ޕޮލިސް ރިސަރޗް އެންޑް އިނޮވޭޝަން ކޮންފަރެންސް: 10 ދާއިރާއަކުން ރިސަރޗް ހުށަހަޅާނެ
30 ޖެނުއަރީ 2023 | ހޯމަ 02:57ކޮންފަރެންސްގައި މުޖުތަމައާ ގުޅިގެން ކުށްކުރުން ހުއްޓުވުމަށް ކުރެވިދާނެ ކަންކަމާ ގުޅޭގޮތުން މަޝްވަރާކުރެވިގެންދާނެ ކަމަށް ހޯމް މިނިސްޓްރީ އިން ބުނޭ
ފުލުހުންގެ ހަރަކާތެއް
އަންނަ މާރޗް މަހު ބާއްވާ ޕޮލިސް ރިސަރޗް އެންޑް އިނޮވޭޝަން ކޮންފަރެންސަށް 10 ދާއިރާއަކުން ރިސަރޗް ހުށަހަޅާނެ ކަމަށް ޕޮލިސް ބޯޑުގެ ވައިސް ޗެއަރޕަރސަން އަހުމަދު ފަޔާޒް ހަސަން ވިދާޅުވެއްޖެއެވެ.
ފަލަ ސުރުޚީ ޕްރޮގްރާމްގައި ވާހަކަދައްކަވަމުން އޭނާ ވިދާޅުވީ ފައިނޭންޝަލް ކްރައިމް، ރިހިބިލިޓޭޝަން، އޮފިސަރ ވެލްބިއިން، މެރިޓައިމް ސެކިއުރިޓީ، މަގުމަތީގެ ސަލާމަތާއި ރައްކާތެރިކަން، ކްރައިމް ޕްރިވެންޝަން، ނޭޝަނަލް ސެކިއުރިޓީ އެންޑް އެންޓި ޓެރަރިޒަމް އަދި ސައިބަރ ކްރައިމްފަދަ ދާއިރާތަކުން އެ ކޮންފަރެންސަށް ރިސަރޗް ހުށަހަޅާނެ ކަމަށެވެ. ޕޮލިސް ރިސަރޗް އެންޑް އިނޮވޭޝަން ކޮންފަރެންސްގައި ކުށްކުރުމާ ގުޅޭގޮތުންނާއި، ސަލާމަތީ ޚިދުމަތް އިތުރަށް ތަރައްގީކުރުމަށް މަޝްވަރާކުރެވޭނެ ކަމަށް ވެސް އޭނާ ވިދާޅުވިއެވެ. އަހުމަދު ފަޔާޒް ހަސަން ވިދާޅުވީ އެފަދަ ކޮންފަރެންސެއްގެ ބޭނުމަކީ ފުލުހުންގެ ޚިދުމަތާމެދު ރިސަރޗްގެ ނަޒަރަކުން ބެލުން ކަމަށެވެ. އަދި މުޖުތަމައުގެ ސަލާމަތީ ޚިދުމަތްދޭ ހުރިހާ ފަރާތްތަކާއި އެކަމަށް ޝައުގުވެރިކަން ހުރި ފަންނީ އުސްތާޛުންނާއި، ޔުނިވަރސިޓީ އަދި ކޮލެޖުގެ އިތުރުން ޖަމިއްޔާތަކުގެ ބައިވެރިވުން ހިމެނޭހެން އެކުގައި މަސައްކަތްކުރުން ކަމަށެވެ. ފުލުހުންގެ ޚިދުމަތް ތަރައްޤީ ކުރެވިދާނެ ގޮތާ މެދު އެ ކޮންފަރެންސްގެ ތެރެއިން މަޝްވަރާކުރާނެ ކަމަށް ވެސް އޭނާ ވިދާޅުވިއެވެ.
މިއީ މިފަދަ ފުރަތަމަ ކޮންފަރެންސް ކަމަށް ވާއިރު މި ކޮންފަރެންސް ބާއްވަން ނިންމާފައިވަނީ އަންނަ މާރޗް މަހުގެ 18 އިން 20 އަށެވެ. އިލްމީ ބޭފުޅުންނާއި މިކަމާ ގުޅޭ ސްޓޭކްހޯލްޑަރުން އެއް މޭޒަކަށް ގެނެވިގެން މި ކޮންފަރެންސް ކުރިއަށްގެންދަން ވަނީ ނިންމާފައެވެ.
މި ކޮންފަރެންސް ކުރިއަށްގެންދާނީ 3 ބަޔަކަށް ބަހާލައިގެން ކަމަށާއި، ފުރަތަމަ ދުވަހު ތަފާތު ދާއިރާތަކުން ޕޭޕަރު ހުށަހެޅިގެންދާނެ ކަމަށާއި، ދެވަނަ ދުވަހު މުޖުތަމައާ ގުޅިގެން ކުށްކުރުން ހުއްޓުވުމަށް ކުރެވިދާނެ ކަންކަމާ ގުޅޭގޮތުން މަޝްވަރާކުރެވިގެންދާނެ ކަމަށް ހޯމް މިނިސްޓްރީ އިން ބުނެއެވެ. އަދި ސެކިއުރިޓީ ސެކްޓަރުގެ މަސައްކަތްތައް ޕަބްލިކަށް ދައްކާލުމަށް އެކްސްޕޯއެއް ބޭއްވިގެންދާނެ ކަމަށް ވެސް އެ މިނިސްޓްރީ އިން ބުނެއެވެ.
