އީގަލްސް ދޫކޮށް ހެލްމެޓު ވެސް މާޒިޔާ އަށް
އީގަލްސް ދޫކޮށް ހެލްމެޓު ވެސް މާޒިޔާ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުން
ހެލްމެޓު މާޒިޔާ އަށް ބަދަލުވުމަށްފަހު
ކުލަބް އީގަލްސް ދޫކޮށް އަޙުމަދު ނޫމާން (ހެލްމެޓު) މާޒިޔާ ސްޕޯޓްސް އެންޑް ރެކްރިއޭޝަން ކުލަބަށް ބަދަލުވެއްޖެ އެވެ.
އައު ސީޒަނަށް ތައްޔާރުވުމުގެ ގޮތުން މާޒިޔާ އިން އަންނަނީ ޓީމުގެ ސްކޮޑު ވަރުގަދަ ކުރުމުގެ މަސައްކަތް ކުރަމުންނެވެ. އެގޮތުން މިހާތަނަށް ވެސް އެ ޓީމުން ވަނީ ގިނަ ކުޅުންތެރިންގެ ސޮއި ހޯދައިފަ އެވެ. މިއީ އީގަލްސް ދޫކޮށް މާޒިޔާ އަށް ބަދަލުވި ދެ ވަނަ ކުޅުންތެރިޔާ އެވެ. އީގަލްސް އަށް ކުޅެމުން އައި ޙަސަން ރާއިފް އަޙުމަދު (ހަންނަ) ވެސް ވަނީ މާޒިޔާ އަށް ބަދަލުވެފަ އެވެ. ޤައުމީ ޓީމަށް ވެސް ކުޅެމުން އަންނަ ހެލްމެޓު މާޒިޔާ އަށް ބަދަލުވިކަން އެ ކުލަބުން އިއުލާން ކުރީ ހޯމަ ދުވަހު އެވެ. މާޒިޔާ އިން ބުނީ ހެލްމެޓުގެ ތަޖުރިބާއާއެކު މާޒިޔާގެ ސްކޮޑަށް އިތުރު ފުރިހަމަކަމެއް ލިބިގެންދާނެ ކަމަށެވެ. އީގަލްސް ދޫކޮށް ހެލްމެޓު ވެސް މާޒިޔާ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ.
މާޒިޔާ އިން ހޯދި އައު ކުޅުންތެރިންނާއެކު މިހާރު ޤައުމީ ޓީމުގެ މުޅި ފޯވާޑް ލައިން އެއްކޮށް އޮތީ އެ ޓީމުގަ އެވެ. މާޒިޔާ އިން ވަނީ އައު ސީޒަނަށް ތައްޔާރުވުމުގެ ގޮތުން ބިދޭސީ ކޯޗެއް ވެސް ހަމަޖައްސާފަ އެވެ. އައު ކޯޗާއެކު މާޒިޔާގެ އަމާޒު އޮތީ އޭއެފްސީ ކަޕަށެވެ.
