އެމްޑީޕީ އެކަނި ވެރިކަންކުރާ ތަން ދެކެން ބޭނުން، ނަމަވެސް އަދި އެއީ އެކަނި ކުރަން ދަތިކަމެއް: ރައީސް

އެމްޑީޕީ އެކަނި އޮވެގެން ވެރިކަން ކުރާތަން ދެކެން ބޭނުންފުޅުވާ ކަމަށާއި ނަމަވެސް އަދި އެއީ އެ ޕާޓީއަށް އެކަނި ކުރަން ދަތި ކަމެއް ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވިދާޅުވެއްޖެއެވެ.

ބުރާސްފަތި ދުވަހުގެ ރޭ އައްޑޫ ސިޓީގައި ބޭއްވި ރައީސް ޞާލިހުގެ ކެމްޕޭން ޖަލްސާގައި އެމަނިކުފާނު ވިދާޅުވީ އެމަނިކުފާނުގެ ސަރުކާރުން ގިނަ މަޝްރޫއުތައް ކުރިއަށްގެންގޮސްފައިވާ ކަމަށާއި އެވާހަކަތައް ދަތުރު ކުރައްވާ ކޮންމެ ރަށަކުން ވެސް ފާހަގަކުރަމުން އަންނަ ކަމަށެވެ. އެގޮތުން، ރަށްތަކުގެ ރައްޔިތުންނަށް ވޭތުވެދިޔަ 40 އަހަރު ދުވަހުގެ ތެރޭގައި ނުލިބުނު ތަރައްގީ މި ހަތަރު އަހަރު ދުވަހުގެ ތެރޭގައި ލިބިފައިވާކަން ފާހަގަކުރާ ކަމަށް ރައީސް ވިދާޅުވިއެވެ.

ރަށްތަކުގެ ރައްޔިތުންގެ ނިންމުން ވަރަށް ސާފުކޮށް އެނގޭކަން ފާހަގަކުރައްވައި ރައީސް ވިދާޅުވީ ރައްޔިތުން ބޭނުންވަނީ ތަރައްގީއާއެކު ކުރިއަށްދާން ކަމަށެވެ. އެހެންކަމުން މިފަހަރުގެ އެމްޑީޕީ ރިޔާސީ ޕްރައިމަރީ އިންތިޚާބުގައި އެ ފަރާތްތަކުން ވޯޓު ދޭން ނިންމާފައިވަނީ އެމަނިކުފާނަށް ކަމަށް ވެސް ވިދާޅުވިއެވެ.

ރައީސް ވިދާޅުވީ އެމްޑީޕީގެ މެންބަރުން އެމަނިކުފާނަށް ވޯޓު ދޭން ނިންމަނީ ގިނަ ސަބަބުތަކެއް ހުރެގެން ކަމަށެވެ. އެގޮތުން، މިއަހަރުގެ ރިޔާސީ އިންތިޚާބު ކާމިޔާބު ކުރެވޭނީ އެމަނިކުފާނު ހޮއްވަވައިގެންކަން އެ މެންބަރުންނަށް ގަބޫލު ކުރެވޭ ކަމަށް އެމަނިކުފާނު ވިދާޅުވިއެވެ.

އެމްޑީޕީއަކީ އެންމެ ބޮޑު އަދި އެންމެ ގިނަ ބައެއްގެ ތާއީދު އޮތް ޕާޓީއަށްވި ނަމަވެސް އިންތިޚާބު ކާމިޔާބު ކުރަން 50 އިންސައްތައަށްވުރެ އިތުރަށް ވޯޓު ބޭނުންވާއިރު އަދި އެމްޑީޕީއަށް އެކަނި އެކަން ކުރެވެން ނެތް ކަމަށް ރައީސް ވިދާޅުވިއެވެ. ކޯލިޝަނަކާއެކު މަސައްކަތް ކުރާއިރު ދޫ ދޭން ޖެހޭކަމަށާއި ނަމަވެސް އެމްޑީޕީއަށް އެއިން ލިބޭ އެތި މާބޮޑު ކަމަށް ރައީސް ފާހަގަކުރެއްވިއެވެ.

މާދަމާ އެމްޑީޕީގެ ޕްރައިމަރީ ބާއްވާން ތައްޔާރުވެފައިވާއިރު ރައީސް ޞާލިހާ ވާދަކުރައްވަނީ އެ ޕާޓީގެ ރައީސް، އަދި ކުރީގެ ރައީސް މުޙައްމަދު ނަޝީދުއެވެ. ދެ ބޭފުޅުން ވެސް ގެންދަވަނީ އިންތިޚާބު ބޮޑުތަނުން ކާމިޔާބު ކުރެއްވޭނެ ކަމަށް ވަރަށް ޔަގީންކަމާއެކު ވިދާޅުވަމުންނެވެ.

އެމްޑީޕީގެ ރިޔާސީ ޕްރައިމަރީގައި 57،255 މެންބަރުންނަށް ވޯޓު ލެވޭއިރު ވޯޓުލުން ކުރިއަށްދާނީ މާދަމާ ހެނދުނު 9:00 އިން ހަވީރު 5:00 އަށެވެ.