މުދަލު ޒަކާތުގެ ނިޞާބު ބޮޑުކޮށްފި
30 ޖެނުއަރީ އިން ފެށިގެން ރާއްޖޭގައި މުދަލު ޒަކާތް ވާޖިބުވާ، ނިޞާބަކީ، 7062.65 ރުފިޔާ
ޒަކާތް ދިނުން
މުދަލު ޒަކާތުގެ ގޮތުގައި ދައްކަންޖެހޭ ނިޞާބު އިސްލާމިކް މިނިސްޓްރީން އިއްޔެ ބޮޑުކޮށްފިއެވެ.
އިސްލާމިކް މިނިސްޓްރީން ބުނެފައިވާ ގޮތުގައި 30 ޖެނުއަރީ އިން ފެށިގެން ރާއްޖޭގައި މުދަލު ޒަކާތް ވާޖިބުވާ، ނިޞާބަކީ، 7062.65 ރުފިޔާއެވެ. މިއީ އެންމެ ފަހުން ކަނޑައެޅި ނިޞާބާ އަޅާ ބަލާއިރު 1285.2ރުފިޔާގެ ބޮޑު އަދަދެކެވެ. މިދިޔަ ސެޕްޓެމްބަރު މަހު ކަނޑައަޅާފައިވާ މުދަލު ޒަކާތުގެ ނިޞާބު ހަމަވާ މިންވަރަކީ، 5777.45 ރުފިޔާއެވެ.
އާންމު ގޮތެއްގައި މުދަލުގެ ނިސާބަށް ބަދަލު އަންނަނީ ދުނިޔޭގެ ބާޒާރުގައި ރަނާއި ރިހީގެ އަގަށް އަންނަ ބަދަލުންނެވެ. ރާއްޖޭގައި ޒަކާތުގެ ނިޞާބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ. ރިހީގެ އަގަށް އަންނަ ބަދަލަކާ ގުޅިގެން ޒަކާތުގެ ގޮތުގައި ދައްކަންޖެހޭ ފައިސާގެ މިންވަރުވެސް ބަދަލުވެގެންދެއެވެ.
ރަނާއި ރިހި ބާޒާރުގައި ލިބެން ހުންނަ އަގު ހާމަކުރަނީ ރާއްޖޭގެ ސެންޓްރަލް ބޭންކް (އެމްއެމްއޭ)އިންނެވެ. އިލްމުވެރިން ވިދާޅުވާގޮތުގައި ރާއްޖެފަދަ ގައުމުތަކުގައި ޒަކާތުގެ ނިޞާބު ކަނޑައެޅުމުގައި ފަގީރުންނަށް އެންމެ ރަނގަޅު ގޮތަކީ ރިހީގެ އަގަށް ބިނާކޮށް ޒަކާތުގެ ނިޞާބު ކަނޑައެޅުމެވެ.
ނިޞާބު ހަމަވާ ވަރަށް އަތުގައި ފައިސާހުރެ އަހަރެއް ހަމަވެއްޖެނަމަ އޭގެ ސާޅީސްބައިކުޅަ އެއްބައި މުދަލު ޒަކާތުގެ ގޮތުގައި ދެއްކުމަކީ ދީނީ ގޮތުން ވާޖިބެކެވެ. ޒަކާތްދިނުމަކީ ދީނުގެ ފަރުޟުތަކުގެ ތެރެއިންވާ ފަރުޟެކެވެ. އަދި އިސްލާމްދީނުގެ ފަސް ރުކުނުގެ ތެރެއިން ތިންވަނަ ރުކުންވެސް މެއެވެ. އެހެންކަމުން ޒަކާތް ދެއްކުމުގެ ޝަރުތު ފުރިހަމަވާ ކޮންމެ މުސްލިމަކު ޒަކާތް ދެއްކުމަކީ ވާޖިބެކެވެ.
މީގެ ކުރިން މުދަލު ޒަކާތް އިސްލާމިކް މިނިސްޓްރީން ބަލައިގަތް ނަމަވެސް، 2016 ވަނަ އަހަރުން ފެށިގެން މުދަލު ޒަކާތް ބަލައިގަންނަނީ މީރާއިންނެވެ.
މިރާގެ ތަފާސްހިސާބުތައް ދައްކާ ގޮތުގައި މިދިޔަ އަހަރު ނިމުނުއިރު މުދަލު ޒަކާތުގެގޮތުގައި 91.5 މިލިއަން ރުފިޔާ ވަނީ އެ އިދާރާއިން ބަލައިގެންފައެވެ. އެގޮތުން، މިދިޔަ އަހަރުގެ ޑިސެމްބަރު މަސް ނިމުނުއިރު މުދަލު ޒަކާތުގެ ގޮތުގައި 91،539،895ރ. (ނުވަދިހަ އެއް މިލިއަން ފަސްލައްކަ ތިރީސް ނުވަ ހާސް އަށްސަތޭކަ ނުވަދިހަ ފަސް ރުފިޔާ) ވަނީ ބަލައިގެންފައެވެ. މިއީ 2021 ވަނަ އަހަރު ބަލައިގަތް އަދަދަށްވުރެ 0.4 އިންސައްތަ އިތުރު އަދަދެކެވެ. 2021 ވަނަ އަހަރު ނިމުނުއިރު މީރާއިން މުދަލު ޒަކާތުގެ ގޮތުގައި ބަލައިގެންފައިވަނީ 91،519،250ރ. (ނުވަދިހަ އެއް މިލިއަން ފަސް ލައްކަ ނަވާރަ ހާސް ދުއިސައްތަ ފަންސާސް ރުފިޔާ)އެވެ.
މިދިޔަ އަހަރު މީރާއިން ބަލައިގެންފައިވާ މުދަލުޒަކާތުގެ ތަފާސްހިސާބުތައް ދައްކާގޮތުގައި، 91.4 މިލިއަން ރުފިޔާ ބަލައިގެންފައިވަނީ ދިވެހި ފައިސާއިންނެވެ. އަދި 8،315 ޑޮލަރު ވަނީ ބަލައިގެންފައެވެ.
