ތިލަފުށިން ބޭރު މީހުންނަށް 99 އަހަރަށް ބިން ކުއްޔަށް ދޭ މައްސަލަ މަޖިލީހުން ބޭރުކޮށްލައިފި
99 އަހަރަށް ބިން ނުއަގުގައި ވިއްކުމަކީ އެކަމުގެ ނޭދެވޭ އަސަރު ދިވެހި ވިޔަފާރިވެރިންނަށާއި ރާއްޖޭގެ އިޤުތިޞާދަށް ވަރަށް ބޮޑަށް ކުރާނެ ކަމެއް
މަޑުއްވަރީ ދާއިރާގެ މެންބަރު އާދަމް ޝަރީފް
ސިނާއީ ބޭނުމަށް ކ. ތިލަފުށިން ބިން ވިއްކާއިރު، ބޭރު މީހުންނަށް 99 އަހަރަށް ބިން ކުއްޔަށް ދޭތީ އެކަމާ ދެކޮޅަށް އިދިކޮޅު ޕީއެންސީގެ މެންބަރު އާދަމް ޝަރީފް އުމަރު ހުށަހެޅުއްވި ކުއްލި މައްސަލަ ބަލައިނުގަނެ ބޭރުކޮށްލައިފިއެވެ.
މައްސަލަ ހުށަހަޅުއްވަމުން މެންބަރު ޝަރީފް ވިދާޅުވީ ގްރޭޓަރ މާލޭގެ ގޮތުގައި ބެލެވޭ ތިލަފުއްޓަކީ ދިވެހިންގެ ފިކުރާއި ހިޔާލާއި މިންނަތުން ދިވެހި ރައްޔިތުންގެ ބައިތުލްމާލުން ހަރަދުކޮށްގެން އުފައްދައި، ތަރައްޤީ ކުރަމުން އަންނަ ދިވެހިރާއްޖޭގެ ސިނާޢީ މަސައްކަތްތަކަށް ޚާއްޞަ ކުރެވިފައިވާ ރަށެއް ކަމަށެވެ.
ބިމުގެ ދަތިކަން މާލެ ސަރަހައްދުގައި ދިވެހި ވިޔަފާރިވެރިންނަށް ނުހަނު ބޮޑަށް މިހާރުވެސް ކުރިމަތިވެ ފައިވާއިރު، ބީލަމުގެ އުޞޫލުން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ އެކަމުގެ ނޭދެވޭ އަސަރު ދިވެހި ވިޔަފާރިވެރިންނަށާއި ރާއްޖޭގެ އިޤުތިޞާދަށް ވަރަށް ބޮޑަށް ކުރާނެކަމެއް ކަމަށް މެންބަރު ޝަރީފް ވިދާޅުިވިއެވެ.
އަދި ބިންގަތުމުގެ ވާދަވެރިކަމުގެތެރޭގައި، ޚާއްޞަކޮށް ކުދި އަދި މެދުފަންތީގެ ދިވެހި ވިޔަފާރިވެރިން، ބިދޭސީންނާ ވާދަކުރަންޖެހޭ ފަދަ އުޞޫލެއް އެކުލަވާލައި، ދިވެހިންނެކޭ އެއްފަދައިން ބިދޭސީންނަށް ބިން ގަނެވޭނެގޮތެއް ހެދުމަކީ ދިވެހިންނަށް ވިޔަފާރީގެ ފުރުޞަތުތައް ހަނިވެ، ކުރިމަގުގައި ރާއްޖޭގެ ވިޔަފާރިތައް ކޮންޓްރޯލު ކުރުމުގެ ބާރު ބޭރު މީހުންގެ އަތްމައްޗަށް ދިއުމުގެ ދޮރު ހުޅުވިގެންދާނެ ކަމެއް ކަމަށް ބުނެފައިވެއެވެ.
އަދި ވަގުތީ މަންފާއެއް ހޯދުމުގެ ބޭނުމުގައި ނުވަތަ ރިޔާސީ އިންތިޙާބަށް ސަރުކާރުން ނުފޫޒު ފޯރުވުމަށް ބޭނުންވާ ފައިސާ ހޯދުމުގެ ނިޔަތުގައި، ގްރޭޓަރ މާލެއިން ބިދޭސީންނަށް 99 އަހަރަށް ބިން ނުއަގުގައި ވިއްކުމަކީ ކުރިމަގުގައި ރާއްޖޭގެ އިޤުތިޞާދަށް އެކަމުގެ ނޭދެވޭ އަސަރު ވަރަށް ބޮޑަށް ކުރާނެ ކަމަކަށް ވާތީވެ، ކ. ތިލަފުށިން ބިދޭސީންނަށް 99 އަހަރަށް ބިން ވިއްކުން ހުއްޓާލުމަށް ސަރުކާރަށް ގޮވާލައި، ރައްޔިތުންގެ މަޖިލީހުގެ ޤަވައިދުގެ 170ވަނަ މާއްދާގެ ދަށުން ކުއްލި މައްސަލަ ހުށަހަޅުއްވާ ކަމަށެވެ.
މި ކުއްލި މައްސަލަ ބަލައިގަތުމަށް ނެގުނު ވޯޓުގައި 45 މެންބަރުން ބައިވެރި ވަޑައިގަތެވެ. ކުއްލި މައްސަލަ ބަލައިގަތުމަށް ފެންނަކަމަށް ވޯޓު ދެއްވީ 9 މެންބަރުންނެވެ. އަދި ނުފެންނަކަމަށް 36 މެންބަރުން ވޯޓު ދެއްވިއެވެ. ފާސްވުމަށް ބޭނުންވަނީ 23 ވޯޓުކަމުން ކުއްލި މައްސަލަ ބަލައިގަތުމަށް ފާހެއް ނުވިއެވެ.
