ޕާކިސްތާނު މިސްކިތުގައި ބޮން ގޮއްވާލި މީހާ ދިޔައީ "ޑްރާމާ ޖައްސަމުން"

ޕާކިސްތާނު ފުލުހުންގެ ތެރެއިން ދަށް އަދި މެދު ފަންތީގެ ރޭންކުތަކުގެ ފުލުހުންނާއި އެމީހުންގެ ޢާއިލާތަކުން ދިރިއުޅެމުންދާ ޕެޝާވަރުގެ ޕޮލީސް ލައިންސް ޑިސްޓްރިކްޓްގެ މިސްކިތެއްގައި ޖެނުއަރީ 30 ވަނަ ދުވަހު ބޮމުގެ ވަރުގަދަ ހަމަލާއެއް ދިން މީހާއާ ބެހޭ ގިނަ މަޢުލޫމާތުތަކެއް އާންމު ކޮށްފިއެވެ.

100 އަށް ވުރެ ގިނަ މީހުންގެ ފުރާނަ ގެއްލި ދިޔަ އެ ހާދިޘާގައި ބޮން ގޮއްވާލި މީހާ ހުރީ ފުލުހުންގެ ޔުނީފޯމެއް އަޅައިގެން ކަމަށާއި، ސީސީޓީވީ ފުޓޭޖުން ފެންނަ ގޮތުގައި، ސަލާމަތީ ފިޔަވަޅުތައް އެންމެ ވަރުގަދަ ކޮށްފައިވާ ސަރަޙައްދުގެ ތެރެއަށް އޭނާ ވަދެގެން ދިޔައީ ސައިކަލެއްގައި ކަމަށް، ޕްރޮވިންޝަލް ޕޮލީސް ޗީފް ވަނީ ފެބުރުއަރީ 2 ވަނަ ދުވަހު ވިދާޅުވެފައެވެ.

ނޫސްވެރިންނަށް މަޢުލޫމާތު ދެއްވަމުން، ޚައިބަރު ޕަޝްތުންޚްވާ ޕްރޮވިންސްގެ ޕޮލީސް ޗީފް، މުޢައްޒަމް ޖާހް އަންޞާރީ ވިދާޅުވީ، ޖެނުއަރީ 30 ވަނަ ދުވަހު ބޮން ގޮއްވާލި މީހަކީ، ހަތިޔާރު އެޅި، ހަނގުރާމަވެރި ނެޓްވަރކެއްގެ މެންބަރެއްކަން މިހާރު ދެނެގަނެވިފައި ވާ ކަމަށެވެ. ނަމަވެސް އެކަމާ ބެހޭ އިތުރު ތަފްސީލެއް އޭނާ ހާމައެއް ނުކުރައްވައެވެ.

ސީސީޓީވީ ފުޓޭޖުން ފެންނަ މަންޒަރުތައް ސިފަކޮށްދެއްވަމުން އަންޞާރީ ވިދާޅުވީ، ޕޮލިސް ލައިންސް ޑިސްޓްރިކްޓްގެ މައި ޗެކްޕޮއިންޓްގެ ތެރެއިން، ބޮން ގޮއްވާލި މީހާ، ސައިކަލުގައި ވަދެގެން ދިޔައިރު އިނީ ހެލްމެޓްއަކާއި މާސްކެއްވެސް އަޅައިގެން ކަމަށެވެ. ސައިކަލު ޕާކު ކުރުމަށްފަހު، މިސްކިތައް ދެވެން އޮތް މަގަކީ ކޮބައިތޯ ސުވާލު ކުރުމަށްފަހު، މިސްކިތައް ދިޔައީ ފައި މަގުގައި ކަމަށްވެސް އަންޞާރީ ވިދާޅުވިއެވެ.

ބޮން ގޮއްވާލި މީހަކީ ފުލުހުންގެ ފައުޖުގެ މެންބަރެއް ކަމަށް، މައި ދޮރޯށީގައި ތިބި ފުލުހުންގެ ގާޑުންނަށް ޤަބޫލު ކުރެވުނު ކަމަށާއި، އެހެން ކަމުން ބޮން ގޮއްވާލި މީހާ ޗެކް ކޮށްފައި ނުވާ ކަމަށް އަންޞާރީ ވިދާޅުވިއެވެ. އަންޞާރީ ވަނީ އެ ފެއިލްވުމުގެ ޒިންމާ އުފުއްލަވާފައެވެ.

އަފްޣާނިސްތާނާ ޕާކިސްތާނު ހިއްސާ ކުރާ ބޯޑަރާއި ދާދި ކައިރީގައި އޮންނަ ޕޮލީސް ލައިންސް ޑިސްޓްރިކްޓްގައި ދިން ބޮމުގެ ހަމަލާއަކީ، މިދިޔަ 10 ވަރަކަށް އަހަރު ދުވަހުގެ ތެރޭގައި އެ ސަރަޙައްދުގައި ދިން އެފަދަ އެންމެ ވަރުގަދަ ހަމަލާއެވެ. މި ދަނޑިވަޅަކީ، ޕާކިސްތާނުގައި އެ ޤައުމުގެ ފުލުހުންނަށް އަމާޒުކޮށް ހަމަލާތައް ދެމުންދާ މިންވަރު، އިތުރު ވެފައި ވާ ދަނޑިވަޅެކެވެ.

ޖެނުއަރީ 30 ވަނަ ދުވަހު ބޮން ގޮއްވާލީ މެންދުރު ނަމާދަށް ހަމަ ފެށިތަނާއެވެ. އޭރު، އެތައް ސަތޭކަ ބަޔަކު ނަމާދުގެ ޖަމާޢަތުގައި ތިއްބެވެ. ބޮމުގެ ޙަމަލާގައި ޒަޚަމްވި މީހުންގެ ޢަދަދު 170 އަށް އަރައެވެ. މަރުވި 100 މީހުންގެ ތެރެއިން 97 މީހުންނަކީ ފުލުހުން ކަމަށް މަޢުލުމާތު ލިބެއެވެ. ޕާކިސްތާނުގެ ދިފާޢީ ވަޒީރު ޚަވާޖާ އާސިފް ވިދާޅުވީ، ބޮން ގޮއްވާލި މީހާ އެ ޖަރީމާ ހިންގީ ނަމާދު ޖަމާޢަތުގެ އެންމެ ފުރަތަމަ ސަފުގައި ހުރެގެން ކަމަށެވެ.