ހަމްޕުއާއި ދާދުވެސް މާޒިޔާގެ އެއްބަސްވުން އައުކޮށްފި

މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ ހަމްޒާ މުހައްމަދު (ހަމްޕު)އާއި ނާއިޒް ހަސަން (ދާދު) އެ ކުލަބާއެކު ހަދާފައިވާ އެއްބަސްވުން އައުކޮށްފިއެވެ.

ދެ ކުޅުންތެރިންވެސް މާޒިޔާ އެއްބަސްވުން އައުކޮށްފައިވާކަން އެ ކުލަބުން ހާމަކުރީ ހޮނިހިރު ދުވަހުއެވެ. ހަމްޕުއާއި ދާދު ވަނީ އިތުރު ތިން އަހަރު އެ ކުލަބުގައި މަޑުކުރުމަށް ނިންމާފައެވެ. މިދިޔަ އަހަރު ބޭއްވި މޯލްޑިވްސް ސްޕޯޓްސް އެވޯޑްސްގައި އަހަރުގެ އެންމެ މޮޅު ފުޓުބޯޅަ ކުޅުންތެރިޔާގެ މަގާމުވެސް ހޯދާފައިވާ ހަމްޕު މާޒިޔާއާ ގުޅުނީ 2019 ވަނަ އަހަރުއެވެ. ދާދު އަންނަނީ 2018 ވަނަ އަހަރުން ފެށިގެން މާޒިޔާއަށް ކުޅެމުންނެވެ. މި ދެ ކުޅުންތެރިންގެ އިތުރުން އެހެން ކުޅުންތެރިންވެސް ވަނީ މާޒިޔާގެ އެއްބަސްވުން އައުކޮށްފައެވެ.

މާޒިޔާއިން އިއުލާނު ނުކުރިނަމަވެސް ޓީމު އިތުރަށް ވަރުގަދަކުރުމަށް ގައުމީ ޓީމުގެ ކުޅުންތެރިންތަކެއްގެ ސޮއިވެސް ވަނީ ހޯދާފައެވެ. އޭގެ ތެރޭގައި އަލީ ފާސިރު (ސެންޓޭ)އާއި، ކީޕަރު މުހައްމަދު ފައިސަލާއި ޑިފެންޑަރ ހުސެއިން ޝިފާއު ޔޫސުފާއި، އަހުމަދު ނުއުމާން އަދި ފޯވާޑް ހަންނަ ހިމެނެއެވެ. ކުރިއަށް އޮތް ސީޒަންގައި މާޒިޔާއިން ނުފެންނާނެ ކުޅުންތެރިންގެ ތެރޭގައި މިޑްފީލްޑަރު އިބްރާހީމް ވަހީދު ހިމެނެއެވެ. ކެޕްޓަން އަސަދުﷲ އަބްދުﷲ ކްލަބްގައި މަޑުކުރާކަން ކަށަވަރެއް ނޫނެވެ.

މިއަހަރުގެ ފުޓުބޯޅަ ސީޒަން ފެށުމަށް ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އިން ނިންމާފައިވަނީ އަންނަ މާޗު މަހުއެވެ.