އުމުރުން އެންމެ 34 ދުވަސް، އެކަމަކު 95 އިންޓަވިއު!
އެ ސޮރުގެ ކަންފަތުގައި ހުރީ 19 އިންޗި ނުވަތަ 48 ސެންޓިމީޓަރެ
ސިމްބާގެ ތަފްސީލުތައް، ދުނިޔޭގެ ރެކޯޑްތައް ބަލަހައްޓަމުންދާ ގިނިސްއާވެސް ވަނީ ހިއްސާކޮށްފައި
އަދުގެ ދުނިޔޭގެ އެންމެ އަގުބޮޑު ޕްލެޓްފޯމްތަކުގެ ތެރޭގައި ގުނާ ލެވޭ ސޯޝަލް މީޑިއާ ޕްލެޓްފޯމްގައި ބައެއް ތަރިންގެ ވިދުން ގަދަވެގެން ދަނީ ބުރު ސޫރައިގެ ރީތި ކަމުންނެވެ. ނުވަތަ ޖަހާ ޖޯކެއްގެ ސަބަބުން ވީޑިއޯއެއް ވައިރަލް ވެގެންނެވެ. ތަފާތު ވާހަކައެކެވެ. މިއީ "ސިމްބާ" ނަމަކަށް ކިއާ، ޅަ ބަކަރިއެއްގެ ވާހަކައެވެ.
ސޯޝަލް މީޑިއާގެ ތަރިއަކަށް ސިމްބާ ވީ ކިހިނެއް ހެއްޔެވެ؟ ސަބަބު ވަރަށްވެސް ހައިރާން ކުރުވައެވެ. "ސިމްބާ" އަކީ އާދައިގެ ޖަނަވާރެއް ނޫނެވެ. ސޯޝަލް މީޑިއާގެ ފާލަން މަތިން ދުނިޔޭގެ އެކި ކަންކޮޅުތަކަށް ސިމްބާގެ ވާހަކަ ދަތުރު ކުރީ، ގުދުރަތުން އެ ސޮރަށް ލިބުނު އާދަޔާ ހިލާފު، ދިގު، ކަންފަތުގެ ސަބަބުންނެވެ.
އަވަށްޓެރި ޕާކިސްތާނުގެ ކަރާޗީއަށް ސިމްބާ އުފަންވީ ޖޫން 4 ވަނަ ދުވަހުއެވެ. ޔޫޓިއުބްއާއި އެނޫންވެސް އެކި ޕްލެޓްފޯމްތަކުގައި ސިމްބާގެ ނަން ގުގުމަން ފެށީ އެސޮރުގެ ދިގު ކަންފަތުގެ ސަބަބުންނެވެ. ސިމްބާގެ ކަންފަތުގައި މިހާރު 22 އިންޗި އެބަހުއްޓެވެ. އަދިވެސް ދަނީ އިތުރަށް ދިގު ވަމުންނެވެ.
ސިމްބާ ބަލަހައްޓަމުން ދާ މުޙައްމަދު ޙަސަން ނަރީޖޯ ވަނީ ސިމްބާގެ ތަފްސީލުތައް، ދުނިޔޭގެ ރެކޯޑްތައް ބަލަހައްޓަމުންދާ ގިނިސްއާވެސް ހިއްސާ ކޮށްފައެވެ.
މި ދުނިޔެއަށް ސިމްބާ އުފަންވީ އިރު، އެ ސޮރުގެ ކަންފަތުގައި ހުރީ 19 އިންޗި ނުވަތަ 48 ސެންޓިމީޓަރެވެ. މަހެއްހާ ދުވަހުގެ ތެރޭގައި އިތުރު 3 އިންޗި ދިގުވިއިރު، އަދިވެސް ކަންފަތް ދިގުވުން ނުހުއްޓެއެވެ. ވީހާވެސް މިނިވަންކަމާއެކު ދުވެ އުޅެވޭނެ ގޮތް ސިމްބާއަށް ފަހި ކޮށްދިނުމުގެ ގޮތުން ނަރީޖޯ ވަނީ، ވެލްވެޓް ފޮތިން ސިމްބާއަށް ހާއްސަ އުރައެއްވެސް ތައްޔާރުކޮށްދީފައެވެ.
ކަރާޗީ އެއާޕޯޓްގެ އެއާ ޓްރެފިކް ކޮންޓްރޯލް ޑިޕާޓްމަންޓްގައި މަސައްކަތް ކުރަމުންދާ ނަރީޖޯއަކީ ބަކަރި ހުއިހައްޕާ، އާލާ ކުރުމަށް ލޯބި ކުރާ ޒުވާނެކެވެ. ސިމްބާއާ މެދުވެސް އޭނާ ކުރަނީ ފޮނި އުއްމީދުތަކެކެވެ.
ވަޒީފާ އަދާކުރަމުން ބަކަރި ގެންގުޅޭ ނަރީޖޯގެ ހާއްސަ ސިމްބާއަށް ދުވާލަކު 3 ފަހަރު ކިރު ދެއެވެ. އަދި ސިމްބާއަށް ހުރިހާ ކަމެއް ފުރިހަމަ ކޮށްދިނުމަށް، ކުރެވެން އޮތްހާ ކަމެއް ކޮށް، އެޅެން އޮތްހާ ފިޔަވަޅެއް އަޅައެވެ.
އެންމެ ދިގު ކަންފަތް ލީ ބަކަރީގެ ރެކޯޑަކީ ގިނިސްއިން ބަލަހައްޓަމުން ދާ ރެކޯޑެއް ކަމެއް ނުވަތަ ނޫން ކަމެއްވެސް ނަރީޖޯއަކަށް ޔަޤީނެއް ނޫނެވެ. ނަމަވެސް އޭނާ ހުރީ ޖަވާބެއްގެ އިންތިޒާރުގައެވެ.
