ޒަމާނާއެކު ދިރިއުޅުމަށް އަންނަ ބަދަލުތަކުގެ ތެރެއިން އެންމެ ފަސޭހައިން ހަނދާން ނެތިކޮށްލެވޭ އެކައްޗަކީ އަމިއްލަ ވަންތަ ކަމޭ ދެންނެވުމަކުން ގޯހެއް ނެތެވެ. ބަވަނަ ވެފައިވާ އަދުގެ ދުނިޔޭގައި އެކި ކަންކޮޅުތަކުން ފެންނަ މަންޒަރުތަކަށް ހިތް ދީލާލަމުން ގޮސް، ޒަމާނުއްސުރެ ދަމަހައްޓަމުން އައި އެތައް އާދަކާދައެއް މާޒީވެ، ޘަޤާފަތުގެ އަރުޝީފަށް ލެވޭ ގޮތްވެ، އެވަރުން ނުވެގެން، ހަނދާނުންވެސް ފޮހެލެވޭ ގޮތް މެދުވެރިވެއެވެ. އެފަދަ ގޮތަކަށް އެންމެ ފަސޭހައިން ދޫކޮށްލެވިފައި އޮންނަ އެކައްޗަކަށް ވަނީ ކާބަފައި ޒަމާނުއްސުރެ ކެއިންބުއިމުގައި ބޭނުންކޮށް އުޅުނު ބައެއް ކަހަލަ ސަމާނެވެ. ނަމަވެސް ކެއިންބުއިމުގެ އަމިއްލަ ވަންތަ ޘަޤާފަތަކީ، ތަރިކައިގެ ކައްޓާއަކުން ކިރާއިރު، ފިސާރި އަގުހުރި އެއްޗެކެވެ.
ޢުރުދުންގައި މިފަދަ ގޮތަކަށް ހަނދާން ނެތިކޮށްލެވިފައިވާ ބައެއް ކަހަލަ ކޭންތައް އަލުން އަނބުރާ ސުފުރާ މައްޗަށް ގެނެސްދިނުމުގެ މަސައްކަތުގައި ހަރަކާތްތެރި ވަމުން ދަނީ އަންހެނުންގެ ގުރޫޕަކުންނެވެ. ދުނިޔޭގެ ތަރިކައިގެ ލިސްޓުންގެ ޖާގަ ހޯދާފައިވާ ޢުރުދުންގެ އައްސުލްތޫސްއޭ ކިއުނު ސިޓީގައި ހަރަކާތްތެރިވާ އަންހެނުންގެ މި ގުރޫޕުން ކޮންމެ ހަފުތާ ބަންދެއްގައި އެއްތަނަކަށް ޖަމާވެ، ޢުރުދުންގެ ޘަޤާފީ ކޭންތައް ތައްޔާރު ކުރަނީ ފިސާރި ފޯރީގައެވެ.
މި ގުރޫޕުގެ އަމާޒަކީ، އަދުގެ ޖީލުން ހަނދާން ނައްތާލާފައި ވާ ޘަޤާފީ ކޭންތައް ނުވަތަ ޢުރުދުންގެ ކެއިންބުއިމުގެ ތަރިކަ ދިރުވާ އާލާ ކުރުމެވެ. އަދުގެ ޒުވާން ވޮލަންޓިއަރުންނަށް އެ ކޭންތަކުގެ ރެސިޕީތައް ދަސްކޮށްދިނުމެވެ. އަދި މަގުމަތިން ފެންނަ މީހުންނަށް އެ ކޭންތައް ފޯރުކޮށްދިނުމެވެ.
މުޅިން ހެން ނެތި ގޮސްފައިވާ ކޭންތައް އެއްތަނަކަށް ޖަމާ ކުރުމުގެ މަސައްކަތް އަހަރެން ފެށީ. މުޅިން ނެތި ގޮސްފައޭ ބުނީމަ، އޭގެ މާނައަކީ، އަސްލުވެސް ހަމަ، މުޅިންހެން ނެތިގޮސްފައޭ. އުތުރާ ދެކުނަށް ބަލާއިރު ވަރަށް މަދު ޢަދަދެއްގެ އަންހެނުން ދަނީ މި ކޭންތައް ޢިޔާދަ ކުރަމުން. މި ހަރަކާތުގެ އެންމެ ބޮޑު އެއް އަމާޒަކީ، ޢުރުދުންގެ އަތް ނުލެވޭ ތަރިކަ، މިސާލަކަށް ކޭންތަކާއި، އެތަކެއްޗަކާ މެދު އަހަރަމެން ފަޚްރުވެރިވާ ހެދުންތަކާއި އަތްތެރިމަސައްކަތުގެ އުފެއްދުންތައް ގިނަ ދުވަހަށް ދެމި ހުންނާނެ ގޮތް ހެދުން.ޘީރާ ޢަރަބިއްޔާތު؛ "ގްރޭންޑް މަދަރާސް ޑިޝަސް ބައި ދަ ހޭންޑްސް އޮފް މަދަރސް" ގެ ކޯފައުންޑަރ
"ގްރޭންޑް މަދަރާސް ޑިޝަސް ބައި ދަ ހޭންޑްސް އޮފް މަދަރސް" ނުވަތަ "މާމަމެންގެ ކޭން، މަންމަމެންގެ އަތުން" ގެ ނަމުގައި ހިންގާ މި ހަރަކާތުން މިއަދު ތައްޔާރު ކުރީ 'ރަޝޫފް' ނަމަކަށް ކިއާ ސޫޕެކެވެ. އެކި ކަހަލަ މުގާއި ޔޯގަޓް ބޭނުންކޮށްގެން ތައްޔާރު ކުރާ، ޢުރުދުންގެ ޘަޤާފީ ސޫޕްއެކެވެ.
