ރާއްޖޭގެ ފަތުރުވެރިކަމަށް 29 އިންސައްތައިގެ ކުރިއެރުމެއް

މިއަހަރުގެ ފުރަތަމަ 25 ދުވަހުގެ ތެރޭގައި 138،593 ފަތުރުވެރިން ރާއްޖެ އަތުވެއްޖެއެވެ.

ޓޫރިޒަމް މިނިސްޓްރީން އާންމުކޮށްފައިވާ ރާއްޖޭގެ ފަތުރުވެރިކަމުގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް އައި ފަތުރުވެރިންގެ އަދަދު 2022ގެ މި މުއްދަތާ އަޅާ ބަލާއިރު 29.7 އިންސައްތަ ވަނީ އިތުރުވެފައެވެ. މިއަހަރު ދުވާލެއްގެ މައްޗަށް އެވަރެޖު ކޮށް 5،544 ފަތުރުވެރިން އައިސްފައިވާކަމަށް ތަފާސްހިސާބުން ދައްކައެވެ. އަދި ފަތުރުވެރިން ރާއްޖޭގައި 8 ދުވަހު މަޑުކުރާކަމަށް ހިސާބުތައް ދައްކައެވެ.

2022 ވަނަ އަހަރުގެ މި މުއްދަތުގައި ރާއްޖެ އައިސްފައިވަނީ 106،826 ފަތުރުވެރިންނެވެ. 2021 ގެ މި މުއްދަތުގައި އައިސްފައިވަނީ 73،501 ފަތުރުވެރިންނެވެ. އެހެންކަމުން މިއަހަރު އައި ފަތުރުވެރިން ފާއިތުވި ދެ އަހަރާ އަޅާ ބަލާއިރުވެސް ވަނީ އިތުރުވެފައެވެ.

މިހާތަނަށް ފަތުރުވެރިން އަންނަ ޓޮޕް މާކެޓުގެ ގޮތުގައި އޮތް ރަޝިއާއިން 19،389 ފަތުރުވެރިން ވަނީ އައިސްފައެވެ. ދެވަނައިގައި އޮތް އިންޑިއާއިން މިހާތަނަށް 14،350 ފަތުރުވެރިން އައިސްފައިވާއިރު، ތިންވަނައިގައި އޮތް އިޓަލީން 13،848 ފަތުރުވެރިން އައިސްފައިވެއެވެ. މީގެ އިތުރުން ޓޮޕް މާކެޓުތަކުގެ ތެރޭގައި އިނގެރޭސިވިލާތް، ޖަރުމަނު، އެމެރިކާ، ފްރާންސް، ޗައިނާ، ކަޒަކްސްތާން އަދި ސައުތު ކޮރެއާ ހިމެނެއެވެ.

މިމަހުގެ 18 ވަނަ ދުވަހު ޗައިނާއިން ރާއްޖެއަށް ފަތުރުވެރިން އަންނަން ފަށާފައިވާއިރު، ހަފްތާއެއް ނުވަނީސް އެ މާކެޓު ވަނީ ޓޮޕް މާކެޓުތަކުގެ ތެރޭގައި ހިމެނިފައެވެ. މިހާތަނަށް އައިއިރު 4،477 ފަތުރުވެރިން އައިސްފައިވާކަމަށް ތަފާސްހިސާބުތަކުން ދައްކައެވެ.