10 އަހަރުގެ ކައިވެނި ރޫޅާލަން ފިރިމީހާ ހުށައެޅީ "ލައްޑޫ" ނޫން އެއްޗެއް ކާން ނުލިބޭ ކަމަށްބުނެ !

ކެއުމަށް "ލައްޑޫ" ނޫން އެއްޗެއް ނުލިބޭ ކަމަށް ބުނެ އިންޑިއާގެ ފިރިހެނަކު އޭނާގެ 10 އަހަރުވީ ކައިވެނި ރޫޅާލަން ފެމިލީ ކޯޓަށް ހުށައަޅައިފިއެވެ.

އިންޑިއާގެ އުތްރަޕްރަދޭޝްގައި ހިނގި މިހާދިސާގައި ފިރިމީހާ އޭނާގެ 10 އަހަރުވީ ކައިވެނި ރޫޅާލަން ފެމިލީ ކޯޓަށް ހުށައެޅުމާ ގުޅިގެން ކޯޓުގެ މުވައްޒަފުން ވެސް ތިބީ ބޮޑު ހައިރާންކަމެއްގެ ތެރޭގައި ކަމަށް ރިޕޯރޓްތައް ބުނެއެވެ. އެގޮތުން ފިރިމީހާއާ ހަވާލާދީ ރިޕޯރޓްތައް ބުނާގޮތުން އޭނާއަށް ދުވާލަކު ކެއުމަށް ލިބެނީ އެންމެ 8 ލައްޑޫއެވެ.

އަވަށްޓެރި އިންޑިޔާއިން މަޝްހޫރުވެ މިހާރު ދިވެހި ރާއްޖޭގައި ވެސް ވަރަށް އާންމުކޮށް ބޭނުންކުރަމުންދާ ފޮނިކާއެއްޗެއް ކަމަށްވާ ލައްޑޫއަކީ ހަކުރު ގިނަ ކާ އެއްޗެކެވެ. އަދި މިއީ އެއްފަހަރާ އެހާ ގިނައިން ކެއުން އެދެވޭ އެއްޗެއް ނޫން ނަމަވެސް އިންޑިއާގެ "ތަންތްރިކް" ނުވަތަ ބުޑިސްޓުންނާއި ހިންދޫއިން ތަބާވާ ފާދިރީއެއްގެ ލަފާގެ މަތިން އޭނާގެ އަނބިމީހާ ކޮންމެ ދުވަހަކުވެސް ފިރިމީހާއަށް ލައްޑޫ ކާންދޭން ފަށާފައިވަނީ ފިރިމީހާގެ ދިރިއުޅުން އޭގެ ސަބަބުން ރަނގަޅުވެ ދިރިއުޅުން ބާއްޖަވެރިވާނެ ކަމަށް ޤަބޫލު ކޮށްގެންނެވެ.

އެގޮތުން ހެނދުނު ގަޑީގައި 4 ލައްޑޫ އަދި ހަވީރު 4 ލައްޑޫގެ އިތުރުން ފިރިމީހާއަށް އިތުރު އެއްވެސް ކާއެއްޗެއް ނުދޭ ކަމަށް ފިރިމީހާ ވަނީ ކޯޓުގެ ފެމިލީ ކައުންސިލުގައި ބުނެފައެވެ.

އެގޮތުން 10 އަހަރުވީ މި ކައިވެނި ރޫޅޭ ހިސާބަށް ގޮސްފައިވާއިރު، އެ ދެމަފިރިންގެ 3 ދަރިން ވެސް ތިބެއެވެ.

އަޅުކަން ކުރުމަށްޓަކައި ވަރަށް ގިނަ ބޯދާ ޤަބޫލުކުރުންތަކަށް ތަބާވެ މިފަދަ ފާދިރީންގެ ބަހަށް ހެއްލިގެންދާ ގިނަ ބަޔަކު އިންޑިއާގެ އެކި ހިސާބުތަކުގައި އަދިވެސް އުޅޭއިރު، މި މައްސަލަ ބެލި ކައުންސިލުން ވެސް ބުނީ، އަނބިމީހާއާއި އޭނާގެ މުޅި އާއިލާ ވެސް އެ ތަންތްރިކްގެ ބަސް ޤަބޫލުކުރާ ކަމަށާއި، އޭގެ ސަބަބުން ކައިވެނި ރޫޅޭ ހިސާބަށް ގޮސްފައިވާ ކަމަށެވެ. އަދި އެއީ "ބޯދާ ޤަބޫލުކުރުމެއް" ކަމަށް ވެސް ކައުންސިލުން ބުނެފައިވެއެވެ.