ކޯލިޝަން ސަރުކާރަކަށް ދިއުމަށް ޕާޓީތަކާއެކު އަދި މަޝްވަރާއެއް ނުކުރޭ
ރައީސް ޞާލިހު ވަނީ ކޯލިޝަން ސަރުކާރެއް އުފެއްދެވުމުގެ އިޝާރާތެއް ދެއްވާފައި
ސަރުކާރު ކޯލިޝަންގައި ހިމެނޭ ލީޑަރުން
ރިޔާސީ އިންތިޚާބަށް ޕާޓީތަކުން ކޯލިޝަން ހެދުމާގުޅޭގޮތުން އަދި މަޝްވަރާކުރެވިފައިނުވާކަމަށް ކޯލިޝަންގައި ހިމެނޭ ޕާޓީތަކުން ބުނެފިއެވެ.
ކުރިއަށްއޮތް 2023 ގެ ރިޔާސީ އިންތިޚާބަށް އެމްޑީޕީން ކެނޑިޑޭޓަކު ނެރުމަށް ބޭއްވި ޕްރައިމަރީގައި، ރައީސް މުހައްމަދު ނަޝީދާ ވާދަކުރައްވައި ރައީސް އިބްރާހިމް މުހައްމަދު ޞާލިހު ވަނީ ބޮޑުތަނުން އިންތިޚާބު ކާމިޔާބުކުރައްވާފައެވެ. މިއާއެކު 2023 ގެ ރިޔާސީ އިންތިޚާބުގައި އެމްޑީޕީން ނިކުންނާނެ ކެނޑިޑޭޓަކީ ރައީސް އިބްރާހިމް މުހައްމަދު ޞާލިހު ކަން މިވަނީ ޔަގީން ވެފައެވެ.
އިންތިޚާބު ކާމިޔާބުކުރެވުމާއެކު ރައީސް ޞާލިހު ގެންދަވަނީ ކޯލިޝަން ސަރުކާރަކަށް ވަކާލާތު ކުރައްވަމުން ގެންދަވާކަމަށް ވިދާޅުވަމުންނެވެ. އެމްޑީޕީ އެކަނި އޮވެގެން ވެރިކަން ކުރާތަން ދެކެން ބޭނުންފުޅުވާ ކަމަށާއި ނަމަވެސް އަދި އެއީ އެ ޕާޓީއަށް އެކަނި ކުރަން ދަތި ކަމެއް ކަމަށް ރައީސް ވަނީ ވިދާޅުވެފައެވެ.
މިހާރުވެސް ސަރުކާރު ކޯލިޝަންގައި އެމްޑީޕީގެ އިތުރުން ޖުމްހޫރީ ޕާޓީ، މޯލްޑިވްސް ރިފޯމް މޫވްމެންޓް (އެމްއާރްއެމް) އަދި އަދާލަތު ޕާޓީ ހިމެނޭއިރު، ދެވަނަ ދައުރަކަށް ކޯލިޝަން ސަރުކާރު ދެމެހެއްޓުމަށް މިހާތަނަށް ޕާޓީތަކާއެކު މަޝްވަރާކޮށްފައިނުވާކަމަށް ޕާޓީތަކުން ވަނީ ބުނެފައެވެ.
ރާއްޖެއެމްވީއަށް މައުލޫމާތުދެއްވަމުން ޖުމްހޫރީ ޕާޓީގެ ޗީފް ސްޕޯކްސްޕަރސަން އަލީ ޞާލިހު ވިދާޅުވީ ކޯލިޝަން ސަރުކާރަކަށް ދިއުމަށް އަދި މިހާތަނަށް އެ ޕާޓީއާއެކު މަޝްވަރާކޮށްފައިނުވާކަމަށެވެ. އަދި ކޯލިޝަން ސަރުކާރަކަށް ދިއުމާދޭތެރޭ އެ ޕާޓީގެ ތެރެއިންވެސް އަދި ވަކި ގޮތެއް ނިންމާފައިނުވާކަމަށާއި، ކުރިއަށް އޮތް އެޕާޓީގެ ގައުމީ ޖަލްސާއިން މިކަމާ ގުޅޭގޮތުން ވަކި ގޮތެއް ނިންމާނެ ކަމަށް އަލީ ޞާލިހު ވިދާޅުވިއެވެ.
އަދާލަތު ޕާޓީގެ ފަރާތުން އެ ޕާޓީގެ ސްޕޯކްސްޕަރސަން އަލީ ނަޒީރު ވިދާޅުވީ މިހާތަނަށް އެއްވެސް ޕާޓީއަކާއެކު މިފަދަ މަޝްވަރާއެއް ކޮށްފައިނުވާކަމަށެވެ. އެހެންނަމަވެސް މި މަޝްވަރާތަކަށް ހުޅުވާލާފައިވާކަމަށް ނަޒީރު ވިދާޅުވިއެވެ.
އެމްއާރްއެމްއިން ކުރިއަށްއޮތް ރިޔާސީ އިންތިޚާބާ ގުޅޭގޮތުން އަމަލުކުރާނެ ގޮތާ ގުޅޭގޮތުން ޕާޓީގެ އާންމު މެމްބަރުންގެ ޚިޔާލާ މަޝްވަރާ ހޯދަމުންދާކަމަށް އެ ޕާޓީގެ ތަރުޖަމާނު އިސްމާއިލް ނާއިލް ނަޝީދު ވިދާޅުވިއެވެ. އަދި މިފަދަ ހުށަހެޅުމެއް ލިބިއްޖެނަމަ އެކަމުގެ މަޝްވަރާތައްވެސް ޕާޓީގެ ތެރެެއިން ކުރާނެ ކަމަށް ނާއިލް ވިދާޅުވިއެވެ.
ނާިއލް އިތުރަށް ވިދާޅުވީ އެމްއާރުއެމުން ދެމިތިބޭނީ އެޕާޓީން ގަބޫލުކުރާ އިސްލާހީ އުސޫލުތަކާ އެއް ވިސްނުމެއް ގެންގުޅޭ ބަޔަކާ އެކުގައި ކަމަށެވެ. މި އުސޫލުތަކާ އެއްގޮތަށް އަމަލުކުރަން އެ ޕާޓީން އިސްކަންދޭނެ ކަމަށް ނާއިލް ވިދާޅުވިއެވެ.
ކޯލިޝަން ހައްދަވަން ބޭނުންފުޅުވެލައްވާކަމުގެ އިޝާރާތެއް ރައީސް ޞާލިހު ދެއްވާފައިވަނީ، އެމްޑީޕީއަކީ އެންމެ ބޮޑު އަދި އެންމެ ގިނަ ބައެއްގެ ތާއީދު އޮތް ޕާޓީއަށްވި ނަމަވެސް އިންތިޚާބު ކާމިޔާބު ކުރަން 50 އިންސައްތައަށްވުރެ އިތުރަށް ވޯޓު ބޭނުންވާތީއެވެ. މިކަން އެމްޑީޕީއަށް އެކަނި އޮވެގެން އަދި ކުރެވެން ނެތްކަމަށް ރައީސް ސާލިހު ވަނީ ވިދާޅުވެފައެވެ.
