ބޮޑު މަރާމާތަށްފަހު އޮލިމްޕަސް ރަސްމީކޮށް ހުޅުވުން އަންނަ ހޮނިހިރު ދުވަހުގެރޭ
ރަސްމިއްޔާތު ޝަރަފުވެރި ކޮށްދެއްވާނީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
އޮލިމްޕަސް
އޮލިމްޕަސް ޒަމާނީ ފެންވަރަށް ތަރައްގީކުރުމަށް ކުރަމުންދާ މަސައްކަތް ނިންމައި، އައު ބަދަލުތަކާއެކު ހުޅުވުމުގެ ރަސްމިއްޔާތު ބޭއްވުމަށް ތައްޔާރުވެއްޖެއެވެ.
އެކަމާ ގުޅޭގޮތުން ހެރިޓޭޖް މިނިސްޓްރީން ބުނީ، އޮލިމްޕަސް މަރާމާތުކޮށް، ވަޞީލަތްތައް އަދާހަމަކުރުމަށްފަހު އަލުން ހުޅުވުމުގެ ރަސްމިއްޔާތު 4 ފެބްރުއަރީ 2023 ވާ ހޮނިހިރު ދުވަހުގެރޭ ބޭއްވުމަށް ހަމަޖެހިފައިވާ ކަމަށެވެ.
މި ރަސްމިއްޔާތު ޝަރަފުވެރި ކޮށްދެއްވާނީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހުކަމަށް މިނިސްޓްރީން މައުލޫމާތު ދެއެވެ.
އަދި މި ރަސްމިއްޔާތުގައި މުނިފޫނިފިލުވުމާއި ފަންނުވެރިކަމުގެ ދާއިރާގައި ކުރިން މަސައްކަތްކޮށްފައިވާ ފަރާތްތަކާއި މިހާރުވެސް މަސައްކަތްކުރަމުންދާ ފަރާތްތައް ބައިވެރިވެވަޑައިގަތުމަށް ވަނީ ހަމަޖެހިފައެވެ.
އޮލިމްޕަސް ހޯލް އަޕްގްރޭޑިން ޕްރޮޖެކްޓަކީ އިންޑިއާގެ ހިލޭ އެހީގެ ދަށުން ހިންގަމުންދާ މަޝްރޫއެކެވެ. އެގޮތުން އޮލިމްޕަސް އިމާރާތުގެ އާބާތުރަ ފިލުވައި، ވަސީލަތްތައް ތަރައްގީކުރުމުގެ މަސައްކަތުގެ ދެވަނަ ފިޔަވަހީގެ މަސައްކަތް ފަށާފައިވަނީ މިދިޔަ އަހަރުގެ މާރޗް 8 ވަނަ ދުވަހުއެވެ.
ނޭޝަނަލް ސެންޓަރ ފޮރ ދި އާޓްސްއިން މިހާރު ވަނީ އޮލިމްޕަސް ކުއްޔަށް ހިފަން އެދޭ ފަރާތްތަކަށް އެޑްވާންސް ބުކިންއަށްވެސް ހުޅުވާލާފައެވެ.
އޮލިމްޕަސް އަލުން ބުކް ކުރަން ހުޅުވާލާއިރު، ކޮވިޑްގެ ހާލަތާއި ގުޅިގެން 2020 ވަނަ އަހަރު އޮލިމްޕަސް ބަންދު ކުރިއިރު ފިލްމު ދެއްކުމަށް އެތަން ބުކްކޮށް، އެޑްވާންސް ދައްކާފައިވާ ފަރާތްތަކަށް އިސްކަންދެވޭނެ ކަމަށް އެ އިދާރާއިން ބުނެފައިވެއެވެ.
އެންސީއޭ އިން ބުނީ އޮލިމްޕަސް އިމާރާތުގެ ބޭރު ފާރުތަކާއި، ހުޅަނގު ފަރާތު ކޮރިޑޯގެ ފާރުތައް މަރާމާތުކޮށް ކުލަލުމުގެ މަސައްކަތް ނިމިފައިވާކަމަށެވެ. އަދި އޮލިމްޕަހުގެ ހުޅަނގު ފަރާތުގައި ކުރިން ބޭނުންކުރި އޭޓީއެމް ހުރިބައި އޮލިމްޕަހުގެ ކެންޓީނެއްގެ ގޮތުގައި ބޭނުންކުރުމަށް އެތެރޭގެ ފާރުތަކަށް ގެންނަންޖެހޭ ބަދަލުތައް ގެނެސް ތަރައްގީ ކުރުމުގެ މަސައްކަތްތައްވެސް ވަނީ ކޮށްފައެވެ.
