އެހީތެރިވުމަށް މަދުވެގެން 10 ބޯޓާއި 54 މަތިންދާބޯޓު ބޭނުން ކުރަމުންދާ ކަމަށް ވެސް އޭނާ ވިދާޅުވިއެވެ.
ސީރިއާގައި ސަރުކާރާއި އިދިކޮޅު ފަރާތްތަކުން ކޮންޓްރޯލްކުރާ ސަރަހައްދުތަކުގެ ތެރެއިން މަރުވި މީހުންގެ އަދަދު 1،559 އަށް އަރާފައިވާ ކަމަށް އޮފިޝަލުން ބުނެއެވެ. ސީރިއާގައި ވެސް 3،648 މީހުންނަށް އަނިޔާވެފައިވާ ކަމަށް އޮފިޝަލުން ބުނެއެވެ.
