އުރުގުއޭގެ ފުޓުބޯޅަ ފެޑެރޭޝަން ޖޫރިމަނާކޮށް، އެ ގައުމުގެ ހަތަރު ކުޅުންތެރިޔަކު ސަސްޕެންޑު ކުރުމަށް ދުނިޔޭގެ ފުޓުބޯޅައިގެ މައި އިދާރާ (ފީފާ)އިން ނިންމައިފިއެވެ.

ފީފާއިން މިގޮތަށް ނިންމީ، މިދިޔަ އަހަރުގެ ޑިސެމްބަރު މަހު ގަތަރުގައި ނިމުނު ފީފާ ވޯލްޑް ކަޕް މުބާރާތުގައި އުރުގުއޭގެ ކުޅުންތެރިންގެ ފަރާތުން ފެނުނު އަމަލާ ގުޅިގެންނެވެ. މުބާރާތުގައި އުރުގުއޭއިން ކުޅުނު ފަހު މެޗަށްފަހު ކުޅުންތެރިން ވަނީ ރެފްރީންނާމެދު ހިތްހަމަ ނުޖެހި، ހަމަނުޖެހުން ހިންގާފައެވެ. އޭގެތެރޭގައި މެޗުގެ ރެފްރީއާ ދިމާކުރުމާއި، ވީޑިއޯ އެސިސްޓެންޓް ރެފްރީ (ވީއޭއާރު) އަށް ހަމަލާ ދިނުންވެސް ހިމެނެއެވެ. އެ މެޗުން އުރުގުއޭ މޮޅުވިނަމަވެސް އެ ޓީމު މުބާރާތުން ކެޓީ ޖެހި ގޯލުން ސައުތު ކޮރެއާ ކުރި ހޯދުމުންނެވެ.

އެ މައްސަލަ ތަޙުގީގު ކުރުމަށްފަހު ފީފާއިން ނިންމާފައި ވަނީ އުރުގުއޭގެ ފުޓުބޯޅަ ފެޑެރޭޝަން 54،248 (ފަންސާސް ހަތަރު ހާސް ދުއިސައްތަ ސާޅީސް އަށެއް) ޑޮލަރުން ޖޫރިމަނާ ކުރުމަށެވެ. ސަސްޕެންޑުކުރި ހަތަރު ކުޅުންތެރިންނަކީ; އެޑިންސަން ކަވާނީ، ފެނާންޑޯ މުސްލޭރާ، ހޯސޭ ޖިމިނޭޒް އަދި ކެޕްޓާން ޑިއޭގޯ ގޮޑިން ހިމެނެއެވެ. މީގެ ތެރެއިން މުސްލޭރާއާއި ޖިމިނޭޒް ހަތަރު މެޗަށް ސަސްޕެންޑު ކުރިއިރު، ކަވާނީއާއި ގޮޑިން ސަސްޕެންޑުކޮށްފައި ވަނީ އެއް މެޗަށެވެ. ކަވާނީ ވަނީ ވީއޭއާރަށް ހަމަލާދީފައެވެ.