ޤައުމީ ފުޓުބޯޅަ ޓީމުގެ ފޯވާޑް ޙަސަން ރާއިފް އަޙުމަދު (ހަންނަ) އެންމެ ފަހުގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ބަދަލުވެއްޖެ އެވެ.

ހަންނަ މާޒިޔާ އަށް ބަދަލުވީއިރު، އެންމެ ފަހުން އޭނާ ކުޅުނީ ކުލަބް އީގަލްސް އަށެވެ. އޭނާ ކުލަބް އީގަލްސް އަށް ގުޅުނީ 2015 ވަނަ އަހަރު އެވެ. އެއަށްފަހު އެ ޓީމަށް ކުޅެން ފަށާފައި ވަނީ 2016 ވަނަ އަހަރު އެވެ. ހަންނަ ވަނީ އީގަލްސްއާއެކު ޕްރެޒިޑެންޓްސް ކަޕް ވެސް ކާމިޔާބުކޮށްފަ އެވެ. މީގެ އިތުރުން އޭނާ ވަނީ އީގަލްސްއާއެކު އެކި ފަހަރު މަތިން ޔޫތު ޗެމްޕިއަންޝިޕް ވެސް ކާމިޔާބުކޮށްފަ އެވެ. އީގަލްސް ދޫކޮށް ހަންނަ މާޒިޔާ އަށް ބަދަލުވީ ތިން އަހަރު ދުވަހުގެ އެއްބަސްވުމެއްގެ ދަށުންނެވެ. ހަންނަ އަކީ އައު ސީޒަނަށް ތައްޔާރުވުމުގެ ގޮތުން މާޒިޔާ އިން ސޮއި ހޯދި ފުރަތަމަ ކުޅުންތެރިޔާ އެވެ.

އައު ސީޒަނަށް ތައްޔާރުވުމުގެ ގޮތުން މާޒިޔާ އިން ވަނީ އެ ޓީމުގެ ގިނަ ކުޅުންތެރިންގެ އެއްބަސްވުން އައުކޮށްފަ އެވެ. އޭގެ ތެރޭގައި އިބްރާހިމް އައިސަމް، މުހައްމަދު އިރުފާން (އިރޭ)، ސަމޫހު އަލީ (ސަމުއްޓެ)، އިޔާން އަބްދުލް އަލީމް، ޙަމްޒާ މުޙައްމަދު (ހަމްޕު) އަދި ނާއިޒް ޙަސަން (ދާދު) ހިމެނެ އެވެ.

މިއަހަރުގެ ފުޓުބޯޅަ ސީޒަން ފެށުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އިން ނިންމާފައިވަނީ އަންނަ މާޗު މަހުއެވެ.