އެއާ އިންޑިޔާ ބޯޓެއްގެ އިންޖީނުގައި އަލިފާން ހިފުމާއި ގުޅިގެން އަނބުރާ ފުރިތަނަށް ޖައްސައިފި

އަބޫދާބީއިން ފުރައިގެން އިންޑިޔާގެ ކެލިކަޓް އަށް ދަތުރުކުރި އެއާ އިންޑިއާ އެކްސްޕްރެސް ބޮއިންގ737 މަތިންދާބޯޓެއްގެ އިންޖީނުގައި ހުޅުހިފުމާއި ގުޅިގެން އިމަރޖެންސީކޮށް އަނބުރާ އަބޫދާބީގައި ޖައްސައިފިއެވެ.

ޑައިރެކްޓަރޭޓް ޖެނެރަލް އޮފް ސިވިލް އެވިއޭޝަނުން ބުނީ ފްލައިޓުގައި ޖުމްލަ 184 ފަސިންޖަރުން ތިބި ކަމަށާއި އެއްވެސް މީހަކަށް ގެއްލުމެއް ނުލިބި ސަލާމަތުން ބޯޓު ޖައްސާފައިވާ ކަމުގައެވެ.

ނިއުސް ޗެނެލްއަކަށް މައުލޫމާތު ދެމުން އެއާ އިންޑިޔާ އެކްސްޕްރެސްއިން ބުނެފައިވަނީ ބޯޓު އެއްހާހެއްހާ ފޫޓު މައްޗަށް އެރިތަނާ ޕައިލެޓަށް އެއް އިންޖީނުގައި އަލިފާން ރޯވެފައިވާތަން ފެނިފައިވާ ކަމުގައެވެ. އެއާއެކު ވަގުތުން ބޯޓު އަބުރާލުމަށް ނިންމީ ކަމަށް ބުނެފައިވެއެވެ.

ޖެނުއަރީ 23 ވަނަ ދުވަހުވެސް ޓްރިވެންޑްރަމް އިން މަސްކަޓްއަށް ދަތުރު ކުރި އެއާ އިންޑިޔާ މަތިންދާބޯޓަކަށް ވެސް ޓެކްނިކަލް މައްސަލައެއް ކުރިމަތިވެގެން ފުރިތާ 45 މިނެޓު ފަހުން އަނބުރާ ޖައްސާފައިވާކަމަށް މައުލޫމާތު ދީފައިވެއެވެ.

އިންޖީނުގައި އަލިފާން ރޯވުމާއި ޓެކްނިކަލް މައްސަލައިގެ އިތުރުން މިދިޔަ ޑިސެމްބަރުމަހު ޑުބާއީ އަށް ދަތުރުކުރި އެއާ އިންޑިޔާ އެކްސްޕްރެސް ބޯޓެއްގައި ހަރުފައެއް އޮއްވާ ވެސް ވަނީ ފެނިފައެވެ. ހަރުފަ ފެނިފައިވަނީ ބޯޓު ޖެއްސި ފަހުންނެވެ. މިކަމާ ގުޅިގެން އެވިއޭޝަން ރެގިއުލޭޓަރީ އިދާރާއިން ވަނީ ތަހުގީގެއް ވެސް ފަށާފައެވެ.