މިކަހަލަ ޘަޤާފީ ކޭންތައް، ދުވަސްކޮޅަކުން މުޅިން ގެއްލި ހިނގައިދާނެ. އެއްވެސް މީހަކު ނޫޅޭ ވިއްޔާ މި ކައްކާކަށް. މި ކަހަލަ ޘަޤާފީ ކޭންތައް ފޯރުކޮށްދިނީމަ، މާޒީގެ ތެރެއަށް ދަތުރެއް ކޮށްލެވޭ ކަހަލަ. އަހަރަމެންގެ ކޭންބުއިމުގެ ކަންކަމާއި އާމްދަނީ ހޯދަން ބަރޯސާވި އަމިއްލަ ފަސްގަނޑަށް ދަތުރުކޮށްލެވޭ ފަދަ ހަމަ. މި ކޭންތަކަކީ މަޤުބޫލު ތަރިކައެއް. ދުވަސްވީ، މުސްކުޅި ތަރިކައެއް އެކަމަކު އާ އެއްޗެއް.ޝާހިރު އަބޫ ރުއްމާން؛ ޢުރުދުންގެ ރައްޔިތެއް
މީގެ ދޮޅު އަހަރެއްހާ ދުވަސްކުރިން މި ހަރަކާތް ފެށުމުގައި އިސް ދައުރެއް އަދާކޮށް، އަދި މިހާރުވެސް އެކަމުގައި މުހިންމު ބައިވެރިއެއްގެ ގޮތުގައި ހުރި ޘީރާ ޢަރަބިއްޔާތު ބުނި ގޮތުގައި، ކޭންތަކެއް ގެއްލިގެން ދިއުމަކީ ލަދު ގަންނަން ޖެހޭ ކަމެއް ކަމަށެވެ.
މިކަހަލަ ކޭންތައް ނެތި ދިއުމަކީ ލަދު ގަންނަން ޖެހޭ ކަމެއް. މީ ހަށިގަނޑަށްވެސް ވަރަށް ފައިދާ ހުރި ކޭންތަކެއް. ދެވަނަ ކަމަކަށް، މިކަހަލަ ކޭންތައް ތައްޔާރު ކުރާކަށް، އަތުން މާ ބޮޑު ޚަރަދެއް ނުހިނގާނެ. ތިން ވަނަ ކަމަކީ، ތަރިކަ ދިރުވާ އާލާ ކުރާ ޒުވާނުންނަށް ބާރު އަޅާ ކަން. އަހަރަމެން މި ތިބީ އަހަރަމެންގެ ޘަޤާފަތާއި އާދަކާދަތައް، އަހަރަމެންގެ ހަގު ޖީލުތަކަށް ފޯރުކޮށްދިނުމުގެ ޒިންމާ ކޮނޑު އަޅައިގެން. މިތަނުގަ ވޮލަންޓިއަރުންގެ ގޮތުގައި އެބަ އުޅޭ ޒުވާން އަންހެނުންނާއި ފިރިހެނުންނާއި ކުޑަ ކުދިންވެސް.ޘީރާ ޢަރަބިއްޔާތު؛ ގްރޭންޑް މަދަރާޒް ޑިޝަސް ބައި ދަ ހޭންޑްސް އޮފް މަދަރޒްގެ ކޯފައުންޑަރ
ޢުރުދުންގެ ކެއިންބުއިމުގެ ތަރިކައިގެ ބޮޑު ބައެއް ހިއްސާ ކުރަނީ ކިރާއި ގޮވާމުގެ އެކި ކަހަލަ ބާވަތްތައް ބޭނުން ކޮށްގެން ތައްޔާރު ކޮށްފައި ހުންނަ ކޭންތައް ކަން، 'ޖޯޑަން ހެރިޓޭޖް'އިން ކުރި ދިރާސާއަކުން ވަނީ ދައްކާފައެވެ.
ނެތި ގޮސްފައިވާ ބައެއް ކޭންތަކަކީ ތައްޔާރު ކުރަން މާ ބޮޑު ޚަރަދެއް ހިނގާ ކޭންތަކަކަށް ނުވި ކަމުގައި ވިއަސް، ދޮށީ ޢުމުރުގެ މައިން، އެމީހުންގެ ދަރިންނަށް، އެ ކޭންތަކުގެ ރެސިޕީތައް ހިއްސާ ކޮށްފައެއް ނެތް.ޘީރާ ޢަރަބިއްޔާތު؛ ގްރޭންޑް މަދަރާސް ޑިޝަސް ބައި ދަ ހޭންޑްސް އޮފް މަދަރސް ގެ ކޯފައުންޑަރ
ޢުރުދުންގެ ޤައުމީ ކޭމެއްގެ ގޮތުގައި ބަލާ މަންސަފްއަކީވެސް މިފަދަ ގޮތަކަށް ތައްޔާރު ކުރާ ކޭމެކެވެ. މަންސަފް ތައްޔާރު ކުރަނީ ހުތްވަންދެން ބަހައްޓާފައި ހުންނަ ޔޯގަޓްގައި ބަކަރި މަސް ކައްކައިގެންނެވެ. ބަތާއެކުގައި ކައި އުޅޭ މަންސަފްއަކީ ތަރިކައާ ބެހޭ އދގެ އިދާރާ (ޔުނެސްކޯ)އިން އެކުލަވާލާފައި އޮންނަ އަތް ނުލެވޭ ޘަޤާފީ ތަރިކައިގެ ލިސްޓުގައި ދާދި ފަހުން ހިމެނި ކޭމެކެވެ.
