ބޮޑު ބައްޔާއެކު ކްލޮޕް ބުނީ ދައްކާނެ ބަހަނާއެއް ނެތް ކަމަށް

އިނގިރޭސި ޕްރިމިއާ ލީގުގައި ވުލްވްސް އަތުން ބަލިވުމުން ދައްކާނެ އިތުރު ބަހަނާއެއް ނެތް ކަމަށް ލިވަޕޫލްގެ ކޯޗު ޔާގަން ކްލޮޕް ބުނެފި އެވެ.

މި ސީޒަންގައި ލިވަޕޫލްގެ ފަރާތުން ދަށް ކުޅުމެއް ފެންނަމުން އަންނައިރު، ވުލްވްސްގެ ދަނޑުގައި އެ ޓީމާ ދެކޮޅަށް ކުޅެ ލިވަޕޫލް ބަލިވެފައި ވަނީ 3-0 އިންނެވެ. މެޗުން ބަލިވުމާއެކު ލިވަޕޫލް މިހާރު އޮތީ ލީގު ތާވަލްގެ 10 ވަނައިގަ އެވެ. އެ މެޗަށްފަހު ވާހަކަ ދައްކަމުން ލިވަޕޫލްގެ ކޯޗު ކްލޮޕް ބުނީ، މެޗުގެ ނަތީޖާއާ ގުޅޭ ގޮތުން އޭނާ ދޭނެ މާ ބޮޑު ތަފްސީލެއް ނެތް ކަމަށާއި، ވަރަށް ބޮޑަށް ކަންކަން ބަދަލުވާން ޖެހޭ ކަމަށެވެ. އޭނާ ބުނީ މެޗުގެ ފުރަތަމަ 15 މިނެޓު ވެސް ދިޔައީ ވަރަށް ގޯސްކޮށް ކަމަށާއި، އެގޮތަށް އެކަން ވެގެން ނުވާނެ ކަމަށެވެ. އެކަން ބަދަލުވާން ޖެހޭނެކަން ފާހަގަކޮށް ކްލޮޕް ބުނީ، އެކަމަށް އޭނާ ދައްކާނެ ބަހަނާއެއް ވެސް ނެތް ކަމަށެވެ. މީގެ އިތުރުން އާސެނަލާ ދެކޮޅަށް ކުޅެ، އެވަޓަން މޮޅުވީ އެމީހުންގެ ކަންކަން ވަރަށް ބޮޑަށް ރަނގަޅުކޮށްފައި އޮތުމުން ކަމަށާއި ލިވަޕޫލް އިން ރަނގަޅު ކުރަން ޖެހޭ ކަންކަން ހުރި ކަމަށް އަދި އެކަންކަން ރަނގަޅު ކުރަން ޖެހެނޭ ކަމަށް ކްލޮޕް ބުންޏެވެ.

މީގެ އިތުރުން ކްލޮޕް ބުނީ ލިވަޕޫލްގެ ކުޅުންތެރިންނާމެދު އޭނާގެ އިތުބާރު ނުގެއްލޭ ކަމަށެވެ. ނަމަވެސް ރަނގަޅު ކުރަން ހުރި ކަންކަން އެންމެން އެކުވެގެން ރަނގަޅު ކުރަން ޖެހޭނެ ކަމަށެވެ. ކްލޮޕް ބުނީ އޭނާގެ ޒިންމާ އެނގޭ ކަމަށާއި، ބޭނުންވަނީ ކަންކަން ރަނގަޅުކޮށް ލިވަޕޫލްއާއެކު ކުރިއަށް ދާން ކަމަށެވެ.

މި ސީޒަންގެ ޕްރިމިއާ ލީގުގައި ލިވަޕޫލް ވަނީ މިހާތަނަށް 20 މެޗު ކުޅެފަ އެވެ. އޭގެ ތެރެއިން އެ ޓީމު މޮޅުވެފައި ވަނީ އަށް މެޗުންނެވެ. ފަސް މެޗު އެއްވަރިވެފައިވާއިރު، ހަތް މެޗުން ވަނީ ބަލިވެފަ އެވެ. މި ސީޒަންގައި ލިވަޕޫލް ނެރެމުން އަންނަ ނަތީޖާތައް ދަށްވުމުގެ ސަބަބުން ކްލޮޕަށް އޮތް ޕްރެޝަރު ބޮޑު ކަމަށް ބޭރުގެ މީޑިއާ ތަކުގައި އަންނަނީ ރިޕޯޓުކުރަމުންނެވެ.