އިނގިރޭސި އެފްއޭކަޕްގެ ހަތަރުވަނަ ބުރުން ލިވަޕޫލް ކަޓައިފިއެވެ. ލިވަޕޫލް މުބާރާތުން ކަޓުވާލީ ބްރައިޓަންއެވެ.
ލިވަޕޫލް ބަލިކޮށް އިނގިރޭސި އެފްއޭކަޕްގެ ފަސްވަނަ ބުރުން ބްރައިޓަން ޖާގަހޯދީ 2-1ން ކުރި ހޯދައިގެންނެވެ. މެޗު ބްރައިޓަންއިން ކާމިޔާބުކުރީ ލިވަޕޫލް ފުރަތަމަ ލަނޑު ޖަހައި ކުރި ހޯދާފައިވަނިކޮށެވެ. 30 ވަނަ މިނިޓްގައި ސަލާހު ތަނަވަސްކޮށްދިން ފުރުސަތަކުން ކުރި ހޯދައިދިނީ އެލިއޮޓްއެވެ. ނަމަވެސް ހާފް ނިމުމުގެ ކުރިން ޑަންކް ލަނޑު ޖަހައި ބްރައިޓަންއަށް ނަތީޖާ ހަމަހަމަކޮށްދިނެވެ. ލިވަޕޫލް ކަޓުވާލައި ބްރައިޓަން މުބާރާތުގެ ފަސްވަނަ ބުރަށް ގެންގޮސްދިނީ މެޗުގެ އިތުރު ވަގުތުގައި ލަނޑު ޖަހައިގެން، ޖަޕާނު ފޯވާޑް މިޓޯމާއެވެ.
ލިވަޕޫލަކީ މިދިޔަ ސީޒަންގައި އެފްއޭކަޕްގެ ޗެމްޕިއަން ޓީމެވެ. ނަމަވެސް މިސީޒަންގައި އެޓީމް އޮތީ ލީގުގެ ގަދަ ހަތަރަކުން ޖާގައެއް ލިބޭނެކަމާމެދުވެސް ސުވާލު އުފެދޭ ހިސާބުގައެވެ.
