ހޯމަ ދުވަހުގެ ވަގުތެއްގައި ތުރުކީއާއި ސީރިއާއަށް އައި ބާރުގަދަ ބިންހެލުމާއެކު 4،372 މީހުން މަރުވެފައިވާކަން ކަށަވަރުވެއްޖެއެވެ.

ސީއެންއެންގައި ބުނެފައިވަނީ ތުރުކީގެ ޑިޒާސްޓާ ސާވިސަސްގެ ހެޑް ޔޫނުސް ސެޒާރު ވިދާޅުވި ގޮތުގައި އަންގާރަ ދުވަހުގެ ހެނދުނުގެ ނިޔަލަށް ތުރުކީން މަރުވި މީހުންގެ އަދަދު ވަނީ 2،921 އަށް އިތުރުވެފައެވެ.

އަންކާރާގައި ބޭއްވި ނޫސްވެރިންގެ ބައްދަލުވުމެއްގައި ސެޒާރު ވިދާޅުވީ ޖުމްލަ 15،834 މީހަކަށް އަނިޔާވެފައިވާ ކަމަށެވެ.

މި ބިންހެލުމުގައި ސީރިޔާއިން 1،451 މީހުން މަރުވެ، 3،531 މީހުން ޒަޚަމްވެފައިވާ ކަމަށް އޮފިޝަލުން ރިޕޯޓްކޮށްފައިވެއެވެ.

މި ދުވަސްވަރު އެ ޤައުމުގެ މޫސުމާއި ކާރިސާގެ ބޮޑުކަމުން އެހީދޭ ޓީމުތަކަށް ގޮންޖެހުންތަކެއް ކުރިމަތިވަމުންދާ ކަމަށް ހަޓޭ އިމަޖެންސީ ކޯޑިނޭޝަން ސެންޓަރުން ބޭއްވި ނޫސްވެރިންގެ ބައްދަލުވުމުގައި ވާހަކަ ދެއްކެވި ތުރުކީގެ ހެލްތު މިނިސްޓަރު ފަހްރެޓިން ކޮކާ ވިދާޅުވެފައިވެއެވެ.

މީހުން ސަލާމަތްކުރުމާއި އޮޕަރޭޝަންގެ މަސައްކަތުގައި ދައުލަތުގެ ހުރިހާ މުއައްސަސާތަކެއް އެއްކޮށްފައިވާއިރު، އޭގެ ތެރޭގައި ފުލުހުންނާއި މުނިސިޕަލް މަސައްކަތްތެރިންނާއި ޑިޒާސްޓާ އެންޑް އިމަޖެންސީ މެނޭޖްމަންޓް އެޖެންސީ އަދި ސަލާމަތާއި ރައްކާތެރިކަން ބެލެހެއްޓުމަށް އިންޓީރިއާ މިނިސްޓްރީގެ ބައެއް ކަމަށްވާ ހަތިޔާރު އެޅި އާންމު ގާނޫނު ތަންފީޒުކުރާ ޖަމިއްޔާއެއް ހިމެނެއެވެ.

ބިންހެލުމުގެ އަސަރު ކުރި ޕްރޮވިންސްތަކަށް މިހާތަނަށް މަދުވެގެން 2،256 އިމަޖެންސީ ހެލްތު ޕާސަނަލް ވޯކަރުން ވަނީ ފޯރާފައި ކަމަށް ހެލްތު މިނިސްޓަރު ވިދާޅުވެފައިވެއެވެ.

އަވަށްޓެރި ސިޓީތަކުން މަދުވެގެން 602 އެމްބިއުލާންސާއި ދެ އެމްބިއުލާންސް މަތިންދާ ބޯޓު ވަނީ ފޮނުވާލާފައެވެ. އަދި ތުރުކީގެ ނޭޝަނަލް މެޑިކަލް ރެސްކިއު ޓީމް (ޔޫއެމްކޭއީ) ގެ ބައެއްގެ ގޮތުގައި ހިމެނޭ 187 ޓީމެއް ވެސް ވަނީ ފޮނުވާލާފައެވެ.