އުނގޫފާރާއި ތިނަދޫގައި މިއަހަރު ޓީޓީ ސެންޓަރު އަޅާ ޑިވެލޮޕްމަންޓު ޕްރޮގްރާމްތައް ފަށަނީ
1 ފެބުރުއަރީ 2023 | ބުދަ 09:16ޕްރޮގްރާމް ފުރަތަމަ ފެށީ ފުވައްމުލަކު ސިޓީގައި
ޓީޓީ އެސޯސިއޭޝަންގެ ނައިބުރައީސް ޝިއުރީ
ރ.އުނގޫފާރާއި ގދ.ތިނަދޫގައި މިއަހަރު ޓޭޓބަލް ޓެނިހުގެ ޔޫތު ޑިވެލޮޕްމަންޓް ޕްރޮގްރާމްތައް ފަށާނެކަމަށް އެސޯސިއޭޝަނުން ބުނެފިއެވެ. އެސޯސިއޭޝަންގެ ނައިބުރައީސް އިބްރާހީމް ޝިއުރީ ބުނީ ވަރަށް އަވަހަށް އުނގޫފާރާއި ތިނަދޫގައިވެސް ޕްރޮގްރާމްތައް ފެށޭނެކަމަށް އުއްމީދުކުރާކަމަށެވެ.
މިދިޔަ އަހަރު ޓީޓީ ސެންޓަރެއް އަޅާ ޑިވެލޮޕްމަންޓް ޕްރޮގްރާމްތައް ފެށީ ފުވައްމުލަކު ސިޓީގައެވެ. އެއީ އަތޮޅުތަކަށް ޓީޓީ ފުޅާކުރުމަށް އެސޯސިއޭޝަންގައި އޮތް ޕްލޭންގެ ފެށުމެވެ. އެސޯސިއޭޝަންގެ ވިސްނުމަކީ 5 ސަރަހައްދެއްގައި ސެންޓަރުތައް އަޅާ ޑިވެލޮޕްމަންޓަށް މަސައްކަތްކުރުމެވެ. އެކަމަށް ލިބުނު އެންމެ ބޮޑު ހިތްވަރަކީ ފުވައްމުލަކުގައި ޑިވެލޮޕްމަންޓް ޕްރޮގްރާމްތައް ފެށިފަހުން ބޭއްވި ފުރަތަމަ ޤައުމީ މުބާރާތުގައި އެސިޓީގެ ކުޅުންތެރިން ނެރުނު ރަނގަޅު ނަތީޖާއެވެ.
ރާއްޖޭގައި ހުނަރުވެރި ކުޅުންތެރިން ތިބިކަން ފުވައްމުލަކުން ނެރުނު ނަތީޖާއިން ފެންނަން އެބައޮތް ކަމަށާއި, އުއްމީދަކީ އެޕްރޮގްރާމް ހަމަ ވީހާވެސް އަވަހަކަށް އެހެން އަތޮޅުތަކުގައިވެސް ފެށުންކަމަށް ޝިއުރީ ވިދާޅުވިއެވެ. ފދުރު މުސްތަޤްބަލަށް އެސޯސިއޭޝަންގެ އުއްމީދަކީ 19 އަތޮޅުގައިވެސް ޕްރޮގްރާމް ފެށުމެވެ.
