ބުންވަރުގެ ނަމުގައި އިދިކޮޅުގެ ހިނގާލުމެއް
އެ ހިނގާލުމަކީ ޖަލު ހުކުމެއް ތަންފީޒްކުރައްވަމުންދާ ކުރީގެ ރައީސް ޔާމީން އަބްދުލް ގައްޔޫމް މިނިވަން ކުރުމަށް ގޮވާލާ ބާއްވާފައިވާ ހިނގާލުމެއް
ބުންވަރުގެ ނަމުގައި އިދިކޮޅުގެ ހިނގާލުމެއް
އިދިކޮޅު ޕީޕީއެމް އާއި ޕީއެންސީއިން ހިނގާލުމެއް ބާއްވައިފިއެވެ.
ރިޔާސީ އިންތިހާބަށް ތައްޔާރަށްވުމުގެ ގޮތުން އިދިކޮޅު ފަރާތްތަކުން ކުރިއަށްގެންދާ "ހޯޕް ކޮންފަރެންސް"ގެ ބައެއްގެ ގޮތުގައި ކުރިއަށް ގެންދިޔަ އެ ހިނގާލުމަކީ ފުލުހުންގެ ހުއްދަ އާއި އެކު މާލޭގައި ކުރިއަށް ގެންދިޔަ ހިނގާލުމެކެވެ.
އެ ހިނގާލުން ފަށާފައި ވަނީ ޕީޕީއެމް އޮފީސް ކުރިމަތިންނެވެ. އެ ހިނގާލުމުގައި އިދިކޮޅުގެ ލީޑާޝިޕުގައި ހަރަކާތްތެރިވާ ފަރާތްތަކާއި ޕީޕީއެމް އަދި ޕީއެންސީގެ ސަޕޯޓަރުން ވަނީ ބައިވެރިވެފައެވެ. އެ ހިނގާލުމަކީ ޖަލު ހުކުމެއް ތަންފީޒްކުރައްވަމުންދާ ކުރީގެ ރައީސް ޔާމީން އަބްދުލް ގައްޔޫމް މިނިވަން ކުރުމަށް ގޮވާލާ ބާއްވާފައިވާ ހިނގާލުމެކެވެ. އެ ހިނގާލުމުގައި ރައީސުލްޖުމްހޫރިއްޔާ އިބްރާހިމް މުުހައްމަދު ޞާލިޙްގެ ސަރުކާރަށް ފާޑުކިޔާ އެމަނިކުފާނުގެ އިސްތިއުފާ އަށް ވަނީ ގޮވާލާފައެވެ.
ރައީސް ޔާމީން 11 އަހަރަށް ޖަލަށް ލާން ހުކުމް ކޮށްފައި ވަނީ އެމަނިކުފާނުގެ މައްޗަށް ވ. އާރަށާއި ގުޅުން ހުރި ޚިޔާނާތުގެ މައްސަލަ އެއް ސާބިތުވުމުންނެވެ. އެގޮތުން ވ.އާރަށް ކުއްޔަށް ދިނުމުގެ މުއާމަލާތުގެ ތެރެއިން ރައީސް ޔާމީން 1 މިލިއަން ޑޮލަރު ރިޝްވަތުގެ ގޮތުގައި ގަބޫލު ކުރައްވާފައިވާ ކަމާއި، އެމަނިކުފާނު އެ މުއާމަލާތުގެ ތެރެއިން ހޯއްދެވި ފައިސާ ލޯންޑާ ކުރިކަން ވަނީ ސާބިތުވެފައެވެ. އެމަނިކުފާނު ޖަލަށް ލުމުގެ އިތުރުން ފަސް މިލިއަން ޑޮލަރުން ޖޫރިމަނާކުރަން ވެސް ކްރިމިނަލް ކޯޓުން ވަނީ ހުކުމްކޮށްފައެވެ. އެމަނިކުފާނުގެ މައްޗަށް ހުކުމް ކުރީ މިދިޔަ ޑިސެމްބަރު 25ގައެވެ. ރައީސް ޔާމީން ޖަލު ހުކުމް ތަންފީޒު ކުރައްވަމުން ގެންދަވަނީ ކ. މާފުށީ ޖަލުގައެވެ.
