ވެލެންސިޔާ ބަލިކޮށް, ރެއާލް މެޑްރިޑުން ލަލީގާ ތާވަލުގެ އެއްވަނާގައިވާ ބާސެލޯނާއާ ދެމެދު އޮތް ފަރަގު ކުޑަކޮށްފިއެވެ.

ރެއާލްއިން ފަރަގު ފަސް ޕޮއިންޓަށް ކުޑަކުރީ 2-0 ން ވެލެންސިޔާ ބަލިކޮށްގެންނެވެ. މެޗުގައި ރެއާލްއިން ދެ ލަނޑު ޖެހީ ދެ މިނެޓުގެ ތެރޭގައެވެ. ފުރަތަމަ ލަނޑު 52 ވަނަ މިނިޓުގައި ޖެހީ އަސެންސިއޯއެވެ. ދެވަނަ ލަނޑު 54 ވަނަ މިނެޓުގައި ޖެހީ ވިނީޝިއުސް ޖޫނިއަރއެވެ. މިއީ ވިނީޝިއުސް ޖޫނިއަރ ރެއާލްއަށް ކުޅެދިން 200 ވަނަ މެޗެވެ. މެޗުގައި ރެއާލްގެ ދެ ލަނޑު ޖަހަންވެސް ފުރުޞަތު ތަނަވަސްކޮށްދިނީ ކެޕްޓަން ބެންޒެމާއެވެ. އެކަމަކު އަނިޔާގެ ސަބަބުން އޭނާއަށް މެޗު ފުރިހަމައެއް ނުކުރެވުނެވެ. މެޗު ވެލެންސިޔާއަށް ނިންމާލަން ޖެހުނީ 10 ކުޅުންތެރިންނާއެކުއެވެ. އެއީ 72 ވަނަ މިނެޓުގައި ގަބްރިއެލް ޕައުލިސްޓާއަށް ސީދާ ރަތްކާޑެއް ދެއްކުމުންނެވެ.

މިމޮޅާއެކު ރެއާލް ދެ ވަނައިގައި އޮތީ 19 މެޗުން 45 ޕޮއިންޓާއެކުއެވެ. އެއް ވަނައިގައި ބާސެލޯނާ އޮތީ 50 ޕޮއިންޓާއެކުއެވެ.